काठमाडाैं- प्रमुख प्रतिपक्षी दल नेपाली कांग्रेसले पूरा नभएका परियोजना उद्घाटन गर्ने नाममा सरकारले तडकभडक गर्दा पुनः लकडाउनको सामाना गर्नुपरेको टिप्पणी गरेको छ।
‘अधुरा कामलाई नै पूरा भएको भन्दै उद्घाटन, भीडभाड र तडक-भडकमा मग्न ओली सरकारले संक्रमण रोक्ने कुनै ठोस काम नगरेकोले फेरि लकडाउन गर्ने स्थितिमा पुगेको छ’, शुक्रबार पत्रकार सम्मेलनमार्फत् कांग्रेस सभापति शेरबहादुर देउवाले सरकारको शैलीप्रति असन्तुष्टि व्यक्त गरे।
निषेधाज्ञासँगै नागरिकहरू पुनः जिल्ला लाखौं फर्कदा व्यापक संक्रमण गाउँ पुग्ने खतरातर्फ कांग्रेसले सरकारको ध्यानाकर्षण गराइएको छ। कोरोना नियन्त्रणका लागि अत्यावश्यक अक्सिजन, भेन्टिलेटरको यथेष्ट आपूर्ति तथा अस्पताल,आईसीयू बेडको व्यवस्था गर्न माग गरिएको छ। स्वास्थ्य पूर्वाधार, अत्यावश्यक औषधीको व्यवस्था गर्न सुझाव दिइएको छ।
जनशक्ति अभाव अस्पतालहरूमा देखिएकाले थप पदपुर्ति गर्न माग गरिएको छ। लकडाउनले आर्थिक सामाजिक मारमा परेका नागरिक तथा व्यवसायीलाई आवश्यक राहत उपलब्ध गराउन माग गरिएको छ।
कांग्रेसले सरकारलाई गराएको ध्यानाकर्षण पत्रको पूर्णपाठ :
देश कोभिड-१९ महामारीको दोस्रो चरणमा छ। अत्यन्त कम संख्यामा पीसीआर परीक्षण हुँदा पनि ३७ प्रतिशत संक्रमित देखिनु भनेको देशमा संक्रमितको संख्या धेरै बढी भएको सहजै निष्कर्ष निकाल्न सकिन्छ। संक्रमणबाट मृत्यु हुनेको संख्या पनि दिनानुदिन बढ्दो छ। संक्रमितहरूको उपचार गर्न देशको स्वास्थ्य संरचनाले धान्नै नसक्ने स्थिति बनेको छ। बढ्दो संक्रमण सँगै आईसीयू बेड, भेन्टिलेटर र अक्सिजनको टड्कारो अभाव देखिन थालेको छ।
यस्तो परिस्थिति आउनुमा सरकारको चरम लापरबाही, असंवेदनशीलता र अर्कमन्यता जिम्मेवार छ। यो सरकार न विगतका गल्तीहरूबाट सिक्छ न नेपाली कांग्रेस तथा अन्य सरोकारवालाहरूले दिएको सल्लाह र सुझावलाई आत्मसात गर्छ।
अधुरा कामलाई नै पूरा भएको भन्दै उद्घाटन, भीडभाड र तडकभडकमा मग्न ओली सरकारले संक्रमण रोक्ने कुनै ठोस काम नगरेकोले फेरि लकडाउन गर्ने स्थितिमा पुगेको छ। सरकारले काठमाडौं उपत्यका लगायतका ठाउँहरूमा १५ दिने लकडाउन लगाउने निर्णय गरे पछि कोभिड-१९ परीक्षण नगरी उपत्यका छोड्ने समय दिएर लाखौं मानिसहरु लकडाउन नभएका कम संक्रमित जिल्लाहरुमा पुगेका छन्। सरकारको यस्तो निर्णयले संक्रमण कम भएका ठाउँहरुमा समेत व्यापक संक्रमण बढ्ने खतरा बढेको छ।
कोभिड-१९ को बढ्दो संक्रमणका कारण जनताले भोगिरहेको समस्याबाट पार पाउन संक्रमण रोकथाम र उपचारको समुचित प्रबन्ध मिलाई लकडाउनको समयलाई पूर्ण रुपमा सदुपयोग गरी तत्काल निम्न काम गर्न नेपाली कांग्रेस सरकारसँग जोडदार माग गर्दछ।
(१) कोभिड-१९ संक्रमितहरुको उपचारका लागि अत्यावश्यक अक्सिजन र भेन्टिलेटरको यथेष्ट आपूर्ति तत्काल सुनिश्चित गरियोस्।
(२) कोभिड-१९ संक्रमितहरुलाई आवश्यक अस्पताल बेड, आईसीयू बेड लगायतका स्वास्थ्य पूर्वाधार, अत्यावश्यक औषधी र अन्य आवश्यक स्वास्थ्य सामाग्रीहरुको तत्काल समुचित व्यवस्था गरियोस्।
