शपथका क्रममा ‘त्यो पर्दैन’भन्न मिल्दैन– बाबुराम भट्टराई

राजनीति

नेपाल लाइभ शनिबार, जेठ १, २०७८ ०९:२०

काठमाडौं– जनता समाजवादी पार्टी(जसपा)का संघीय परिषद् अध्यक्ष डा बाबुराम भट्टराईले प्रधानमन्त्री केपी शर्मा ओलीले शपथ ग्रहरणका क्रममा गरेको आचरण पद अनुकुल नभएको टिप्पणी गरेका छन्।

शुक्रबार केपी शर्मा ओलीले प्रधानमन्त्रीको रुपमा शपथ लिने क्रममा केही शब्द पर्दैन भन्दै भन्न अस्वीकार गरेका थिए।
‘म केपी शर्मा ओली, मुलुक र जनताप्रति पूर्ण वफादार रही सत्य निष्ठापूर्वक यो प्रतिज्ञा गर्छु कि’ भनेर राष्ट्रपति विद्या भण्डारीले शपथ गराउँदा ओलीले ‘यो प्रतिज्ञा गर्छु कि’ भन्ने मात्र उच्चारण गरेका थिए।

प्रधानमन्त्री ओलीले छुटाएको उक्त वाक्यांश राष्ट्रपति भण्डारीले दोहोर्‍याएर वाचन गरेकी थिइन् तर ओलीले ‘यो पर्दैन’ भन्दै शपथ अगाडि बढाए। उनको त्यस्तो जवाफ सुनेर राष्ट्रपति हाँसेर टारेकी थिइन्। जुन भिडियो अहिले सामाजिक सञ्जालमा भाइरल बनेको छ।

पूर्व प्रधानमन्त्रीसमेत रहेका भट्टराईले प्रतिज्ञा गर्छु भन्ने पदावली शपथ ग्रहणको मुख्य अंश भएको भन्दै ‘त्यो पर्दैन’ भन्न नमिल्ने र राष्ट्राध्यक्षलाई त्यसरी अवज्ञा गर्न नमिल्ने बताएका हुन्।

सामाजिक सञ्जाल ट्वीटरमा उनले लेखेका छन्,‘ओलीले शपथग्रहणको क्रममा गरेको आचरण गरिमामय पद अनुकुल भएन।पहिलो,’प्रतिज्ञा गर्छु’भन्ने पदावली शपथग्रहणको मुख्य अंश हो ‘त्यो पर्दैन’भन्न मिल्दैन१दोश्रो,राष्ट्राध्यक्षलाई त्यसरी अवज्ञा गर्न मिल्दैन!’ उनले भनेका छन्।

त्यस्तै सर्वोच्च अदालतका पूर्वन्यायाधीश बलराम केसीले शपथ एक निश्चित फर्म्याटमा लिने भएकाले यसलाई छुटाउन नमिल्ने बताए। यसरी आफूअनुकुल मात्र पढ्ने, मन लागेका शब्दमात्र पढ्ने शपथमा नहुने, शपथ भनेको एउटा प्रतिज्ञासमेत भएकाले यसरी कुनै शब्द छुटाउने वा खेलाची गर्ने नभएको उनको टिप्पणी छ।

पूर्वउपराष्ट्रपति परमानन्द झाको मुद्दामा आफूसमेतको इजलासले पुनस् शपथ गराउन फैसला नै सुनाएको उनले सम्झाए। नेपालमा मात्र नभएर अमेरिकाका पूर्वराष्ट्रपति बराक ओबामाले समेत एउटा शब्द छुट्दा पुनस् सर्वोच्च अदालतका पूर्वप्रधानन्यायाधीशलाई बोलाएर दोस्रोपटक शपथ लिएको उनले बताए।

नेपाल बारका पूर्वमहासचिव एवं अधिवक्ता सुनिलकुमार पोखरेलले सामाजिक सञ्जाल ट्विटरमै प्रधानमन्त्री केपी शर्मा ओलीलाई पुनस् शपथ लिन सुझाव दिएका छन्। ‘प्रधानमन्त्रीज्यु संविधानप्रतिको आस्था जीवित राख्न भोलि फेरि शपथ लिनुस्,’ पोखरेलले लेखेका छन्, ‘अमेरिकी राष्ट्रपति बराक ओबामाले पनि शपथमा त्रुटि भएका कारण दोहोर्यािएर शपथ लिएको इतिहास छ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

एकीकृत समाजवादीले नेताहरूको जिम्मेवारीको टुङ्ग्यायो

म्याद थपका लागि रविलाई अदालत उपस्थित गराइयो

तोलामै एक लाख ६७ हजार नाघ्यो सुनको मूल्य