तस्बिर साैजन्य: गोक्यो ट्रेक्स एण्ड एक्सपिडिसन प्रालि।
काठमाडाैं- नेपग्याजम कमेडी समूहले सगरमाथास्थित कालापत्थरमा पुगेर 'स्ट्यान्डअप कमेडी' प्रस्तुत गर्ने भएको छ। हास्यव्यङ्ग्यको ठाडो शैलीलाई समातेर नेपाली युवापुस्तामाझ सर्वप्रिय बनेको यो समूहले 'गिनिज बुक अफ वर्ल्ड रेकर्ड' मा कीर्तिमान कायम गराउने उद्देश्यका साथ प्रस्तुति दिन लागेको हो।
'जमिनमा सर्वाधिक उचाइको स्ट्याण्डअप कमेडी शो' शीर्षकमा विश्व कीर्तिमान कायम गर्ने लक्ष्यका साथ आयोजना गर्न लागिएको आयोजकले जानकारी दिएको छ। कार्यक्रम यही वैशाख २० गते (मे ३) का दिन कालापत्थरमा हुनेछ।
यसअघि यही विधामा इटालियन नागरिक पाउलो फ्रानसेस्चिनीले २५ अप्रिल २०१९ मा सगरमाथा आधारशिविर (पाँच हजार २७० मिटर)मा 'स्ट्यान्डअप कमेडी' गरेर गिनिज बुक अफ वर्ल्ड रेकर्डमा नाम लेखाएका थिए।
नेपग्याजमले पाउलोको यो रेकर्ड तोड्न कालापत्थरको पाँच हजार ६४३ मिटर उचाइमा स्ट्यान्डअप कमेडी प्रस्तुत गर्न लागेको हो। त्यसका लागि आफ्ना दुई स्टयाण्डअप कमेडियनलाई प्रस्तुत गर्ने आयोजकको भनाइ छ। कमेडी प्रस्तुतिका लागि नेपग्याजमले गिनिज बुक अफ वर्ल्ड रेकर्डबाट अनुमतिसमेत पाइसकेको नेपग्याजमका संस्थापक निर्देशक शरद श्रेष्ठले बताए।
'नेपग्याजमका संस्थापक कलाकारद्वय उमेरकुमार गौतम (यूकेजी) र लेखमणि त्रिताल (रमेश अंकलको छोरो)ले स्ट्याण्डअप कमेडी प्रस्तुत गर्ने छन्। उनीहरुले स्वस्थ मनोरञ्जनात्मक सामग्री समेटिएको ३०-३० मिनेटको दुईवटा स्ट्याण्डअप कमेडी प्रस्तुत गर्ने कार्यक्रम रहेको छ,' उनले भने।
‘प्रदूषणरहित समाजको परिकल्पना, हर अनुहारमा मुस्कान नेपग्याजमको चाहना’ नारासहित नेपग्याजम मिडिया एण्ड प्रोडक्सन प्रालिले आयोजना गर्न लागेको कार्यक्रमलाई सिम्रिक एयरले साथ दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
