काठमाडाैं- योगदानमा आधारित सामाजिक सुरक्षा योजनामा हालसम्म दुई लाख ५१ हजार २९२ योगदानकर्ता सूचीकृत भएका छन्।
सोमबार पत्रकार सम्मेलन गर्दै सामाजिक सुरक्षा कोषले योगदानमा आधारित सामाजिक सुरक्षा योजनामा हालसम्म दुई लाख ५१ हजार २९२ योगदानकर्ता सूचीकृत भएको बताएको हो।
कोषमा १४ हजार ५८० रोजगारदाता सूचीकृत भएका छन्। हालसम्म छ अर्ब ३९ करोड ३५ लाख रुपैयाँ योगदान रकम संकलन भएको कोषले जानकारी दिएको छ।
कोषका प्रवक्ता विवेक पन्थीले कोषले सञ्चालन गर्ने औषधि उपचार, स्वास्थ्य तथा मातृत्व सुरक्षा योजनामा दुई हजार ४७ योगदानकर्तालाई तीन करोड ९१ लाख, दुर्घटना तथा अशक्तता योजनामा ९१ योगदानकर्तालाई २६ लाख ९१ हजार र आश्रित परिवार सुरक्षा योजनामा ४१ आश्रित परिवारलाई ४८ लाख तीन हजार रुपैयाँ रकम कोषबाट दाबी भुक्तानी भएको बताए। त्यस्तै वृद्धावस्था सुरक्षा योजनामा ८७४ योगदानकर्तालाई छ करोड ९७ गरी जम्मा ११ करोड ६२ लाख रुपैयाँ कोषबाट दाबी भुक्तानी भएको उनले बताए।
कोषले २०७७ माघ २९ गते सामाजिक सुरक्षा योजना सञ्चालन कार्यविधिको दोस्रो संशोधन भएपछि मात्रै कोषमा एक हजार ३२८ रोजगारदाता, ६४ हजार ९५६ योगदानकर्ता र दुई अर्ब २१ करोड १२ लाख रुपैयाँभन्दा बढी रकम संकलन भएको जनाएको छ।
प्रवक्ता पन्थीले आव २०७६/७७ भित्र सूचीकृत योगदानकर्ता कोषको आव २०७६/७७ को वृद्धावस्था सुरक्षा योजना अन्तर्गतको संकलित योगदान रकमको लगानीबाट प्राप्त प्रतिफल तीन करोड ८० लाख १५ हजार ६९८ रुपैयाँ वितरणयोग्य रकमलाई कोषमा सम्बन्धित योगदानकर्ताको योगदान रकम दाखिला भएको आधारमा आठ प्रतिशत प्रतिफल वितरण गर्ने निर्णय भएको बताए। सो रकम कोषले सम्बन्धित योगदानकर्ताको सामाजिक सुरक्षा कोषको खातामा चाँडै जम्मा गरिदिने पनि उनले बताए।
योगदानमा आधारित सामाजिक सुरक्षा योजनामा २०७६ साल साउन १ गतेबाट रकम संकलन हुन थालेको हो। कोषले योगदानमा आधारित सामाजिक सुरक्षा योजनामा आबद्ध हुन सबैलाई आह्वानसमेत गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
