काठमाडौं- विशेष अदालतले ललिता निवास जग्गा प्रकरणमा भ्रष्टाचार मुद्दा खेपिरहेका अख्तियार दुरुपयोग अनुसन्धान आयोगका पूर्वप्रमुख आयुक्त दीप बस्न्यातलाई वारेस राखेर मुद्दा लड्न पाउने सुविधा दिने आदेश गरेको छ।
विशेष अदालतका न्यायाधीशहरु अब्दुल अजिज मुसलमान, शान्तिसिंह थारु र चन्द्रबहादुर सारुको इजलासले यो सुविधा दिने आदेश गरेको हो। सर्वोच्च अदालतबाट धरौटीमा रिहा भएका उनलाई वारेस राखेर मुद्दाको सुनुवाइ अघि बढाउन आदेश दिएको विशेष अदाललते जनाएको छ।
उनले आफ्नो स्वास्थ्यमा समस्या आएकाले उपचारका लागि विदेश समेत जानुपर्ने र अदालतको पेसीमा उपस्थित हुन समस्या भएको भन्दै असार २१ गते निवेदन दिएका थिए। उक्त निवेदनमा सुनुवाइ गर्दै मंगलबार अदालतले यस्तो आदेश दिएको हो।
यो आदेशपछि अब उनी बाहिर रहेर पनि मुद्दा लड्न पाउने भएका छन्। विशेषले पुर्पक्षका लागि थुनामा पठाएपछि सर्वाेच्चले उनलाई पाँच लाख धरौटीमा रिहा गरेको थियो।
न्यायाधीशद्वय आनन्दमोहन भट्टराई र ईश्वरप्रसाद खतिवडाको इजलासले वैशाख २४ गते धरौटीमा रिहा गर्ने आदेश गरेको थियो। कोरोना संक्रमण भएर अस्पतालमा भर्ना भएको र मुटु रोगीसमेत भएकाले धरौटीमा रिहा भई मुद्दा लड्न पाउनुपर्ने माग गर्दै उनले बन्दीप्रत्यक्षीकरणको निवेदन दायर गरेका थिए।
२०७८ वैशाख १७ गते बस्न्यातका तर्फबाट छोरी ज्वाईं प्रज्वल अधिकारीले सर्वोच्चमा बन्दीप्रत्यक्षीकरणको निवेदन दर्ता गराएका थिए।
सरकारी जग्गा व्यक्तिको नाममा ल्याउन मूख्य भूमिका निर्वाह गरेको आरोपमा बस्न्यातविरुद्ध विशेष अदालतमा मुद्दा दायर भएको थियो। भौतिक पूर्वाधार सचिव रहेको समयमा बस्न्यातले उक्त जग्गा व्यक्तिको नाममा बनाउन भूमिका खेलेको अख्तियारको आरोपपत्रमा उल्लेख छ।
सरकारी जग्गा व्यक्तिको नाममा पठाउने कार्यमा संलग्न मुख्य प्रतिवादी भएको भन्दै विशेषले उनलाई पुर्पक्षका लागि थुनामा राख्ने आदेश गरेको थियो। उक्त आदेशविरुद्ध उनी सर्वोच्च पुगेका थिए। तर, सर्वोच्चले उक्त निवेदनमा कुनै निर्णय नदिएकै अवस्थामा उनी दोस्रो निवेदन लिएर सर्वोच्च पुगेका थिए।
अख्तियारले बालुवाटारको ११३ रोपनी सरकारी जग्गा कीर्ते गरी व्यक्तिको नाममा दर्ता गरेको अभियोगमा ४ मन्त्री र तीन पूर्वसचिवसहित १ सय १० जनाविरुद्ध २०७६ माघ २२ गते भ्रष्टाचार मुद्दा दायर गरेको थियो।
अख्तियारकै पूर्वप्रमुखआयुक्त, भूमिसुधार तथा मालपोतका कर्मचारी, जग्गा खरिद बिक्री गर्नेहरूविरुद्ध पनि मुद्दा दायर भएको थियो। मुद्दा दायर गरिएकामा नेपाली कांग्रेसका नेता विजयकुमार गच्छदार तथा भाटभटेनीका सञ्चालक मीनबहादुर गुरुङसमेत थिए। विशेष अदालतले उनीहरुलाई फागुनमै अदालत उपस्थित हुन म्याद जारी गरेको थियो।
लकडाउन खुकुलो भएसँगै अदालत खुल्न थालेपछि केही आरोपी अदालतमा उपस्थित भएपनि गच्छदारसहितका केही भीआईपी भने उपस्थित भएका छैनन्। कोरोनाको दोस्रो लहर कम हुँदै गएर अदालत खुल्न थालेपछि बस्न्यातका तर्फबाट सोमबार निवेदन दिइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
