काठमाडौं– निवर्तमान स्वास्थ्य तथा जनसंख्यामन्त्री हृदयेश त्रिपाठीले नवनियुक्त मन्त्री शेरबहादुर तामाङलाई निजी सचिवालयलाई धेरै छुट दिन नहुने सुझाव दिएका छन्।
स्वास्थ्य तथा जनसंख्या मन्त्रीको रुपमा आफूले संगालेका अनुभव सुनाउँदै त्रिपाठीले नवनियुक्त मन्त्रीलाई निजी सचिवालयलाई धेरै महत्व दिन नहुने सुझाव दिएका हुन्।
आइतबार त्रिपाठीको बिदाई र तामाङको स्वागत गर्न स्वास्थ्य तथा जनसंख्या मन्त्रालयमा आयोजित कार्यक्रममा त्रिपाठीले नवनियुक्त मन्त्री तामाङलाई मन्त्रालयमा रहँदाका अनुभव र भावी दिनमा गर्नुपर्ने कामका विषयमा सुझाव दिए।
कार्यक्रममा मन्त्री त्रिपाठीले सचिवालयलाई धेरै छुट दिन नहुने कुरामा जोड दिए। सचिवालयलाई धरै छुट दिँदा मन्त्रालयका काममा बिचौलिया पस्ने डर हुने त्रिपाठीले अनुभव सुनाए।
'सचिवालयलाई धेरै छुट दिन हुन्न, नत्र बिचौलिया पस्ने डर हुन्छ', कार्यक्रममा उनले भने।
मन्त्री त्रिपाठी आफ्नो कार्यकालमा कोभिड खोप खरिदका विषयमा विवादमा आएका थिए। उनले खोप खरिदका क्रममा बिचौलियाले अवरोध सिर्जना गरेको बताएका भएपनि ती बिचौलियाहरु को हुन् भनेर सार्वजनिक गरेनन्।
आफू विवादमा आएपछि मन्त्री त्रिपाठीले घुमाउरो पारामा प्रधानमन्त्री तहबाट नै यसमा समस्या आइरहेको कुरा सार्वजनिक गरेका थिए। त्यसपछि प्रधानमन्त्री केपी शर्मा ओली र मन्त्री त्रिपाठीबीच तिक्तता आएको बताइएको छ।
कोभिड खोप खरिदका विषयमा बिचौलियाले खेलेका कारण नेपालमा भारतको सेरम इन्स्टिच्युटबाट खरिद गर्ने भनिएको ५० लाख डोज खोप खरिद प्रक्रिया रोकिएको थियो। यस्तै नेपालले रकम भुक्तानी गरिसकेको १० लाख डोज खोप पनि आउन सकेको छैन।
आइतबारको कार्यक्रममा निर्वतमान मन्त्री त्रिपाठीले कामका क्रममा आफूले केही कडा बोलेको पनि स्वीकार गरेका छन्। मातहतका निकायका कर्मचारीसँग अन्य नियतले नभइ कामकै सिलसिलामा कडा बोलेको त्रिपाठीले बताए।
कार्यक्रममा निवर्तमान मन्त्री त्रिपाठीले कोभिड-१९ संकट व्यवस्थापन अध्यादेश पनि मन्त्रालयले प्रस्ताव गरेभन्दा धेरै फरक आएको जानकारी पनि गराए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
