काठमाडौं– कार्यस्थलमा रहेका स्वास्थ्यकर्मीलाई आक्रमण गरे ४ वर्षसम्म कैद हुनसक्ने प्रावधानसहित सरकारले अध्यादेश ल्याउन लागेको छ।
स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ लाई संशोधन गर्न ल्याउन लागिएको अध्यादेशमा स्वास्थ्यकर्मीलाई धम्की दिएमा समेत कडा कारबाही हुने प्रावधान राखिएको छ।
कोरोना भाइरस संक्रमणको महामारीका बीच ज्यान जोखिममा राखेर फ्रन्टलाइनमा खटिएका स्वास्थ्यकर्मीमाथि नै आक्रमणका घटना बढेपछि सरोकारवालाहरुले अध्यादेशमार्फत कडा कानून ल्याउन सरकारको ध्यानाकर्षण गराएका थिए ।
विभन्न अभियान्ता र सरोकारवालाहरुको मागअनुसार सरकारले स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (मूल ऐन) लाई संधोन गर्न अध्यादेश ल्याउने तयारी गरेको हो। अध्यादेशको मस्यौदा मन्त्रिपरिषद्मा पेस भइसकेको जनाइएको छ।
स्वास्थ्य तथा जनसंख्या मन्त्रालयले ऐन संशोधन गर्नका ल्याउन अध्यादेशको मस्यौदा तयार पारी प्रधानमन्त्री तथा मन्त्रिपरिषद्को कार्यालयमा पठाएको हो।
हाल प्रधानमन्त्री तथा मन्त्रिपरिषद्को कार्यालयको मन्त्रिपरिषद बैठक शाखामा अध्ययनको क्रममा रहेको भनिएको मस्यौदामा स्वास्थ्यकर्मी र स्वास्थ्य संस्थामा आक्रमण गर्नेलाई ४ वर्षसम्म जेल सजाय गर्न सकिने व्यवस्थाको प्रस्ताव गरिएको छ।
मूल ऐनको दफा १५ मा रहेको 'सजाय' सम्बन्धी व्यवस्थामा परिवर्तन गरी स्वास्थ्यकर्मी वा स्वास्थ्यसंस्थामा कार्यरत कर्मचारीलाई घेराउ गर्ने, हातपात गर्ने वा शारीरिक रुपमा आधात पुर्याउने तथा स्वास्थ्य संस्थामा तालाबन्दी, तोडफोड, आगजनी वा घेराउ गर्नेलाई २ लाख रुपैयाँसम्म जरिवाना वा ४ वर्षसम्म कैद वा दुवै सजाय हुने व्यवस्था गरिएको छ।
यस्तै, स्वास्थ्यकर्मी वा स्वास्थ्य संस्थामा कार्यरत कर्मचारीलाई कुनै किसिमको धम्की दिने, मानसिक तनाव दिने वा अपमानजनक व्यवहार गर्ने गरेमा ५० हजार रुपैयाँसम्म जरिवाना वा एकवर्षसम्म कैद वा दुवै सजाय हुने व्यवस्था अध्यादेशको मस्यौदामा प्रस्ताव गरिएको छ।
कुनै किसिमले स्वास्थ्यकर्मी वा स्वास्थ्यसंस्थामा उपचारका लागि आएका वा उपचाररत बिरामीको उपचार गर्ने कार्यमा बाधा पुर्याउने कार्य गरेमा २० हजार रुपैयाँसम्म जरिवा वा तीन महिनासम्म कैद वा दुवै सजाय हुने प्रस्ताव पनि अध्यादेशको मस्यौदामा गरिएको छ।
ऐनले बर्जित गरेका कसूर गर्ने व्यक्तिलाई अदालतले पुर्पक्षका लागि थुनामा पठाउने व्यवस्था समेत अध्यादेशको मस्यौदामा प्रस्ताव गरिएको छ।
विभिन्न अस्पतालमा उपचाररत बिरामीको मृत्यु भएमा चिकित्सक तथा डाक्टरको गल्ती भएको भन्दै बिरामीपक्षका व्यक्तिहरुले अस्पतालमा तोडफोड गर्ने तथा चिकित्सक तथा स्वास्थ्यकर्मी माथि आक्रमण गर्ने घटनाहरु भइरहेका छन्।
महामारीको समयमा समेत कोरोना संक्रमतिको उपचारको क्रममा मृत्यु भएपछि भेरी अस्पतालमा गत जेठ १३ गते स्वास्थ्यकर्मीमाथि आक्रमण भएको थियो।
भेरी अस्पतालमा स्वास्थ्यकर्मी माथि आक्रमण भएपछि नेपाल चिकित्सक संघ लगाएत चिकित्सक तथा स्वास्थ्यकर्मीहरुको विभिन्न संघसंस्था तथा संगठनले स्वास्थ्यकर्मी तथा स्वास्थ्यसंस्थाको सुरक्षा सम्बन्धी ऐन, २०६६ लाई संशोधन गरी अध्यादेश ल्याउन समेत माग गरेका थिए।
उनीहरुले कार्यस्थलमा चिकित्सक तथा स्वास्थ्यकर्मीमाथि आक्रमण गर्नेलाई गैर–जमानती कानुनको व्यवस्था गर्न समेत माग गर्दै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787397239.png)
-1786602170.png)
-1786513116.png)
