काठमाडौं- सशस्त्र प्रहरी बल नेपालमा डीआईजी पदमा बढुवाका लागि प्रक्रिया सुरु भएको छ। बधुबार सशस्त्र प्रहरी प्रधान कार्यालयले एक सूचना जारी गर्दै बढुवाका सम्भावित उम्मेद्वारले तीन दिनभित्र आवेदन दिन भनेको छ।
बढुवा समतिका सदस्य सचिव तथा मानव स्रोत विभागका एआईजी रामशरण पौडलेद्वारा हस्ताक्षरित सूचनामा बढुवाका लागि दाबेदार एसएसपीहरुलाई तीन दिनभित्र शैक्षिक योग्यताको प्रमाणपत्र र बढुवाका लागि आवश्यक अन्य कागजातसहित आवेदन दिन भनिएको छ।
सशस्त्रमा हाल तीन डीआईजीको दरबन्दी रिक्त छ। चार वर्षे कार्यकालपछि एक वर्ष थप गर्न सकिने प्रावधान भएपनि डीआईजी प्रवीणकुमार श्रेष्ठको १ वर्ष थप नभएपछि असार ९ गतेबाट उनी अनिवार्य अवकाशमा गएका छन्। उनीभन्दा अघि प्रजाभक्त श्रेष्ठ र बसन्तकुमार बानियाँले अनिवार्य अवकाश पाएका थिए। योसँगै अहिले सशस्त्र प्रहरी बलमा तीन डीआईजीको दरबन्दी रिक्त छ।
रिक्त तीन डीआईजीका लागि प्रतिस्पर्धी एसएसपीहरु भने प्राविधिक सईमा भर्ना भएकाहरु छन्। डीआईजीका बढुवाका लागि एसएसपीहरु कालीदास धौबजी, कुमार न्यौपाने, विदुर खड्का, प्रदीपकुमार पाल, भेषबहादुर शाह, लक्ष्मणबहादुर सिंह, कृष्णराज पाठक, प्रेमराज पोखरेल, इन्द्रराज कार्की, शान्तिकुमार कार्की र नेत्रकुमार खत्रीलगायत एसएसपी प्रतिस्पर्धामा छन्।
पहिलो दाबेदार रहेका धौबजी नेपाल प्रहरीमा प्राविधिक सईको रुपमा २०५२ पुस २० गते सेवा प्रवेश गरेका थिए। सशस्त्र प्रहरी बल गठन भएपछि उनी नेपाल प्रहरीबाट सेवा परिवर्तन गरी सशस्त्रमा आएर गैरप्राविधिक बनेका हुन्। त्यस्तै, दोस्रो दाबेदार रहेका न्यौपाने पनि धौबजीसँगै प्राविधिक सईको रुपमा सेवा प्रवेश गरेका थिए। तेस्रो दाबेदार रहेका खड्का पनि नेपाल प्रहरीमा प्राविधिक सईको रुपमा २०५० भदौ १ गते सेवा प्रवेश गरी सशस्त्र गठन भएसँगै सशस्त्रमा आएका व्यक्ति हुन्।
अहिले डीआईजी बढुवा हुनेहरु भने नेतृत्वमा पुग्ने अवस्था रहँदैन। उनीहरु भन्दा सिनियर डीआईजी आईजीमा बढुवा भएकाहरुको कार्यकाल नसकिँदै उनीहरु अवकाशमा जानेछन्। सईमा भर्ना भएकाहरु डीआईजी बन्दा उता इन्स्पेक्टरमा भर्ना भएकाहरु भने १६ वर्षदेखि एउटै पदमा रहनु पर्ने अवस्था सशस्त्र प्रहरी बलमा छ। २०६२ सालमा इन्स्पेक्टरमा भर्ना भएका ८५ जना अझैसम्म एउटै पदमा कार्यरत छन्। उनीहरुको अहिलेसम्म बढुवा हुन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
