काठमाडौं- शुक्रबार राति जनता समाजवादी पार्टी(जसपा) का र नेकपा एमालेका नेताहरुलाई समावेश गरेर प्रधानमन्त्री केपी शर्मा ओलीले मन्त्रिपरिषद् विस्तार तथा पुनर्गठन गरे।
ओली सरकारमा जसपाको महन्थ ठाकुर-राजेन्द्र महतो पक्षबाट १० जना मन्त्री बनेका छन्। जसको नेतृत्व उपप्रधानसहित सहरी विकास मन्त्रालयको जिम्मेवारी लिएर राजेन्द्र महतोले गरेका छन्।
केपी ओली नेतृत्वको वर्तमान सरकारमा महतो चौंथो बरियतामा रहेका छन्। उनी पहिलो पटक उपप्रधानमन्त्री बनेका हुन्।
शपथपछि उनले शुक्रबार राति नै शहरी विकास मन्त्रालयमा पदभार ग्रहण गरे। त्यसक्रममा उनले सरकारमा बसेर पार्टीको अजेण्डा कार्यान्वयन गर्ने र आन्दोलनको तयारी गर्ने बताएका थिए। उपप्रधानमन्त्री महतोले बहुल राष्ट्रिय राज्यको स्थापनाको लागि राष्ट्रिय मुक्ति आन्दोलनको तयारी गर्ने भनेको भन्दै आलोचना भइरहेको छ।
२०४६ सालपछि राजनीतिमा जोडिएका महतो २०४८ सालको निर्वाचनपछि भने निरन्तर चुनावी प्रतिस्पर्धामा सामेल भएका छन्। तर २०५६, २०६४ र २०७४ सालको निर्वाचनमा मात्रै उनी विजयी भएका हुन्। अघिल्ला निर्वाचनमा सर्लाहीबाट उम्मेदवार हुने गरेका महतो २०७४ सालमा भने धनुषा पुगेका थिए।
महतो १० वर्षपछि मन्त्री बनेका छन्। उनी अन्तिम पटक २०६८ भदौमा गठित डा बाबुराम भट्टराई नेतृत्वको सरकारमा सहभागी थिए। त्यसअघि उनी २०६६ जेठमा गठित माधवकुमार नेपाल नेतृत्वको सरकार, २०६५ साउनमा गठित पुष्पकलम दाहाल प्रचण्ड नेतृत्वको सरकार र २०६४ चैतमा पुनर्गठित गिरिजाप्रसाद कोइरालाको नेतृत्वको सरकारमा सहभागी भएका थिए।
पाँचौँ पटक मन्त्री बनेका महतोले तीन वटा मन्त्रालय सम्हाल्ने अवसर पाएका छन्। कोइराला नेतृत्वको सरकारमा उनी वाणिज्य तथा आपूर्ति मन्त्री भएका थिए। त्यसपछि प्रचण्ड र नेपाल नेतृत्वको सरकारमा पनि उनले सोही मन्त्रालयको जिम्मेवारी पाए।
भट्टराई नेतृत्वको सरकारमा भने उनले स्वास्थ्य तथा जनसंख्या मन्त्रालयको जिम्मेवारी पाए। शुक्रबार उनले केपी ओली नेतृत्वको सरकारमा सहरी विकास मन्त्रालयको जिम्मेवारी लिएका छन्।
यस्तो छ महतोको सत्ता यात्रा श्रृंखला
गिरिजाप्रसाद कोइराला नेतृत्वको सरकारमा - वाणिज्य तथा आपूर्ति
पुष्पकमल दाहाल प्रचण्ड नेतृत्वको सरकारमा - वाणिज्य तथा आपूर्ति
माधवकुमार नेपाल नेतृत्वको सरकारमा - वाणिज्य तथा आपूर्ति
डा बाबुराम भट्टराई नेतृत्वको सरकारमा - स्वास्थ्य तथा जनसंख्या
केपी शर्मा ओली नेतृत्वको सरकारमा – उपप्रधान तथा शहरी विकास
तस्वीर- रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
