काठमाडौं– शुक्रबारबाट हलहरुमा ३ वटा नयाँ फिल्म लागेका छन्। ‘सोलो रिलिज’को अवसर खासै नजुर्नेे नेपाली फिल्म बजारमा आजपनि ३ वटा नेपाली फिल्म एकै दिन प्रदर्शनमा आएका हुन्।
नेपाली फिल्महरुको गुणात्मकभन्दा संख्यात्मक वृद्धिका कारण फिल्म हलहरुमा चलचित्रको भार बढी र दर्शकको उपस्थिती कम भएको पाइन्छ। त्यसमा पनि कथावस्तु, स्टार कास्ट र फिल्मको प्रस्तुतिले समेत दर्शकको रोजाई फरक पर्ने गर्दछ। यसपटक ३ वटै फिल्मका निर्माण पक्षले यी सबै कुरालाई चिर्ने बताएका छन्। तर को कति सफल होलान् त?
हरि
सस्पेन्स तथा हाँस्य विधामा निमार्ण भएको फिल्म ‘हरि’ शुक्रबारबाट प्रर्दशनमा आएको छ। सफल केसी र प्रतिक गुरुङको लेखन तथा निर्देशनमा तयार भएको फिल्म ‘हरि’मा विपिन कार्कीसहित सुनिता श्रेष्ठ ठाकुर, कमलमणी नेपाल, थिन्ले लाह्मो, लक्ष्मी बर्देवा, लोकनाथ आचार्य, प्रकाश गन्धर्व, रामभजन कामत, सुनिशा बजगार्इं लगायतको अभिनय रहेको छ।
फिल्म हरिले गत मंगलबार साँझ सम्पन्न ‘प्रिमियर सो’बाट मिश्रित प्रतिक्रिया पाएको थियो। ‘हरि’को प्रिमियरपछि नेपाली फिल्म बजारमा कथावस्तुका अधारमा नयाँ स्वादको फिल्म बनेको तर्क गर्दै फिल्म लेखक तथा समिक्षक सामिप्यराज तिमल्सिना, निर्देशक तथा सञ्चारकर्मी दिपेन्द्र लामालगायतले प्रस्तुतिका हिसाबले पनि नयाँ प्रयोग देख्न मिलेको बताएका थिए। उनीहरुले दर्शकलाई फिल्म हेर्नका लागिसमेत सुझाएका थिए।
यज्ञेश्वर पौडेल, थाक्पा तमाङ र माधव थापाको लगानी रहेको फिल्ममा चिन्तन राजभण्डारीको छायांकन र अर्जुन कार्कीको सम्पादन रहेको छ।
बेबी आई लभ यू
जनक पाण्डेको निर्देशनमा बनेको फिल्म ‘बेबी आई लभ यू’ प्रेम र विछोडको कथामा आधारित छ। फिल्ममा सन्तोष खड्की र पूजा तिवारी मुख्य भूमिकामा देखिएका छन्।
फिल्मका मुख्यपात्र सन्तोष र पूजा दुवैैजना नेपाली सिनेमाका लागि नयाँ अनुहार हुन्।
लिची इन्टरटेन्मेन्ट प्रालिको ब्यानरमा निर्माण भएको फिल्ममा शिव न्यौपानेका साथ सिर्जना परियार र दुर्गा पाण्डेको लगानी रहेको छ। फिल्ममा सरोज खनाल, निर्मल शर्मा, राजु कमेडी ‘रेन्बो’, रेशम श्रेष्ठ, अप्सन पन्थी, बिमल गिरी र किरण के शर्मालगायतका कलाकारहरुको अभिनय हेर्न सकिन्छ।
अमेरिका बोइज
प्रवेश पौडेलको निर्देशनमा बनेको फिल्म ‘अमेरिका बोइज’मा ३ युवाले गर्ने एक गल्तीबाट उत्पन्न हुने समस्याको कथालाई प्रस्तुत गरिएको छ। कमेडी विधालाई प्रथमिकतामा राखेर निर्माण भएको फिल्ममा नेपालीहरुले भोगेका र देखेका समस्याहरुलाई केन्द्रमा राखेर पर्दामा उतारिएको फिल्मका निर्देशक पौडेलले दावी गरे।
निमेष श्रेष्ठको सम्पादन, दीपक आरजे र जयन जे वाइवाको संगीत रहेको फिल्ममा अर्पण थापा, सुनिल थापा, हरिहर शर्मा, सन्दिप क्षेत्री, कामेश्वर चौरासिया, शृष्टी कार्की लगायत कलाकारको अभिनय रहेको छ।
यसरी शुक्रबारबाट हलमा लागेका ३ नयाँ नेपाली फिल्महरुमध्ये कुन फिल्मले बढी दर्शकलाई हलसम्म तान्नेछ अर्थात् कुन फिल्म व्यवसायिक रुपमा सफल हुनेछ, आम फिल्मकर्मीहरुको चासोको विषय बनिरहेको छ।
यसका अलावा आजैबाट बलिउड फिल्म ‘विरे दी वेडिङ’ पनि नेपाली हलहरुमा लाग्नेछ। बाल्यकालका ४ साथीहरुको जीवनसंघर्षमा आधारित यस फिल्ममा करिना कपुर, सोनम कपुर, सिखा तल्सानिया र स्वारा भास्कर मुख्य चरित्रको रुपमा उभिएका छन्।
विश्वभर ठूलो बजार रहेको बलिउड फिल्म उद्योगको नेपालमा पनि राम्रो प्रभाव पर्ने गरेको छ। यसकारण पनि तीन वटै नेपाली फिल्महरुका लागि सदाको जस्तै यसपटक पनि चुनौति थपिएको छ।
यसअघिनै रिलिज भइसकेका फिल्महरु सुनकेसरी, राजी, डेडपुल, सोलो अ स्टार वार लगायत हलहरुबाट उत्रिसकेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
