काठमाडौं– नेपाली कांग्रेसका सहमहामन्त्री प्रकाशशरण महतले प्रदेश र स्थानीय तहलाई बाँडिएको बजेटको कारण माग गरेका छन्।
बिहीबार राजधानीमा आयोजित पत्रकार भेटघाट कार्यक्रममा सहमहामन्त्री महतले मुलुक संघीय संरचनामा गएको भन्दै बिनासिद्धान्त र अपर्याप्त बजेट बाँडिएकोमा असन्तुष्टि जनाए। उनले सांसदलाई दिइएको ५ करोडमा पनि असन्तुष्टि जनाए। 'स्थानीय तह भएको बेला सांसदलाई रकम आवश्यक छैन', महतले भने।
बेरोजगारलाई दिने भनिएको पैसा सिधै कार्यकर्तालाई जाने भन्दै महतले चिन्ता व्यक्त गरे। 'बिना धितो बाँड्ने भनिएको रकम कहिल्यै फिर्ता आउँदैन', उनले भने, 'पैसा बाँड्ने संयन्त्र उहाँहरुको बन्छ, त्यसले कार्यकर्तालाई सिफारिस गर्छ।'
सरकारको कार्यशैलीप्रति पनि महतले गुनासो व्यक्त गरेका छन्। गृहमन्त्रीले समयमै काम नसक्ने ठेकेदारलाई समातेर थुन्न दिएको अभिव्यक्ति प्रति महतले आपत्ति जनाए। 'ठेकेदारसँग विभिन्न किसिमका सहमति भएका हुन्छन्। सेवा सर्तका सम्झौता भएका हुन्छन्। समयमा काम नसक्ने ठेकेदारलाई सजाय दिने पनि कानुनी प्रक्रिया हुन्छन्', उनले भने, 'तर गृहमन्त्रीले कानुनी राज्यमा पनि ठाडो बाटो अपनाएका छन्।'
सरकार हरेक निकायलाई नियन्त्रण गर्ने रणनीतिका साथ अघि बढेको सहमहामन्त्री महतको भनाइ थियो। 'संवैधानिक निकायहरुलाई कार्यपालिकाको छायाँ बनाउने प्रयास भइरहेको छ', उनले भने।
फरक प्रसंगमा महतले कम्युनिस्टबाट कांग्रेसले संगठन गर्ने तरिका र आफ्ना कुरालाई प्रचार गर्ने शैली सिक्नुपर्ने बताए। 'त्यति नसिक्ने हो भने कांग्रेसले अपनाएको विचार जतिसुकै राम्रो भए पनि सफल पार्टी सफल हुन गाह्रो छ', उनले भने।
कम्युनिस्ट पार्टीले कमसल चिनियाँ सामानको जस्तो असफल विचारको प्रचार र विज्ञापन गरेर प्रभाव बढाएको बताए। कम्युनिस्टहरु संस्थागत भ्रष्टाचारमा माहिर भएको उनले आरोप लगाए। 'उनीहरुबाट विचार सिक्नुपर्ने आवश्यकता भने छैन', उनले भने, 'उनीहरुले अपनाइरहेको विचार भने संसारभरबाट असफल विचार हो।'
सत्तामा जाँदा कांग्रेसले राम्रो गरेको भन्दै महतले थपे, 'अझ राम्रो गर्न सक्थ्यौं, त्यो अर्कै पाटो हो।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821304.jpg)
-1786602170.png)
