काठमाडौं– बागमती प्रदेशको रिक्त राष्ट्रिय सभा सदस्यको उपचुनाव आज (बिहीबार) हुँदै छ। राष्ट्रिय सभा सदस्य रामबहादुर थापा ‘बादल’लाई माओवादी केन्द्रले दल त्यागको अभियोगमा कारबाही गरेपछि रिक्त भएको पदका लागि उपचुनाव हुन लागेको हो ।
प्रदेश राजधानी हेटौंडामा हुने निर्वाचनमा बिहान ९ देखि अपराह्न ३ बजेसम्म मतदान गर्न सकिने निर्वाचन आयोगले जनाएको छ।
उपचुनावमा एमालेका तर्फबाट गृहमन्त्रीसमेत रहेका रामबहादुर थापा, कांग्रेस र माओवादी केन्द्रको समर्थनमा खिमलाल देवकोटा तथा नेपाल मजदुर किसान पार्टीबाट कृष्णगोपाल तामाङ चुनावी मैदानमा उत्रिएका छन्।
आजको उपचुनावमा बागमती प्रदेशसभा सदस्य १ सय १० र प्रदेशअन्तर्गतका गाउँपालिका अध्यक्ष र उपाध्यक्ष तथा नगरपालिकाका प्रमुख र उपप्रमुख २ सय ३८ गरी ३ सय ४८ मतदाता कायम रहेको आयोगले जनाएको छ।
हेटौँडा नगरपालिका–४ को भुटनदेवी माध्यमिक विद्यालयमा कायम गरिएको तीन केन्द्रमा मतदान हुने आयोगले जानकारी दिएको छ।
यसअघिका विभिन्न निर्वाचनमा जारी भएका मतदाता परिचयपत्र, नागरिकता वा राष्ट्रिय परिचयपत्रलगायत कागजात देखाएर मतदान गर्न सकिने व्यवस्था गरिएको आयोगको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
