नेपालगन्ज- बाँके जिल्ला पुनः कोरोना संक्रमणको ‘हटस्पट’ बन्दै गएको छ। कोरोना संक्रमितको संख्या तीव्र वृद्धि हुँदा संक्रमण नियन्त्रणभन्दा बाहिर जाने आकलन गर्न थालिएको छ।
आगामी एक सातामा संक्रमण नियन्त्रणमा नआउने हो भने बाँके जिल्लाभरका स्वास्थ्य संस्था कोरोना संक्रमितले भरिने र उपलब्ध स्रोत साधनले समेत नधान्ने बताइएको छ।
शुक्रबारमात्र बाँकेका तीनवटा ल्यावमा २७१ जनाको पीसीआर परीक्षण गर्दा १९९ जना व्यक्तिलाई कोरोना संक्रमण पुष्टि भएको थियो।बाँकेमा देखिएको यो अहिलेसम्मकै उच्च संक्रमण संख्या हो।बाँकेमा परीक्षण गरिएको पिसिआर नमुनामध्ये ७० प्रतिशतसम्म पोजिटिव रेट देखिँदा संक्रमणको व्यवस्थापनलाई लिएर पनि प्रश्न उठेको छ।
संक्रमण बढेसँगै संक्रमितले भेरी अस्पतालका बेड पनि भरिन थालेका छन्। भेरी अस्पतालमा पिसिआर नमुनाको लोड पनि बढेको छ।
अस्पतालले आफ्नो स्रोत साधनले भ्याएसम्म बिरामीको उपचारमा प्रतिबद्ध भएर लागेको जनाएको छ। तर, यही क्रममा संक्रमण फैलिने र गम्भीर खालका बिरामीहरूको संख्या बढ्ने हो भने बिरामीको चाप थेग्न मुस्किल हुने चेतावनी पनि अस्पतालले दिएको छ। संक्रमणलाई थप फैलिन नदिन सरकारले अनुरोध गरे बमोजिमका सुरक्षाका मापदण्डहरूको पूर्ण पालना गर्न पनि अस्पतालले सबैलाई आग्रह गरेको छ।
भेरी अस्पतालका मेडिकल सुपरिटेण्डेन्ट (मेसु) डा प्रकाश थापाले उपचाररत विरामीमध्ये झण्डै आधा संख्या आइसीयूमा उपचाररत रहेको बताए।
कुनै न कुनै हिसाबमा संक्रमण समुदायमा फैलिएको आंशका मेसु थापाले गरे। ‘अघिल्लो वर्ष पनि यही समयमा बाँकेमा उच्च संक्रमण देखिएको थियो', उनले भने, ‘यसले समुदायमा संक्रमण फैलिएको देखिन्छ। यो पहिलेको भाइरस हो वा नयाँ भेरियन्ट वा म्यूटेट के हो भन्ने यकिन भएको छैन।’
बाँकेमा कोरोनाकै कुन भाइरस हो भनेर जाँच्ने प्रविधि नभएको बताउँदै उनले अघिल्लो वर्षको तुलनामा भाइरस तिव्र फैलिएको बताए।अहिले सबै उमेर समुहका व्यक्तिमा संक्रमण फैलिएको उनले बताए।
भेरी अस्पतालका ६ जना स्वास्थ्यकर्मीलाई संक्रमण देखिएको छ। शल्यक्रिया कक्ष, वार्ड र प्रशासनमा कार्यरत उनीहरु सबैले कोभिसिल्ड खोप लगाएका थिए। अस्पतालमा कार्यरत स्वास्थ्यकर्मीलाई संक्रमण देखिएपछि अस्पतालका अन्य स्वास्थ्यकर्मीको पनि पिसिआर परीक्षणका लागि नमुना संकलन गरिएको छ।
तत्काल विद्यालय बन्द गरिनुपर्छ
संक्रमणको तिव्र फैलावटलाई मध्यनजर गर्दै तत्काल विद्यालय बन्द गर्न चिकित्सकले आग्रह गरेका छन्। संक्रमण विद्यालय उमेर समूहका विद्यार्थीलाई देखिएकाले विद्यालय बन्द गर्नुपर्ने मेसु थापाले बताए। उनले भीडभाड रोक्न सभासेमिनार, बजारको भीडभाड बन्द गर्नुपर्ने समेत बताए।
