काठमाडौं– गणतन्त्र दिवस २०७८ को अवसरमा यसपटक ४३० जना कैदीले कैद सजाय माफी मिनाहा पाएका छन्।
सरकारको सिफारिसका आधारमा राष्ट्रपति विद्यादेवी भण्डारीले ४३० जनाको कैद सजाय माफी मिनाहा गरेकी हुन्।
तर, राष्ट्रपतिबाट कैद सजाय माफी पाउनेमा जघन्य अपराध (कर्तव्य ज्यान) बहुविवाह, हातहतियार तथा खरखजाना लगायतमा दोषी ठहर भएका व्यक्ति पनि छन्।
फौजदारी कसूर (सजाय निर्धारण तथा कार्यान्वयन) ऐन, २०७४ को दफा ३७ मा कैद कट्टा हुनसक्ने व्यवस्था गरिएको छ। उक्त दफाको कार्यान्वयनका लागि बनाइएको ‘फौजदारी कसूर (कैद कट्टा) नियमावली, २०७६ मा बहुविवाह गरेका व्यक्तिको कैद कट्टा गर्न नसकिने व्यवस्था गरिएको छ।
तर, यसपटक राष्ट्रपतिबाट कैद मिनाहा पाउनेमा ४३ जना मात्रै बहुविवाहको मुद्दामा दोषी ठहर भएका व्यक्ति छन्। ४३ जनामध्ये, २ जना बहुविवाह र बालविवाह गरेको मुद्दामा दोषी ठहर भएका व्यक्ति छन्।
यस्तै, कर्तव्य ज्यानको मुद्दामा दोषी ठहर भएका १०९ जनाले कैद मिनाहा (माफी) पाएका छन्। ज्यान मार्ने उद्योगको कसूरमा दोषी ठहर भएका २१ जनाले पनि कैद मिनाहा पाएका छन्।
फौजदारी कसूर (सजाय निर्धारण तथा कार्यान्वयन) ऐन, २०७४ को दफा ३७ मा कसूरदारको कैदमा रहँदा चालचलनमा सुधार आएमा र कसूरदारले ५० प्रतिशत कैद सजाय भुक्तान गरेमा बाँकी कैद मिनाहा गर्न सकिने व्यवस्था छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
