काठमाडौं- गण्डकी प्रदेश सभाको मंगलबारको बैठक नेकपा एमालेकै सांसदले अवरुद्ध गरेका छन्। प्रदेश सभा सदस्यहरुको पिसिआर परीक्षण नगरी बैठक सञ्चालन गरिएको भन्दै एमालेले विरोध जनाएको हो।
अवरोधपछि प्रदेश सभा बैठक २० मिनेटका लागि स्थगित भएको छ। बैठकको सुरुमै बोलेका एमाले सांसद् राजीव पहारीले आधाजसो सांसद्हरुले कोरोनाको दोस्रो खोप पनि नलगाएको, कतिपय सांसद्हरु विभिन्न खालका बिरामी भएको र उनीहरु जोखिममा रहेको बताएका थिए।
‘जनताको सार्वभौमसत्ता प्रदेश सभामा जनप्रतिनिधि र कर्मचारीहरु, सुरक्षाकर्मीहरु सबै गरेर दुई सय जनाभन्दा बढी जम्मा भएर पिसिआर परीक्षण नगरिकन, भौतिक दुरी कायम नगरिकन, स्वास्थ्य मापदण्डको सामान्य विधि पनि पूरा नगरिकन प्रदेश सभा सञ्चालन गर्दा भोलि कोरोना संक्रमण यो प्रदेश सभामा फैलियो, कुनै माननीय वा कर्मचारीको मृत्यु हुन पुग्यो (म चाहन्छ त्यस्तो नहोस्) भने त्यसको जिम्मेवार को हुने? दोषी को हुने?’, उनको प्रश्न थियो।
जनतालाई घरभित्रै रहनु भनिएको बेला करिब दुई सय जना व्यक्तिहरु जम्मा भएर बैठक बस्न नमिल्ने उनले बताएका थिए। ‘तसर्थ अबिलम्ब पिसिआर परीक्षण गरियोस् र अनि मात्रै यो सदनलाई अगाडि बढाइयोस् भन्ने माग गर्न चाहन्छु’, उनले भने।
उनले एमालेका तर्फबाट हिजो गरेको ध्यानाकर्षणपछि पनि कुनै रुलिङ नभएको भन्दै असन्तुष्टि जनाएका थिए। हिजो पनि बैठकको सुरुवातमै एमालेका तर्फबाट पिसिआर परीक्षण नगरी बैठक सञ्चालन गरिएकोमा असन्तुष्टि व्यक्त गरिएको थियो।
पहाडीको सम्बोधनसँगै एमाले सांसद्हरुले सिटबाट उठेर विरोध जनाएका थिए। सभामुख नेत्रनाथ अधिकारी आजको कार्यसूची सबैको सहमतिले य गरिएकाले बसेर सहयोग गर्न अनुरोध गरेका थिए। उनले आजसम्मलाई सहयोग गर्न अनुरोध गरेका भए पनि एमाले सांसद्हरुले आफ्नो विरोध कायमै राखेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768660147.png)
-1764146706.png)
-1768395492.png)
