काठमाडौं- सामाजिक सञ्जाल फेसबुक, टिकटकदेखि युट्युबसम्म अहिले एउटा घटनाको खुबै चर्चा चलेको छ। जहाँ ‘जस्टिस फर सविता’ ह्यासट्याग गर्दै अनेक भिडियोहरु सञ्जालमा भाइरल बनाइएका छन्।
घटना चितवनको भरतपुर –१९ शारदा बख्यान चोककी सविता भण्डारीको हो। यही घटनासँग सम्बन्धित एउटा भिडियो सामाजिक सञ्जालमा भाइरल भएको छ। जहाँ सविताका ससुरा रमेशकुमार धितालले उनलाई यौनहिंसा गरेको देखिएको छ। ससुराले बुहारी सविताको संवेदनशील अंगमा छुनेसम्मका हर्कत गरेको भिडियो बाहिरिएको छ। यो भिडियो सविताकी बहिनी सजनीले सार्वजनिक गरेकी हुन्।
आफूमाथि ससुराले समेत यौन हिंसा गर्ने गरेको दिदीले बताएपछि लुकेर भिडियो खिच्न लगाएको सजनीले बताएकी छिन्। उनका अनुसार सोही भिडियो दिदी सविताले बहिनी सजनीलाई मेसेन्जरमा पठाएकी थिइन्। अहिले त्यही भिडियो सजनीले सार्वजनिक गरेकी हुन्। त्यो भिडियो सार्वजनिक भएपछि रमेशकुमारलाई कारबाही हुनुपर्ने भन्दै चौतर्फी दबाब थालिएको छ।
मृत्यु भएको डेढ महिनासम्म सामसुम रहेको यस विषयमा अहिले सामाजिक सञ्जालमा खुबै तातेको छ। यसको वास्तविकता के हो भन्नेबारे नेपाल लाइभले खोतल्ने प्रयास गरेको छ।
घटना वैशाख ४ गतेको हो। चितवनकी २८ वर्षीया सविता भण्डारी आफ्नै घरको कोठाको झ्यालको ग्रिलमा सलको पासो लगाएर झुण्डिएको अवस्थामा मृत फेला परिन्। झुण्डिएको अवस्थामा मृत रहेको भन्ने जानकारी पाएपछि घटनास्थलमा पुगेको प्रहरीले साँझ ६ बजेतिर घटनास्थल मुचल्का उठाउँदै शव पोष्टमार्टमका लागि अस्पताल पठायो। घटनाको जानकारी उनका माइती पक्षलाई पनि दिइयो।
सविताको मत्युको खबर थाहा पाएपछि कोटेश्वरमा रहेका उनका माइती पक्षका बाबुआमा रामचन्द्र भण्डारी, सावित्रा भण्डारी बहिनी सजनीसहितका आफन्त चितवन पुगे। प्रहरीले घटनाबारे उनका परिवारलाई जानकारी गरायो।
सविताले आत्महत्या गरेकै भएपनि आत्महत्या गर्न बाध्य बनाइएको भन्दै सविताका माइती पक्षले यस विषयमा अनुसन्धान गर्नुपर्ने भन्दै माग राखेका थिए। सोही अनुसार उनीहरुले सविताका श्रीमान योगेन्द्रकुमार धिताल, ससुरा रमेशकुमार र आमाजु भावना ढकालविरुद्ध आत्महत्या दुरुत्साहनमा जाहेरी दिए।
‘उहाँहरुको जाहेरी आएपछि हामीले ससुरा रमेशकुमार, श्रीमान योगेन्द्रलाई पक्राउ गर्यौं भने आमाजु भावना फरार भइन्’, चितवनका एसपी ओम अधिकारीले नेपाल लाइभसँग भने।
उनका अनुसार पोष्टमार्टम रिपोर्टमा समेत आत्महत्या नै देखिएको र प्रहरी अनुसन्धानबाट पनि आत्महत्या नै भएको भन्ने निष्कर्ष निस्केपछि आत्महत्या दुरुत्साहनमा कारबाही हुनुपर्ने माग राख्दै श्रीमान, ससुरा र आमाजुविरुद्ध मुद्दा दर्ता गरिएको हो। माइती पक्षका भनाइ र प्रहरी अनुसन्धानबाट समेत आत्महत्या गर्न बाध्य पारिएको देखिएपछि उनीहरुविरुद्ध प्रहरीले आत्महत्या दुरुत्साहनमा मुद्दा दर्ता गरेको थियो।
एक जना फरार भए पनि श्रीमान र ससुराविरुद्ध प्रहरीले पक्राउ गरेर मुद्दा चलाएको थियो। एक जनालाई भने फरार प्रतिवादी बनाएर अदालतमा मुद्दा पेश भएको थियो। सोही मुद्दामा चितवन जिल्ला अदालतले केही दिन अघि मात्रै ससुरा र श्रीमानलाई १/१ लाख धरौटीमा रिहा गर्न आदेश दिएसँगै यो घटना एकाएक सञ्जालमा तातेको छ।
त्यसपछि नै ससुरा रमेशकुमारले यौन हिंसा गरेको भिडियो सार्वजनिक भएको हो। सविताको माइती पक्षले उनको आत्महत्या नभई हत्या भएको आरोप लगाएका छन्। घटना भएको डेढ महिनापछि हत्या भन्दै पीडित पक्षले बोल्नु र भिडियो सार्वजनिक हुनुले घटनामा 'ट्विस्ट' आएको छ।
‘उहाँहरुको जाहेरी पनि सुरुमा आत्महत्या दुरुत्साहनमै आएको हो। पोष्टमार्टमबाट पनि आत्महत्या नै भन्ने देखिएको हो। हाम्रो अनुसन्धानले पनि आत्महत्या नै गरेको देखिएको छ। उहाँहरुले नेपाली कागजमा समेत आत्महत्या गर्न बाध्य बनाएको हो भनेर कागज गर्नु भएको छ। अहिले आएर किन हत्या भन्नु भयो थाहा भएन’ एसपी अधिकारीले भने।
एनिभर्सरीको भोलिपल्ट मृत्यु
योगेन्द्र र सविताको ७ वर्षअघि मागी विवाह भएको थियो। उनीहरुको पाँच वर्षको छोरा समेत छन्। छोरा जन्मिएको केही समयपछि भने उनीहरुबीच खटपट सुरु भएको थियो। श्रीमानले कुटपिट गर्ने, दु:ख दिने गरेको बहिनी सजनीले बताएकी छिन्। त्यसपछि उनी धेरै जसो माइतीमै बस्न थालेकी थिइन्। पछिल्लो समय लकडाउनको बेला आमाजु भावनाले बोलाएपछि सविता चितवन गएकी थिइन्।
वैशाख ३ गते सविता बैवाहिक जीवनमा बाँधिएको दिन थियो। त्यस दिनका लागि भनेर उनले आफूसँग पाँच हजार रुपैयाँ समेत मागेको बहिनी सजनीले बताएकी छिन्। त्यसको भोलिपल्ट भने सविता झुण्डिएको अवस्थामा मृत फेला परिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
