काठमाडौं- आसन्न १४ औं महाधिवेशनलाई केन्द्रमा राखेर कांग्रेसका शीर्ष नेताको सक्रियता बढेको छ। गत शनिबार सभापति शेरबहादुर देउवाले आफू निकट केन्द्रीय सदस्यहरुलाई पालैपालो बोलाउन थालेपछि अन्य नेताहरुको पनि सक्रियता बढेको छ।
देउवाले शनिबार, आइतबार र सोमबार गरी सातै प्रदेशका आफू निकटका केन्द्रीय सदस्यहरुलाई निवासमा डाकेका थिए।बूढानीलण्ठ पुगेका अधिकांश केन्द्रीय सदस्यले सभापतिमा पुनः देउवाको उम्मेदवारी निर्विकल्प भएको बताएका थिए। पहिलो दिन अर्थात् शनिबार प्रदेश १ का केन्द्रीय सदस्यसँग छलफल गर्ने क्रममा नेता ज्ञानेन्द्रबहादुर कार्कीले उम्मेदवारीको प्रत्यासी बन्नका लागि उपसभापति विमलेन्द्र निधिसँग सल्लाह गर्न सुझाएका थिए। आफ्नो समूहबाट निधि पनि उठ्दा असर पर्ने आकलन गरेका कार्कीले निधिलाई साथमा लिन देउवालाई आग्रह गरेका थिए। कार्कीको बोलीलाई अर्की केन्द्रीय सदस्य सीता गुरुङले साथ दिएक थिइन्।
साउन २९ मा देउवा निवास पुगेर सभापतिमा लड्ने बताइसकेका निधि पछि हट्ने पक्षमा छैनन्। यद्यपी, देउवाले आइतबार निधिलाई बोलाए र आफू सभापतिमा दोहोरिन चाहेको बताउँदै सहयोगको अपेक्षा राखे। तर, निधिले उल्टै देउवाको साथ खोजे। १३ औं महाधिवेशनको बेला १४ औं महाधिवेशनमा आफूलाई सघाउने बारे देउवाले गरेको प्रतिवद्धता निधिले स्मरण गराए। निधिको उम्मेदवारी फिर्ता नलिने अडान देखिएपछि देउवाले भने, ‘उम्मेदवारी बन्ने तपाईको अधिकार हो उठ्नुस्।’
आइतबार देउवा निवास पुगेका बागमती र गण्डकी प्रदेशका केही नेताले निधिको आवश्यकता आफ्नो समूहमा रहेको औंल्याएका थिए। देउवा निकट पूर्वमन्त्री मोहन बस्नेतले भने, ‘सभापतिले र हाम्रो तहबाट पनि फेरि एकपटक विमल दाईसँग छलफल गर्ने कुरा भएको छ।’
तेस्रो दिन अर्थात् सोमबार देउवा निवासमा भेला भएका लुम्बिनी, कर्णाली र सुदूरपश्चिमका नेताहरुले देउवालाई पूर्ण समर्थन गर्ने जनाए। सभापतिको कार्यकाल सकिँदै गर्दा उनका लागि समय थप अनुकुल भएको उनीहरुको बुझाइ थियो। देउवा निकट नेता वीरबहादुर बलायरले भने, ‘उहाँ (निधि)ले सहयोग गरे ठिकै छ। हाम्रो उम्मेदवार देउवाजी नै हो।’
१३ औं महाधिवेशनमा भन्दा पनि अहिले समय ‘कम्फर्टेबल’ रहेको उनले बताए। प्रतिनिधि सभा पुनः स्थापना हुनेमा ढुक्क संस्थापन पक्षले देउवा प्रधानमन्त्री बने थप सहजता आउने आकलन गरेको छ।
उक्त समूहले देउवा सत्ता सञ्चालनको अवस्थामा पुग्दा आफ्नो समूहमा थप शक्ति बढ्ने बुझेको छ। नेता तथा कार्यकर्ता शक्तिको पछि लाग्ने हुँदा महाधिवेशनमा विजयी हुन थप सहजता हुने संस्थापन पक्षको आकलन छ। शक्तिको ‘दुरुपयोग’ गरी देउवाले फेरि पनि दलको सत्ता सञ्चालन गर्ने डर संस्थापनइतरमा छ।
देउवाले आफ्नो सक्रियतालाई तिव्र पारेपछि अन्य नेताहरुले पनि दौडधुप बढाएका छन्। सामूहिक तथा एकल भेटघाटमा नेताहरु लागिरहेका छन्। आफूलाई थाहै नदिइ सातै प्रदेशका केन्द्रीय सदस्यहरु बोलाएको प्रति असन्तुष्ट उपसभापति निधिले पार्टी भित्रको विभिन्न पक्षसँग छलफल गरेका छन्।
इतिहासदेखि राजनीतिक आन्दोलनमा सक्रिय पारिवारिक विरासत बोकेका नेतालाई निधिले आफ्नै निवासमा डाके। सोमबार महामन्त्री डा शशांक कोइराला र नेता प्रकाशमान सिंहलाई बोलाएका निधिले साझा धारणा तय गरेर जाने समझदारी भएको नेपाल लाइभसँग बताए। तीन जनाको गठबन्धन अल्पकालिन नभएको उनले दाबी गरे।
उम्मेदवारी घोषणा गरेका निधिले सोमबार नै युवा पुस्ताका नेताहरुलाई भेटे। संस्थापन इतरका युवा पुस्ताका नेताको भेटमा उनले सभापतिमा उठ्ने निर्णय फाइनल घोषणा भएको बताएका थिए। सभापतिमा निर्वाचित हुनलाई युुवा पुस्ताको साथ अनिवार्य रहेको बुझेका नेताहरुले उनीहरुसँगको छलफललाई प्राथमिकतामा राखेका छन्।
सभापतिका दाबेदारद्वय प्रकाशमान सिंह र डा शेखर कोइरालाले पनि आन्तरिक छलफल बढाएका छन्। सोमबार यी दुई नेताबीच करिब दुई घन्टा संवाद भएको थियो। त्यसअघि शेखरले बलबहादुर केसीलाई भेटेका थिए। नेताहरु गगन थापा र दिलेन्द्रप्रसाद बडुसँग पनि यसबीचमा शेखरले संवाद गरेका छन्।
सभापति देउवा र उपसभापति निधि महाधिवेशन लक्षित भेटघाटमा लागेपछि वरिष्ठ नेता रामचन्द्र पौडलले पनि तातेका छन्। पौडेलले आफ्नो समूहका नेताहरुको भेला शुक्रबारलाई डाकेका छन्। बैठकबाट पौडेल पक्षले आफ्नो रणनीति तय गर्नेछ। बैठकमा क्रियाशील सदस्यका बारेमा पनि छलफल हुने बताइएको छ।
भदौ १६ देखि १९ सम्म १४ औं महाधिवेशनको मिति तय भएको छ। तल्लो तहको अधिवेशन वडास्तरबाट साउन १२ देखि सुरु हुने भएको छ। महाधिवेशनको मुख्य मेरुदण्डका रुपमा रहेका क्रियाशील सदस्यको टुंगो हालसम्म लाग्न सकेको छैन। हालसम्म आठ लाख बढी क्रियाशील सदस्य सूचीकृत भएको बताइएको छ। सूचीकृत कतिपय नाममा उजुरी परेका छन्। प्राप्त उजुरीको आधारमा छानबिन गरी अन्तिम नामावली असार २० सम्म टुंगाउने तयारी क्रियाशील छानबिन समितिको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765528419.png)
-1764146706.png)
-1763721444.png)
-1765273665.jpg)
