काठमाडौं– सर्वोच्च अदालतमा मुद्दामा बहस गर्दा सरकारी वकिल र वरिष्ठ अधिवक्ताहरुले कैद माफीबारे कुनै निर्णय नभएको जिकिर गर्दै अदालतलाई ढाँटेकाले बालकृष्ण ढुंगेलसहित अन्यलाई अदालतको अवहेलनामा कारबाही हुनुपर्ने भन्दै इजलासमा प्रश्न उठाइएको छ।
कैद माफी दिन मिल्ने या नमिल्ने भन्नेमा आदेश सुनाउने भनी मंगलबार बसेको न्यायाधीशद्वय मिरा खड्का र टंकबहादुर मोक्तानको इजलासमा पुन: बहस सुरु भएपछि निवेदकका तर्फबाट बहसका लागि उत्रेका वरिष्ठ अधिवक्ता सुरेन्द्र भण्डारीले यस्तो माग गरेका हुन्। उनले अदालतलाई पनि ढाँटेर ढुंगेललाई माफी दिनुले सरकारले राजनीति पहुँच भएको व्यक्ति भएको आधारमा भेदभाव गर्दै सजाय माफी दिएकाले उक्त निर्णय उल्टिनुपर्ने जिकिर गरे। सरकारको सिफारिस अनुसार ढुंगेलसहितका ८ सय १६ कैदीलाई असल चालचालनका आधारमा गणतन्त्र दिवसका अवसरमा आज बिहान कैद माफी गरी रिहा गरिएको छ।
सोमबारसम्म सजाय माफीको प्रक्रिया रोक्न माग भएकोमा आज माफी दिने निर्णय खारेज भई पुन: हिरासतमा कैद भुक्तानका लागि पठाउनुपर्ने बहस सर्वोच्चमा सुरु भएको छ। वरिष्ठ अधिवक्ता भण्डारीले अदालतले आज आदेश सुनाउने भनेकै अवस्थामा बिहानै छाड्नु र न्यायाधीश, वकिल र पत्रकारलाई धम्की दिनुले उनको चालचलन असल भएको भन्ने आधार खारेज भएकाले सजाय माफी दिने निर्णय उल्टाउने आदेश गर्न माग गरे।
अधिवक्ता दिनेश त्रिपाठीले दायर गरेको निवेदन विचाराधीन रहेकै अवस्थामा सरकारले हिजो राति नै उनलाई माफी दिने निर्णय गर्दै राष्ट्रपति विद्यादेवी भण्डारी समक्ष सिफारिस गरेको थियो। तर, उक्त कुरा हिजो भएको बहसका क्रममा लुकाउँदै निर्णय नभएको जिकिर पेश भएपछि अदालतले सक्कली फाइल मगाउने आदेश गरेको थियो। सर्वोच्चको उक्त आदेश लगत्तै बिहानै ढुंगेललाई रिहा गरिएकाले अदालतलाई ढाँटेर अवहेलना गरिएको पनि निवेदकका कानुन व्यवसायीहरुले तर्क गरेका छन्।
सर्वोच्चले पुन: दुवै पक्षको बहस सुनेर निर्णय सुनाउनेछ। यदि सर्वोच्चले माफी दिने निर्णय गैरकानुनी ठहर गरेमा ढुंगेल पुन: थुनामा जानुपर्नेछ।
अदालतमा बहसका क्रममा निवेदकका कानुन व्यवसायीले ढुंगेल विरुद्ध अदालतको अवहेलना मुद्दा चलिरहेको अवस्थामा माफी दिएकाले यसमा गलत मनसाय प्रस्ट भएकाले तत्काल प्रक्राउ गर्नू भनी प्रहरीको नाममा आदेश जारी गर्न माग गरेका छन्। सर्वोच्चको ६ नम्बर इजलासमा चलेको मुद्दामा साँझ ५ बजेसम्म यसबारे निर्णय हुने देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1698918398-1698987692.png)
-1764146706.png)
