कञ्चनपुर– डाँका मुद्दामा ३ वर्षको कैद सजाय सुनाइएका एक अभियुक्तलाई कञ्चनपुर प्रहरीले ३८ वर्षपछि पक्राउ गरेको छ।
डाँका मुद्धाका फरार प्रतिवादी बेलौरी नगरपालिका–२ का ५५ वर्षीय चन्द्रकान्त भनिने लालबहादुर लुहारलाई प्रहरीले ३८ वर्षपछि आज (मंगलबार) पक्राउ गरेको हो। घरमै लुकिछिपी बसेको अवस्थामा लुहारलाई पक्राउ गरिएको प्रहरीले जानकारी दिएको छ।
जिल्ला प्रहरी कार्यालय कञ्चनपुरका प्रहरी नायब उपरीक्षक अमरबहादुर थापा क्षेत्रीका अनुसार लुहारले २०४० सालमा लारी डिष्टीलरी बेलौरीबाट अन्त शुःल्क वापतको सरकारी रकम लक्ष्मीपुर पुर्नवासस्थित राष्ट्रिय वाणिज्य बैंकमा जम्मा गर्न जाने क्रममा बन्दुकलगायत हातहतियार देखाई लुटपाट गरेका थिए।
कञ्चनपुर जिल्ला अदालतको २०४२ सालमा नै सुनाएको फैसलानुसार लुहारलाई ३ वर्ष १ महिना १५ दिन कैद सजाय तोकिएको थियो।
वारदातदेखि लुहार फरार रहँदै आएका थिए। पक्राउ परेका लुहारलाई कञ्चनपुर जिल्ला अदालतमा पेश गरी कैद भुक्तानका लागि कारागार चलान गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
