काठमाडौं- नेकपा (एमाले)को विवाद समाधान गर्न गठित कार्यदलको बैठक बिहीबारसम्मका लागि स्थगित भएको छ। बुधबार साँझ ७ बजे बस्ने तय भएको बैठक बिहीबार साँझ ५ बजे बस्नेगरी स्थगित भएको हो।
कार्यदल सदस्य शंकर पोखरेल बुटवलबाट आउनु पर्ने तथा बिष्णु पौडेल बजेटमा व्यस्त भएको भन्दै आजको बैठक बेलुका ७ बजेका लागि तय गरिएकाे थियो । तर, बैठक बस्दै नबसी स्थगित भएको छ।
ओली पक्षबाट कार्यदलकाे नेतृत्व गरेका सुवास नेम्वाङले कार्यदलका सबै सदस्य जुट्न नसक्ने अवस्था भएकाले बैठक भाेलिसम्मका लागि स्थगित भएको बताए।
बुधबारकाे बैठकमा कार्यदलको कार्यक्षेत्र, कार्यविधि र बिहीबार बागमती प्रदेशमा हुने राष्ट्रिय सभाको उपनिर्वाचनका विषयमा छलफल हुने भनिएको थियो।तर, शीर्ष तहबाट उपनिर्वाचनका विषयमा ठोस सहमति हुन नसकेपछि कार्यदलको बैठक बस्न नसकेको कार्यदलका अर्का एक सदस्यले बताए।
यसअघि मंगलबार प्रधानमन्त्री तथा मन्त्रिपरिषद् कार्यालय सिंहदरबारमा बसेको कार्यदलको बैठकले एकताका लागि भन्दै आचारसंहिता निर्माण गरेको थियो।
'हामीले हिजोको बैठकमा एकता प्रक्रिया चलिरहेकाले अविश्वास,असहयोग र असमझदारी बढाउने क्रियाकलाप रोक्न आव्हान गर्ने निर्णय गरेका थियौं। पार्टीमा देखिएका समस्यालाई यथोचित रुपमा समाधान गर्दै पार्टीपंक्तिलाई एकताबद्ध रुपमा अघि बढाउन सबैसँग सद्भावका लागि आग्रह गरेकका थियौं' ती सदस्यले भने, 'यसको अर्थ भोलिको निर्वाचनका लागि शीर्ष तहबाट पार्टीको कुन उम्मेद्वार भन्ने सहमति होस् भन्ने थियो। तर, उहाँहरुबीच कुनै सहमति भएन। त्यसकारण आज हामी बस्नुको कुनै अर्थ रहेन।'
बुधबार हुने निर्वाचनमा एमालेको तर्फबाट गृहमन्त्री रामबहादुर थापा 'बादल' र एमालेकाे माधवकुमार नेपाल पक्षको सहमतिमा विपक्षी गठबन्धनबाट खिमलाल देवकोटा उम्मेद्वार छन्।
कार्यदलले अब बिहीबारसम्म शून्य समय मानेर त्यसपछि काम गर्ने तयारी गरेको छ। कार्यदललाई यसअघि प्रतिवेदन पेश गर्न तीन दिनको समय दिइएको थियो। जुन समय बुधबार सकिँदैछ।
'खासगरी राष्ट्रिय सभाको निर्वाचनका सन्दर्भमा यसअघि नै दुवै तर्फबाट निर्णय भइसकेको र कार्यदलको कार्यक्षेत्र हो/होइन भन्ने प्रष्ट नपारिएकाले अब भोलिसम्म शून्य समय मानेर त्यसपछि काम गर्ने कि भन्ने कुरा पनि भइरहेको छ। कार्यदलमा आपसी सहमति गरेर अघि बढ्छौं', ती सदस्यले भने।
एमाले अध्यक्ष केपी शर्मा ओली र वरिष्ठ नेता माधवकुमार नेपालबीच गत आइतबार सिंहदरबारमा भएको वार्तापछि कार्यदल बनाइएको थियो। कार्यदलमा दुवैपक्षका पाँच/पाँच जना नेता रहेका छन्। ओली पक्षबाट कार्यदलको नेतृत्व नेम्वाङ र नेपाल पक्षको नेतृत्व भीम रावलले गरेका छन्।
कार्यदलमा ओली पक्षबाट नेम्वाङसहित विष्णु पौडेल, शंकर पोखरेल, प्रदीप ज्ञवाली र विष्णु रिमाल रहेका छन्। यस्तै, नेपाल पक्षबाट रावलसँगै सुरेन्द्र पाण्डे, घनश्याम भुसाल, गोकर्ण विष्ट र रघु पन्त रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
