काठमाडौं- कर्णाली प्रदेशका मुख्यमन्त्री महेन्द्रबहादुर शाहीलाई राजीनामा दिएर मार्गप्रशस्त गर्न सत्ता साझेदार नेकपा (एमाले)ले माग गरेको छ। एमाले प्रदेश संसदीय दलको आइतबार बसेको बैठकले लोकतान्त्रिक प्रणालीलाई बलियो बनाउन राजीनामा दिएर मार्गप्रशस्त गर्न मुख्यमन्त्री शाहीलाई अनुरोध गर्ने निर्णय गरेको हो।
बैठकमा माधवकुमार नेपाल पक्षका सांसदहरू पनि उपस्थित थिए। यसअघि ओली पक्षका सांसदहरूले मुख्यमन्त्री शाहीलाई दिएको समर्थन फिर्ता लिइसकेका थिए। अब नेपाल पक्षका सांसदहरूले समेत साथ नदिएपछि मुख्यमन्त्री शाहीको सत्ता संकटमा परेको छ।
४० प्रदेश सभा सदस्य रहेको कर्णालीमा माओवादी केन्द्रका १३ सांसदसमध्ये एक जना एमालेमा प्रवेश गरिसकेका छन्। एमालेका २० सांसदमध्ये एक जना सभामुख निर्वाचित भइसकेका छन्। कर्णालीमा कांग्रेसका ६ र राप्रपाका एक सांसद छन्।
नेपाल पक्षका मन्त्रीले सामूहिक राजीनामा दिने
प्रदेश सरकारमा रहेका नेपाल पक्षका मन्त्रीहरूले सामूहिक राजीनामा दिने भएका छन्। पार्टीले समर्थन फिर्ता लिइसकेकाले अब मन्त्रीहरूले राजीनामा दिने निर्णय भएको सांसद करविर शाहीले नेपाल लाइभलाई बताए। 'उहाँहरूले छिट्टै उपयुक्त समयमा राजीनामा दिनुहुनेछ', शाहीले भने।
सरकारमा एमालेका तर्फबाट ४ जना मन्त्री थिए। जसमध्ये बैंकिङ कसूरको मुद्दा परेपछि भौतिक पूर्वाधार मन्त्री खड्कबहादुर खत्रीले २ वर्षअघि नै राजीनामा दिइसकेका थिए। अहिले सरकारमा एमालेका तर्फबाट प्रकाश ज्वाला आर्थिक मामिला मन्त्री, दल रावल सामाजिक विकास मन्त्री र नन्दसिंह बुढा पर्यटन मन्त्री छन्। मन्त्री नियुक्त हुने बेला रावल र बुढा प्रधानमन्त्री केपी शर्मा ओली पक्षबाट भएपनि साविक नेकपाको विवादमा नेपाल पक्षमा लागेर उनीहरू अहिले नेपाल पक्षमै छन्।
दलको विधान बनाउन कार्यदल
यसैबीच, एमालेको प्रदेश संसदीय दलको विधान बनाउन कार्यदल गठन गरिएको छ। दलको बैठकले प्रमुख सचेतक गुलावजंग शाहको संयोजकत्वमा सांसदहरू करविर शाही र मिनासिंह रखाल सदस्य रहेको कार्यदल बनाएको हो।
‘दलको विधान नबन्दै पार्टी एकता भएको थियो। त्यसपछि नेकपाको विधान बन्यो। तर, सर्वोच्चको फैसलापछि हामी पूर्ववत् दलमा छौं। त्यसकारण आफ्नै दलको विधान बनाउन लागेका हौं’, सांसद शाहीले भने। बैठकले पार्टी एकतालाई अक्षुण राख्न केन्द्रीय नेताहरूलाई अपील गर्ने निर्णय समेत गरेको सांसद शाहीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
