काठमाडाैं- कर बुझाउने म्याद बढाउन अटोमोबाइल व्यवसायीहरूले माग गरेका छन्। अटोमोबाइल व्यवसायीहरूको संगठन नाडा अटोमोबाइल्स एसोसिएसन अफ नेपालले सोमबार विज्ञप्ति जारी गर्दै यस्तो माग गरेको हो।
कोरोना भाइरसको संक्रमण नियन्त्रणका लागि सरकारले जारी गरेको निषेधाज्ञाका कारण यही वैशाख २५ गतेभित्र बुझाइसक्नुपर्ने मूल्य अभिवृद्धि कर विवरण तथा कर रकम बुझाउन सम्भव नहुने एसोसिएसनको भनाइ छ। एसोसिएसनले निषेधाज्ञा खुलेको एक हप्ताभित्र कर बुझाउने व्यवस्था गर्न सरकारसँग माग गरेको छ।
‘हाल सरकारले नयाँ भेरियण्टको कोरोना बढदो क्रममा रहेको सन्दर्भमा आमजनताको सुरक्षाका लागि राजधानीमा निषेधाज्ञा लागू गरेकोले व्यवसायीहरूले आन्तरिक राजस्व विभागमा मूल्य अभिवृद्धि कर विवरण एवं कर रकम बुझाउन सक्ने अवस्था नरहेको र स्वास्थ्य रक्षाको दृष्ट्रिकोणले पनि व्यवसायीहरू आफ्नो कार्यालयमा जानसक्ने अवस्था पनि नरहेकोले यही २०७८ साल वैशाख महिनाको २५ गतेसम्म बुझाउनुपर्ने म्याद सरकारले निषेधाज्ञा खोलेको मितिबाट एक हप्तासम्म कर तथा अन्य आवश्यक कागजातहरू बुझाउन सकिने व्यवस्थाका लागि सरकारसँग हार्दिक अनुरोध गर्दछ,’ एसोसिएसनका अध्यक्ष कृष्णप्रसाद दुलालद्वारा जारी विज्ञप्तिमा उल्लेख छ।
साथै, आफना अटोमोबाइल वर्कसपहरूमा रहेका अक्सिजन सिलिण्डरहरू अक्सिजन निर्माण उद्योगमा बुझाएर महामारीमा सहयोग गरिदिनसमेत एसोसिएसनले अटोमोबाइल व्यवसायीहरूलाई अनुरोध गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