नेपालगन्जका विद्यालयहरुले परीक्षा भइरहेको भन्दै विद्यालय बन्द गर्न आनाकानी गरिरहेका छन्। संक्रमणको अवस्था मध्यनजर गर्दै नेपालगन्ज उपमहानगरपालिका विपद् व्यवस्थापन समितिको बिहीबार बसेको बैठकले उपमहानगरभित्रका विद्यालय शुक्रबारदेखि र आइतबारदेखि जिल्लाभरका विद्यालय बन्द गर्न डिसिसिएमी बाँकेलाई सिफारिस गरिसकेको छ।
बिहीबार मात्र नेपालगन्जका करिव आधा दर्जन विद्यालयमा शिक्षक र विद्यार्थी गरी १५ जनालाई कोरोना संक्रमण पुष्टि भएको थियो।
नेपालगन्ज उपमहानगरपालिकाका अनुसार स्थानीय धम्बोझी माध्यमिक विद्यालय, मंगलप्रसाद माध्यमिक विद्यालय, सेन्टथोमस बोर्डिङ स्कुल, वाटरपार्क, महेन्द्र र आर्दश माध्यमिक विद्यालय र सनविम माविका शिक्षक तथा विद्यार्थीलाई कोरोना संक्रमण भएको हो। ।
लकडाउनमा जानुको विकल्प छैन
संक्रमण समदायमा फैलिएको भन्दै तत्काल लकडाउनमा जानुपर्ने अवस्था आइसकेको मेसु थापा बताउँछन्।अघिल्लो वर्ष समयमा लकडाउन भएकाले संक्रमण नियन्त्रण गर्न सहज भएको भन्दै उनले यसपटक पनि ढिला गर्न नहुने बताए। लकडाउन गर्न ढिला भए संक्रमण नियन्त्रण बाहिर जान सक्ने भन्दै उनले चिन्ता व्यक्त गरे।
अत्यावश्यक बाहेक सेवा बन्द गर्दै भेरी अस्पताल
भेरी अस्पतालले कोरोना संक्रमितको संख्या बढ्न थालेपछि फिवर क्लिनिक सञ्चालन गर्ने, रुटिन अप्रेशन बन्द गर्ने, अत्यावश्यक सेवाबाहेक अन्य सेवा बन्द गर्नेबारे सोच बनाइसकेको तर, निर्णय हुन बाँकी रहेको बताइएको छ।
ननकोभिड सेवा बन्द गर्दा थप समस्या हुने भएकाले समस्या पर्ने अस्पतालको भनाइ छ। पछिल्लो पटक कोभिड युनिट बन्द गरेको कोहलपुर मेडिकल कलेजले पनि पुनः कोभिड सेवा शुरु गर्न लागेको छ।
अस्पतालले तत्कालका लागि पिसिआर किट, व्यक्तिगत सुरक्षा सामग्री उपलब्ध भए पनि संक्रमण बढ्दै जाँदा अभाव हुने भन्दै व्यवस्थापन गर्न शुरु गरेको छ।
रुपैडिया नाकाबाट दैनिक भित्रन्छन् २ हजार व्यक्ति
पछिल्लो समय नेपालगन्जस्थित नेपाल–भारत जमुनाह नाकाबाट नेपाल भित्रने नेपालीको भीड अत्यधिक बढेको छ। हरेक दिन दुई हजार बढी व्यक्ति आउन थालेका छन्। सरकारले हरेक नाकामा हेल्थ डेस्क राखेपनि भारतबाट भित्रने सबैको जाँच भने हुन सकेको छैन।
भारतमा कोरोना संक्रमितको संख्या बढ्न थालेकाले पुनः लकडाउन हुन थालेपछि कामको खोजीमा भारत पुगेका नेपाली स्वदेश फर्कन थालेका हुन्। तर, नाकाबाट नेपालीहरु निस्फिक्री आइरहेका छन्। उनीहरुको बारे सोधखोज, स्वास्थ्य जाँच भने सबैको भएको छैन। यसरी भारतबाट आउनेहरुले स्वास्थ्यका मापदण्ड पालना गरेको पनि देखिँदैन।
नेपालगन्जमा स्थापित हेल्थ डेस्कमा दुई सिफ्टमा गरेर ४ जना स्वास्थ्यकर्मी खटाइएको छ। जसमा एक जना करारमा छन्। सिनियर अनमी गीता गिरी शाहीले सरकारले नाकाको हेल्थ डेस्कको क्षमता थप बढाउनु पर्ने र व्यवस्थित गराउनुपर्ने बताइन्। ‘यही व्यवस्थाले मात्र त कोरोना नियन्त्रण गर्न समस्या छ,’ उनले भनिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