(३) देशका सम्पूर्ण जिल्लाहरुमा कन्ट्याक ट्रेसिङलाई प्रभावकारी बनाई सम्भावित संक्रमितहरुको पीसीआर परीक्षणलाई व्यापक गरियोस्।
(४) सीमा नाकाहरुमा अनिवार्य पीसीआर परीक्षण र परीक्षणको नतिजा नआउन्जेल होल्डिङ केन्द्रहरुमा राख्ने व्यवस्था गरियोस्। परीक्षणमा संक्रमित देखिएकाहरुलाई स्थानीय निकायहरुको समन्वयमा आइसोलेसन केन्द्रहरुको व्यवस्था गरी राखियोस्।
(५) स्वास्थ्यकर्मी, सफाईकर्मी र सुरक्षाकर्मीहरुलाई बीमा र जोखिम भत्ता तत्काल कार्यान्वयन गरियोस्। बढ्दो संक्रमणसँगै स्वास्थ्य जनशक्तिको अभाव देखिएकाले अस्पतालहरुमा थप स्वास्थ्य जनशक्तिको व्यवस्था गरियोस्।
(६) पूर्वाग्रही ढंगले लामो समयदेखि प्राविधिक स्वास्थ्य सचिव रिक्त राख्ने सरकारको गैरजिम्मेवारीपूर्ण रवैयाको भर्त्सना गर्दै तत्काल प्राविधिक स्वास्थ्य सचिवको व्यवस्था सुनिश्चित गर्न फेरि माग गर्दछौं।
(७) खोप आपूर्ति लगायत अत्यावश्यक स्वास्थ्य सामाग्रीको आपूर्ति सुनिश्चित गर्न प्रभावकारी कूटनैतिक पहल गरियोस्।
(८) लकडाउनका समयमा पनि किसानका कृषि उपज तथा अन्य उपभोग्य वस्तुहरूको आपूर्ति र आवत-जावतलाई सहज गरियोस्।
(९) विदेशमा जानेहरुलाई आवश्यक पीसीआर परीक्षण गर्ने अस्पतालहरुको संख्या बढाइयोस्।
(१०) लकडाउनका कारण आर्थिक सामाजिक मारमा परेका आम नागरिक, श्रमिक र साना व्यवसायीहरुलाई आवश्यक राहत र सहयोगको कार्ययोजना ल्याइयोस्।
(११) मास्क अनिवार्य लगाउने, साबुन पानीले हात धुने, भौतिक दूरी कायम गर्ने लगायतका स्वास्थ्य सुरक्षा मापदण्डहरुलाई कडाइका साथ लागू गर्न अनुगमन संयन्त्र मजवुत गरियोस्।
नेपाली कांग्रेसको प्रतिवद्धता
सम्पूर्ण नेपाली दिदीबहिनी तथा दाजुभाइहरुलाई कोभिड-१९ को संक्रमणबाट आफू पनि जोगिन र अरुलाई पनि जोगाउन कोभिड-१९ स्वास्थ्य मापदण्डलाई पूर्ण पालना गर्न नेपाली कांग्रेस हार्दिक अनुरोध गर्दछ। नेपाली कांग्रेस कोभिड-१९ संक्रमणलाई रोकथाम गर्न, संक्रमितहरुलाई उपचार पहुँचमा सघाउन तथा राहत कार्य गर्न निम्न लिखित काम गर्ने प्रतिवद्धता जाहेर गर्दछ।
(१) अनिवार्य मास्क लगाउने, साबुन पानीले हात धुने, भौतिक दूरी कायम गर्ने लगायतका स्वास्थ्य मापदण्ड पालना गर्न नेपाली कांग्रेसका केन्द्रदेखि स्थानीय तहसम्मका सबै संरचनाहरुलाई देशभरी सचेतना अभियान संचालन गर्न क्रियाशील गराइनेछ।
(२) कोभिड-१९ बाट संक्रमित भई उपचारको पहुँचमा पुग्न समस्यामा परेकाहरुलाई हरसम्भव सहयोग गर्न पनि पार्टी संरचनाहरुलाई सक्रिय गराइनेछ।
(३) लकडाउनका कारण आर्थिक सामाजिक समस्या परेकाहरुलाई गत समयमा जस्तै सहयोग अभियान चलाउन नेपाली कांग्रेस क्रियाशील हुनेछ।
(४) यस अघि नै नेपाली कांग्रेसले विकसित मित्र राष्ट्रहरुलाई आफ्नो अग्रिम बुकिङ गरेको खोप संख्याबाट आवश्यक नभएको खोप नेपाल जस्ता देशहरुलाई उपलब्ध गराउन अनुरोध गरेको थियो। यसैबीच, संयुक्त राज्य अमेरिकाले खोप सहयोग गर्ने निर्णय गरेको छ। यस निर्णयको स्वागत गर्दै अन्य विकसित मित्र राष्ट्रहरुलाई पनि खोप सहयोग पुर्याउन अनुरोध गर्दछौं।
जय नेपाल !
शेरबहादुर देउवा
सभापति
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768221200.png)
-1764146706.png)
