काठमाडौं– पूर्व माओवादी केन्द्रका नेता बालकृष्ण ढुङ्गेलले जेलबाट रिहा भए लगत्तै नेपाल कम्युनिष्ट पार्टीको केन्द्रिय कार्यालय पेरिसडाँडा पुगेर अब नेपालमा डलरवादीहरुलाई लखेट्नु पर्ने बताएका छन्।
‘नेपालबाट अब डलरवादीहरुलाई नलखेट्ने हो भने गणतन्त्र संस्थागत हुँदैन’, उनले भने, ‘म अदालतको विरोधी होइन तर अदालतमा बसेर पैसाको भरमा मेरो न्यायको बलात्कार गर्ने केहीको विरोध गरेको हुँ।’
आज बिहान जेलबाट रिहा भएका ढुङ्गेललाई नेकपाका नेता देवेन्द्र पौडेलले स्वागत गरेका थिए। स्वागत लगत्तै प्रतिक्रिया दिँदै अब गणतन्त्र संस्थागत गर्न लागि पर्ने बताए। कारागार व्यवस्था ऐन अनुसारको सुविधा पाएर आफु छुटेको भन्दै उनले आफूले सँधै अदालतप्रति सम्मान गर्ने जिकिर गरे।
ढुङ्गेलले दुई पार्टीको एकिकरणले पनि सहयोग गरेको तर आफूले सजाय भुक्तान गरेर छुटेको उनले दावी गरे। विवेकशील साझा पार्टीको विरोध गर्दै उनले नाम राख्दैमा कोही विवेकी नहुने बताए। विवेकशील साझाका संयोजक रविन्द्र मिश्रको नामै तोकेर उनले विरोध गरेका थिए।
डिल्लीबजार जेलमा उनलाई स्वागत गर्न उनका समर्थक फूलमाला र अबिर लिएर पुगेका थिए। त्यस लगत्तै ढुंगेललाई पेरिसडाँडामा नेकपाका नेता देवेन्द्र पौडेलले स्वागत गरेका थिए।
२०६१ सालमा ओखलढुंगाका उज्जनकुमार श्रेष्ठको हत्या अभियोगमा दोषी ठहर भएका ढुंगेल लामो समय फरार अभियुक्तका रुपमा रहेका थिए। उनलाई गत कात्तिक १४ मा पक्राउ गरी डिल्लीबजार जेलमा राखिएको थियो। सर्वस्वसहित जन्मकैदको सजाय पाएका ढुंगेलले यसअघि जेल बसेको सयम कटाएर कात्तिक १४ देखि १२ वर्ष ५ महिना २२ दिन जेल बस्नुपर्ने थियो। तर सरकारले असल चालचलनको आधारमा आज गणतन्त्र दिवसका दिन उनलाई बाँकि कैद माफी दिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
