पृथ्ठभूमिमा कास्की जिल्ला अदालत र घेरा (इन्सर्ट)मा आगोले जलेर घाइते भएका बालक उपचाररत अवस्थामा । तस्वीर सौजन्य– उज्जवल विक्रम थापा
काठमाडौं– कास्की जिल्ला अदालतमा आइतबारसम्म दुई बालकको एउटा मुद्दाको सुनुवाइ चलिरहेको थियो। पक्ष-विपक्षमा रहेका बालकको उक्त केसका अन्तर–कुन्तर केलाउने प्रयास गरिरहेका थिए, न्यायाधीश श्रीकृष्ण भट्टराई।
घटनाबारे अविश्वास गरौं, एक बालक पीडित छन्। विश्वास गरौं, अर्को बालकले यत्रो घटना कसरी गर्यो? मथिंगलमा यही प्रश्न घुमिरहेपछि न्यायाधीश भट्टराईले फेरि पीडक भनिएका बालकलाई घटनाबारे सोध्छन्। घटना आफूबाटै भएको ती बालकले स्वीकार्छन्। तर, अन्जानमा भएको घटना वा भवितव्यतर्फ संकेत गर्छन्। भवितव्य भए पनि योजनाबद्ध भए पनि आखिर तत्काल जुटेका प्रमाण र बयानलाई आधार मान्दै पीडक भनिएका बालक सुधार गृह चलान हुन्छन्। सुधार गृह नै जानुपर्ने गरी यी बालकले के बिगार गरे? त्यसबारे जान्न करिब महिना दिन अघि फर्किनु पर्छ।
घटना यही वैशाख ११ गतेको हो। पृथ्वीचोक बसपार्कमा ना ४ ख ३७९२ नम्बरको बस पार्किङ गरेर राखिएको थियो। साँझ अन्दाजी पौने ७ बजेतिर बालकद्वय सुमित नेपाली र सुदीप परियार कुराकानी गर्दै बसभित्र बसिरहेका थिए। प्रहरीका अनुसार त्यही बेलामा बुद्ध परियार, करण नेपाली र अहिले सुधार गृह चलान भएका समीर (नाम परिवर्तन) उक्त बसभित्र छिरे। बालक समीरले १२ वर्षका अर्का बालक सुदिप परियारसँग पैसा मागे। सुदिपले पैसा नदिएपछि समीरले लात्ती, मुक्काले हिर्काए। त्यसपछि पेट्रोल छर्किएर सुदीपको शरीरमा समीरले आगो लगाए। जसकारण सुदीको कम्मर, तिघ्रा, पेट, हिप लगायत शरीरको विभिन्न भाग जल्यो। आगोले बस समेत जलेको प्रहरीले उठाएको घटनास्थल मुचुल्कामा उल्लेख छ।
आफ्नो १२ वर्षका छोरालाई पेट्रोल छर्किएर ज्यान मार्ने हिसाबले आगो लगाएको भन्दै सुदिपका बाबु सुलबहादुर दमैले प्रहरीमा जाहेरी दिए। सुलबहादुरको जाहेरीपछि कास्की प्रहरीले पेट्रोल छर्किएर आगो लगाएको आरोपमा बालक समीरलाई पक्राउ गर्यो।
समीर, सुदीप परियार, सुमित परियार, बुद्ध परियार, करण नेपाली पोखराको एउटै ठाउँ पृथ्वीचोक कृष्णटोलमा बस्ने मिल्ने साथी हुन्। सुदिप र सुमित बसभित्र बसिररहेको देखेपछि मिनरल वाटरको बोतलमा पेट्रोल लिएर आफू बसभित्र प्रवेश गरेको समीरले प्रहरीसमक्ष बयान दिएका छन्। ‘सुदिप र सुमितलाई आधा आधा पेट्रोल बाँडिदिए। उनीहरु दुबै जना पेट्रोल सुँध्न थाले। मैले पेट्रोल बाँड्ने क्रममा पोखिएर सुदिपको कपडामा लाग्यो। बसमा पनि पोखियो,’ प्रहरीले सरकारी वकिलसमक्ष बुझाएको अनुसन्धान प्रतिवेदनमा समीरले दिएको साबिती बयानमा उल्लेख छ, ‘पेट्रोल दिएपछि ५० रुपैयाँ माग्दा १० रुपैयाँ मात्रै दिए। त्यसपछि मलाई रिस उठ्यो। कुटपिट गर्दै सुदिपको शरीरमा पेट्रोल छर्केर आगो लगाइदिएँ।’
आगो लागेपछि घाइते भएका सुदिपको सुरुमा गण्डकी अस्पताल पोखरामा उपचार भएको थियो। त्यसपछि अहिले उनको काठमाडौंस्थित सुष्मा कोइराला मेमोरियल अस्पतालमा उपचार भइरहेको छ। उनको मेडिकल रिपोर्टमा शरीरको ३५ प्रतिशत भाग जलेको उल्लेख छ।
बालकलाई ज्यान मार्ने उद्योगमा मुद्दा दर्ता भएर अनुसन्धान भएपछि उनको वास्तविक उमेर कति रहेछ, के कारण ज्यान मार्ने उद्योगसम्मको हर्कत ती बालकले गरे भन्नेबारे अनुसन्धान भएको थियो। सो क्रममा श्री सहारा बाल आधारभूत विद्यालय पोखरा, शिवटोलको रेकर्ड अनुसार आरोपित समीरको जन्म २०६५ वैशाख ३१ रहेको पाइयो। अदालतले आरोपित भनेका बालक समीरसँग पनि घटनाबारे सोधपुछ गर्यो। समीरले प्रहरीमा दिएको साबिती बयानभन्दा केही फरक बयान अदालतमा बालकले दिएको न्यायाधीश भट्टराईले बताए। अदालतमा दिएको बयानमा समीरले सुदिप र समित बसभित्र बसेर पहिल्यै पेट्रोल सुँघिरहेका बेला आफू पुगेको बताएका छन्। ‘पेट्रोल सुदिपको कपडा र बसमा पोखिएको र मैले चुरोट सल्काउँदा चुरोटको ठुटोले भेटेर आगो लागेको हो,’ अदालत समक्ष बयानका क्रममा समीरले भनेका छन्।
आफूलाई समेत आगोले पोलेको र घाइतेलाई समेत आफैंले अस्पताल पुर्याएकाले ज्यान मार्ने उद्योग नभएको बालक समीरको भनाइ छ।
समीरले अदालतमा इन्कारी बयान दिए पनि प्रहरीमा घटनाबारे स्वीकार गरेको, ५० रुपैयाँ माग्दा १० मात्रै दिएर ४० रुपैयाँ पछि दिउँला भनेपछि विवाद भएको देखिएको, समीरसँगै बसभित्र प्रवेश गरेका अन्य बालकहरु (सूर्यबहादुर, बुद्ध, सरस्वती विक) ले पनि समीरले नै आगो लगाएको भन्ने बयान दिएको, किटानी जाहेरी, घटनास्थल मुचुल्का लगायतबाट तत्काल समीर निर्दोष हुन् भन्ने सक्ने अवस्था नरहेको भन्दै न्यायाधीश भट्टराईको इजलासले आइतबार उनलाई सुधार गृह पठाउने आदेश दिएको छ।
बालबालिका सम्बन्धी ऐन २०७५ को दफा २४ को उपदफा (२) बमोजिम उनलाई आइतबार बाल सुधार गृह सराङकोट पठाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
