काठमाडाैं- नेकपा (माओवादी केन्द्र)ले बागमती प्रदेशसभा बिहीबार (भोलि) पनि चल्न नदिने बताएको छ।
माओवादीकै कारण मंगलबार र बुधबारको बैठक अवरुद्ध भएको थियो। बिहीबार बोलाइएको बैठक पनि अवरुद्ध गर्ने माओवादी केन्द्रका सांसद शालिकराम जमरकट्टेलले जानकारी दिए।
सरकारले आर्थिक अनियमितता गरेको उनले आरोप लगाए। आर्थिक अनियमितताका विषयमा माओवादी केन्द्रलाई चित्तबुझ्दो जवाफ नदिँदासम्म बैठक चल्न नदिने उनले बताए।
विद्युतीय सवारीसाधन गर्ने सरकारी निर्णयको माओवादीले विरोध गरेको छ। विनापूर्वाधार विद्युतीय बस ल्याउने कार्यको विरोध गरेको उनले बताए। पूर्वाधारको विकास गरेर मात्रै बस खरिद गर्नुपर्ने उनको भनाइ छ। ‘रेललाई ल्याएर पालले ढाकेर राखिएको छ। विनापूर्वाधार विद्युतीय बस ल्याए चलाउन सकिन्न,’ उनले भने।
एमालेको एक पक्षले मुख्यमन्त्री डोरमणि पौडेलेको बहिर्गमन चाहेकाले उनले राजीनामा दिनुपर्ने जमरकट्टेलले बताए। संसद्मा मुख्यमन्त्रीले दिएको जवाफ चित्त बुझ्ने खालको नभएकाले अवरोध बिहीबार पनि दोहोरिने प्रस्ट पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
