काठमाडौं - थापाथलीस्थित नर्भिक अस्पतालले क्यान्सरका बिरामीको उपचारका लागि अस्पतालको सेवा विस्तार गर्दै छ। अस्पतालले यसका लागि सबै खालका क्यान्सरको उपचारका लागि आवश्यक पर्ने विधि र पद्धति तथा प्रविधि विकास गर्दै लगेको छ।
अस्पतालले सोमबार जारी गरेको विज्ञप्ति अनुसार अस्पतालले क्यान्सर उपचारका क्षेत्रमा पनि केन्द्रित गर्दै सेवा विकास गरेको जनाएको छ। अस्पतालले नेपालमै ठूलो ट्युमार बोर्ड समेत गठन गरेको जनाएको छ।
क्यान्सरबाट प्रभावित बिरामीहरुको उपचारमा सम्भावित सबै विकल्पहरु खोज्ने तथा विदेशकै स्तरीय उपचार सेवा दिने उद्देश्यले नर्भिकमा विशेषज्ञ चिकित्सकहरुको सहभागितामा ट्यूमर बोर्ड गठन भएको हो।
क्यान्सरका बिरामीलाई सम्भावित उत्तम उपचार विधिमा समावेश गर्ने उद्देश्यले गठित ट्युमर बोर्डमा हाल २३ जना विशेषज्ञ चिकित्सकहरुको सहभागिता रहेको छ। बोर्डको आकार बढाउँदै लगिने अस्पतालले जनाएको छ। यस्तो अभ्यास यूरोप/अमेरिकाका स्तरीय अस्पतालहरुमा समेत हुने गर्छ।
बोर्डमा नर्भिकका अंकोलोजिस्ट, प्याथोलोजिस्ट, ग्यास्ट्रोलोजिस्ट, गाइनेकोलोजिस्ट, जनरल तथा जीआई सर्जन, पेड्राटिसियन, न्यूरोलोजिस्ट लगायतका विशेषज्ञ चिकिसत्कहरुको सहभागिता छ। यस्तो टिममा अस्पतालको प्रशासन, व्यवस्थापनबाट समेत प्रतिनिधित्व हुने गर्छ।
कुनै फरक खालको क्यान्सरको बिरामीको समस्या तथा त्यसको सही उपचार विधिको पहिचानका लागि समेत यस्ता खाले बोर्डमा छलफल हुने गर्दछ। बोर्डमा सहभागी विभिन्न विशेषज्ञ डाक्टरहरुको राय भिन्न भिन्न आउने भएकोले यस्तो समस्याको उपचारमा सबैभन्दा उत्तम विधिमा जान सकिने चिकित्सकहरु बताउँछन्।
नर्भिक अस्पतालका वरिष्ठ न्यूरो सर्जन डा राजीव झाका अनुसार बोर्डमा सहभागी विशेषज्ञहरुले कुनै बिरामीको सही उपचार योजनाको विषयमा साप्ताहिक रुपमा छलफल गर्ने गर्दछन्। कुनै एक विशेषज्ञले हेरिरहेको केसलाई सामूहिक रुपमा हेर्ने गरिन्छ र उपचार विधिलाई अझ गुणस्तरीय बनाउने कोशिश गरिन्छ। बोर्डमा कुनै बिरामी, उसको समस्या, भइरहेको उपचार विधि, उसका विभिन्न मेडिकल रिपोर्टहरुको विषयमा समेत छलफल हुने डा झा बताउँछन्।
क्यान्सरको उपचारमा विशेष गरी मेडिकल अन्कोलोजिष्ट (औषधिको मद्धतबाट क्यान्सरका बिरामीको उपचार गर्ने व्यक्ति), सर्जिकल अन्कोलोजिष्ट (सर्जरीबाट क्यान्सरको उपचार गर्ने चिकित्सक) र रेडिएसन अन्कोलोजिस्ट (रेडिएसनको मद्धतले क्यान्सरको उपचार गर्ने चिकित्सक)को मुख्य भूमिका हुन्छ। बोर्डमा पनि यस्ता विज्ञको सहभागिता गराउने चलन छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
