काठमाडौं– काठमाडौं जिल्ला अदालतले रामेछाप लिखु तामाकोशी गाउँपालिकाकी उपाध्यक्ष दिपशिखा न्यौपाने(दाहाल) र वडाध्यक्ष सुवास बोहोरालाई जवरजस्ती चन्दा असुलेको अभियोगमा दोषी ठहर गर्दै जनही एक वर्ष कैद हुने फैसला सुनाएको छ। उनीहरुलाई जनही १० हजार जरिवानाको हुने फैसलामा भनिएको छ।
जिल्ला न्यायाधीश रामचन्द्र पौडेलको इजलासले विहीबार उक्त फैसला सुनाएको हो।
दाहाल र बोहोराले चन्दा मागेको र भनेजति नदिए मार्नेसम्मको धम्की दिएको भन्दै गाउँपालिका अध्यक्ष गोविन्दबहादुर खड्काले जाहेरी दिएका थिए। गाउँपालिका अध्यक्षको जाहेरीपछि दर्ता भएको मुद्दामा जिल्ला अदालतले उपाध्यक्ष र वडाध्यक्षलाई दोषी ठहर गरेको हो।
गाउँपालिका अध्यक्ष खड्का पनि शरीर बन्धक र ठगी मुद्दामा अनुसन्धानमा रहेका छन्।
२०७७ भदौमा जिल्ला अदालत रामेछापले लिखु तामाकोशी गाउँपालिकाका अध्यक्ष खड्कालाई ठगी मुद्दामा अनुसन्धान गर्न पक्राउका लागि प्रहरीलाई पक्राउ पुर्जी जारी गरेको थियो।
प्रहरीको हिरासतमै रहेको अवस्थामा उनीविरुद्ध अर्को मुद्दामा अनुसन्धान गर्ने अनुमति अदालतले दिएको थियो। स्थानीय शेरबहादुर खड्काले गाउँपालिका अध्यक्षले ठगी गरेकोले कारबाहीको माग गर्दै प्रहरीमा जाहेरी दिएका थिए।
२ करोड मूल्य दिन्छु भन्दै आफ्नो २१ रोपनी जग्गा गाउँपालिकाको लागि मागेको तर उक्त जग्गा पालिकालाई नभई आफ्नी साली नाता पर्नेको नाममा झुक्याएर पास गरेको र तोकिएको मूल्य नदिएको आरोप उनले लगाएका थिए।
गाउँपालिकाको नाममा हालसम्म कुनै जग्गा छैन भाडाको घरमा कार्यालय संचालन भइरहेको छ।
के हो विवाद ?
अध्यक्ष भएदेखि नै एकलौटी रुपमा गाउँपालिकामा मनोमानी गरेको भन्दै उपाध्यक्ष दीपशिखा दाहालसहित एमालेबाटै निर्वाचित वडाध्यक्षहरुले खड्काविरुद्ध पटक–पटक पार्टीको ध्यानाकर्षण गराउँदै आएका थिए।
पछिल्लो समय लिखु तामाकोशी गाउँपालिकामा विद्युतीकरणमा १२ करोड ४४ लाखमाथि खर्च भएको पालिका अध्यक्ष खड्काले कार्यपालिका बैठकमा पेश गरेपछि विवाद सार्वजनिक रुपमा सतहमा आएको थियो।
गाउँपालिकाबाट विद्युतीकरण गर्दा तिर्नु पर्ने बाँकी ६ करोड ९५ लाख रकम थप विनियोजन गर्नु पर्ने माग अध्यक्षले राखेपछि कार्यपालिकाका बहुमत सदस्यले अनुगमन गरेर मात्रै थप भुक्तानी दिने अडान राखेपछि यो विवादले चर्को रुप लिएको थियो।
विद्युतीकरणको रकम भुक्तानीको खड्काको प्रस्तावमा असहमति जनाएपछि ७ नं वडाअध्यक्ष सुवास बोहोरा र प्रमुख प्रशासकीय अधिकृत भुपेन्द्र राईमाथि कुर्सी प्रहार भएको थियो।
बैठकमा गाउँपालिकामा कार्यविधी विपरीत एम्बुलेन्स संचालन गरेको, पालिका भित्रको हरहिसाब आर्थिक पारदर्शिता नभएकाले सबै कारोबारको छानबीनसहित कार्यपालिकामा पेश गर्न लेखा समिति गठन गर्नुपर्ने लगाएतको माग राखेका वडाअध्यक्ष सुवास बोहोराले अध्यक्ष विरुद्ध आन्दोलन शुरु गरे। असन्तुष्ट जनप्रतिनिधि जिल्ला सदरमुकाम मन्थली पुगेर पत्रकार सम्मेलनसमेत गरेर गाउँपालिका अध्यक्षले भ्रष्टाचार गरेको आरोप लगाएका थिए।
एकाएक स्वयम्भू गोलीकाण्डमा मुछिएपछि
काठमाडौंको स्वयम्भूमा २०७६ साउन २४ गते प्रहरीले गोली चलाएर लोप्साङ भनिने मिलन तामाङ (बाबुराम) लाई पक्राउ गर्यो। उनीसँगै अमृत तामाङलाई पनि प्रहरीले समातेको थियो। यो घटना सिधै गाउँपालिका अध्यक्ष खड्कासँग जोडियो।
लिखु तामाकोशी गाउँपालिका अध्यक्ष खड्कासँग चन्दा माग्दै पैसा नपाए छोरी अपहरण गर्ने धम्की दिएको भन्ने अध्यक्ष खड्काको जाहेरीपछि प्रहरीले उनीहरुलाई स्वयम्भुबाट पक्राउ गरेको थियो।
आफ्नो छोरी अपहरण गर्न आएको दावीसहित गाउँपालिका अध्यक्षको उजुरीको आधारमा उनीहरु पक्राउ परेका थिए। उक्त गोलीकाण्डपछि अध्यक्ष खड्काले आफूलाई धम्की दिने भनिएका युवकहरुलाई वडाध्यक्ष सुवास बोहरा र गाउँपालिका उपाध्यक्ष दीपशीखा दाहालले परिचालन गरेको आरोप लगाए। वडाध्यक्ष बोहराले मन्थली पुगेर आरोप प्रमाणित गर्न वा पार्टीले कारवाही गर्न चुनौती दिएका थिए।
उपाध्यक्षसहित वडाध्यक्षलाई झुट्टा मुद्दामा अध्यक्षले फसाउन खोजेको तर्क गरे। फिरौती माग्न योजना बनाएको आरोपमा उपाध्यक्ष दिपशिखा दाहालसहित वडा अध्यक्षको नाममा अदालतमा अध्यक्ष खड्काले दिएको किटानी जाहेरीको आधारमा मुद्दा दायर भयो। उक्त मुद्दामा फैसला गर्दै दुई जना जनप्रतिनिधिलाई जिल्ला अदालतले दोषी ठहर गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
