काठमाडौं- दूरसञ्चार सेवा प्रदायक कम्पनी नेपाल टेलिकमको आय तथा नाफा दुवैमा कमी आएको छ। नेपाल टेलिकमले दिएको जनाकारी अनुसार चालु आर्थिक वर्ष २०७७/७८को तृतीय त्रैमासिकसम्मको खुद मुनाफा ५ अर्ब ८८ करोड ४४ लाख ७१ हजार ९ सय ९ रुपैयाँ रहेको छ।
तर, गत वर्षको सोही अवधिमा टेलिकमको खुद मुनाफा ७ अब ५६ करोड ५५ लाख १५ हजार ३ सय ८० रहेको थियो। यसैगरी टेलिकमको आयमा पनि कमी आएको छ। गत आर्थिक वर्षको चैत मसान्तसम्म अर्थात् तृतीय त्रैमासिकसम्मको कुल आय ३२ अर्ब २७ करोड २३ लाख २३ हजार ४६ रुपैयाँ रहेको चालु आर्थिकको सोही अवधिमा कुल आय ३१ अर्ब ६७ करोड ३७ लाख ७३ हजार ९ सय ३७ रुपैयाँ मात्रै भएको छ।
यसैगरी, चालु आवको प्रथम र द्वितीय त्रैमासिकमा कुल सेवा वापतको आय क्रमशः ८ अर्ब ६३ करोड ५३ लाख ४० हजार ४१ रुपैयाँ र ९ अर्ब ८ करोड ९५ लाख ७३ हजार ४ सय ६२ रहेकोमा चालु आवको तृतीय त्रैमासिक अवधिमा कुल सेवा वापतको आय द्वितीय त्रैमासिकको भन्दा ६३ करोड ६८ लाख ६५ हजार ९ सय ९७ रुपैयाँ (७ प्रतिशत) ले वृद्धि भई ९ अर्ब ७२ करोड ६४ लाख ३९ हजार ४ सय ५९ रुपैयाँ पुगेको छ।
साथै चालु आवको प्रथम र द्वितीय त्रैमासिकमा खुद मुनाफा क्रमशः १ अर्ब ५१ करोड ७७ लाख ६९ हजार ३ सय ८१ रुपैयाँ र १ अर्ब ७७ करोड १६ लाख २५ हजार ७९ रुपैयाँ रहेकामा चालु आवको तृतीय त्रैमासिक अवधिमा खुद मुनाफा द्वितीय त्रैमासिकको भन्दा ८२ करोड ३४ लाख ५२ हजार ३ सय ७० ले वृद्धि भई २ अर्ब ५९ करोड ५० लाख ७७ हजार ४ सय ४९ रुपैयाँ रहेको छ।
यसैगरी, गत आवको तृतीय त्रैमासिकसम्मको कुल सेवा वापतको आय २६ अर्ब ८३ करोड ६६ लाख ४५ हजार २ सय ७२ रुपैयाँ रहेकोमा चालु आवको सोही अवधिमा कुल सेवा वापतको आयमा २.२९ प्रतिशतले वृद्धि भई २७ अर्ब ४५ करोड १३ लाख ५२ हजार ९ सय ६१ रुपैयाँ पुगेका छ।
कमी आउनुका प्रमुख कारणहरु :
- कोभिड महामारीको प्रत्यक्ष असरका कारण विश्वव्यापी रुपमा व्यापार व्यवसायमा कमी आएको।
- बैंक तथा वित्तीय संस्थाको मुद्दति निक्षेप तथा कल निक्षेपमा प्राप्त हुने ब्याजदर अघिल्लो वर्षको तुलनामा चालु आवमा घट्न गएको हुँदा ब्याज आम्दानीमा कमी आएको।
- कोभिड महामारीलाई लक्षित गरी कम्पनीबाट ग्राहकवर्गको सुविधाका लागि निकै कम मूल्यमा डाटा प्याकेज उपलब्ध गरिएको हुँदा अघिल्लो वर्षको तुलनामा डेटाको खपत बढेतापनि राजश्व आशातित रुपमा वृद्धि हुने अवस्था नरहेको।
- कोभिड महामारी र अन्तर्राष्ट्रिय यात्रामा लागू भएको प्रतिबन्धका कारणले अन्तर्राष्ट्रिय रोमिङ सेवामा अभुतपूर्व गिरावट आएको तथा ओटीटीको बढ्दो प्रयोगले अन्तर्राष्ट्रिय अन्तरआवद्धता सेवामा भारी गिरावट आएको।
- समीक्षा अवधिमा बाह्य श्रोतबाट प्राप्त जनशक्तिको न्यूनतम ज्यालादरमा भएको वृद्धि, मर्मत सम्भार खर्चमा भएको वृद्धि, विदेशी मुद्रा सटही दरमा आएको परिवर्तन तथा फोरजी/ एफटीटीएच जस्ता नवीन प्रविधि जडान गरिएकोले ह्रासकट्टीमा भएको वृद्धि आदिका कारणले व्ययभार बढ्न गई मुनाफामा असर परेको।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769576758.png)
-1764146706.png)
