काठमाडौं- नेकपा एमालेको झलनाथ खनाल र माधवकुमार नेपाल पक्षले काठमाडौं जिल्ला कमिटी घोषणा गरेको छ। विभिन्न जिल्ला र भ्रातृ संगठनमा समानान्तर कमिटी घोषणा गरिरहेको यो पक्षले आइतबार बुद्धनगरमा एक कार्यक्रमबीच कमिटी घोषणा गरेको हो।
काठमाडौं जिल्ला कमिटीमा अध्यक्षको जिम्मेवारी वसन्त मानन्धरलाई दिइएको छ। त्यस्तै, उपाध्यक्ष शोभा सापकोटा, सचिवमा कुसु कुमार कार्की, सहसचिवमा लक्ष्मीप्रसाद श्रेष्ठ छन्। जिल्ला कमिटीमा २२५ जना सदस्य छन्।
'तीन विकल्प छन्'
कार्यक्रममा सम्बोधन गर्दै माधवकुमार नेपालले आफ्नो पक्षसँग तीनवटा विकल्प रहेको बताएका छन्। 'एउटा विकल्प केपी ओलीको टाङमुनि छिर्नु हो,' नेपालले भने, 'केपी ओलीसामू आत्मसमर्पण गर्नु हो।'
उनले सुनाएको दोस्रो विकल्पमा राजनीति छाड्नु रहेको छ। 'दोस्रो विकल्प भनेको राजनीति छाडेर गेरुवस्त्र लगाएर हिँड्नु हो। वैराग जागेर, निराश भएर बस्नु हो,' उनले भने।
नेपालले उल्लेखित दुवै विकल्प आफूहरूले नजानेको बताए। 'सही बाटोमा निरन्तर अगाडि बढिन्छ। गलत कुराका विरुद्ध दृढताका साथ जुधिन्छ। मैदान छाडेर भागिने छैन। पिठ्युँ फर्काएर भागिने छैन। दृढताका साथ छाती अगाडि सारेर अगाडि बढिन्छ,' उनले भने।
'ओलीले तमासा गरे'
१६५ निर्वाचन क्षेत्रका रणनीतिक सडकको शिलान्यास गर्ने प्रधानमन्त्री केपी शर्मा ओलीको कदमलाई नेपालले 'तमासा'को संज्ञा दिएका छन्। 'यतिकै स्वीच थिचेर १६५ वटा निर्वाचन क्षेत्रमा एकै दिन सडकको शिलान्यास! कहीँ हुन्छ? संसारमा कहीँ भएको छ? डीपीआर भएको छैन, कति खर्च लाग्छ, लागतको कुरा छैन। त्यसका निम्ति आधार बनाउनुपर्छ। बल्ल शिलान्यास हुन्छ। बालुवाटारमा बसेको छ, स्वीच थिचिदियो,' नेपालले भने।
नेपालले ती सबै ठाउँमा नाम लेखाैंला भनेर ओलीले एकैपटक शिलान्यास गरेको बताए। 'नाम लेख्न कति रहर रहेछ। फोटो टाँस्ने कति रहर रहेछ। आफ्नो कोठामा, आफ्नो घरमा झुन्ड्याए भइहाल्यो नि। किन सबैलाई दुःख दिनु बेकारमा। त्यसैले उहाँको तमासा मात्रै हुन्। यो तमासाको कुनै अर्थ छैन,' वरिष्ठ नेता नेपालले भने।
उनले जनताले कुरा होइन, काम चाहने बताए। 'जनता कुरामा विश्वास गर्दैनन्, परिणाम हेर्न चाहन्छन्। मदन भण्डारीले भन्नुभएको थियो- कुराले चिउरा भिज्दैन। चिउरा भिजाउनका लागि दूध नै चाहिन्छ, कि दही। जनताको विश्वास जित्न कुराले पुग्दैन। काम गर्ने विधि व्यवहार चाहिन्छ। अनि जनताको विश्वास जित्न सकिन्छ,' नेपालले भने।
'ओलीको साँठगाठ दलाल पुँजीवादीसँग'
नेपालले प्रधानमन्त्री ओली विचार र सिद्धान्तबाट च्युत भएको आरोप लगाएका छन्। ओलीको सिद्धान्त कमाउवाद र त्यागिदेऊमा आधारित रहेको उनले बताए। समाजवादको दृष्टिकोण ओलीमा नभएको नेपालको आरोप छ।
प्रधानमन्त्रीको साँठगाँठ दलाल पुँजीवादीसँग भएको उनले ठोकुवा गरे। उनले भने,‘ २०७१ सालको महाधिवेशनले पारित गरेको विचार सिद्धान्त मान्न ओली तयार छैनन्।’
ओली प्रवृत्तिको विरुद्धका लडिरहेको बताउँदै उनले प्रधानमन्त्रीसँग सानो गुट रहेको तर पार्टी नरहेको बताए। महाधिवेशनबाट निर्वाचित जिल्ला अध्यक्षलाई ओली पक्षले हटाएको भन्दै आपत्ति जनाए।
'फालेर हामी फालिने हो?'
वरिष्ठ नेता माधवकुमार नेपालले पार्टी अध्यक्ष ओलीले दलबाट फालेर आफू नहट्ने बताए। नेता नेपालले भने,‘केपी ओलीले फालेर हामी फालिने हौं? केपी ओलीले हामीलाई पार्टीमा ल्याएका हुन्?’
पार्टीको आधिकारिकता आफ्नो पक्षमा हुने उनले दाबी गरे। कानुनले आधिकारिकता नदिने परिस्थितिमा बेग्लै बाटो खोजिने उनले बताए।
'पार्टीभित्रको लडाइँ जुँगाको होइन'
कार्यक्रममा सम्बोधन गर्दै अर्का नेता झलनाथ खनालले पार्टीभित्रको अहिलेको लडाइँ सही र गलतबीचको भएको बताएका छन्। 'यो पदको लडाइँ होइन, यो जुँगाको लडाइँ होइन,' उनले भने, 'यो विचारको लडाइँ हो।'
पार्टीभित्र दुईवटा समूह प्रकट हुन थालेको भन्दै खनालले आफ्नो समूह क्रान्तिकारीहरुको भएको बताए। उनले आफ्नो समूह समाजवादको लक्ष्य लिएर अघि बढ्न दृढ संकल्पित भएको बताए। 'अर्को समूह दक्षिणपन्थी अवसरवादीहरुको हो। दक्षिणपन्थी भड्काउबाट ग्रसित छ,' उनले भने।
माओवादीसँग एकीकरण गर्ने बेला कुन आधारमा र कसरी गर्ने भन्नेबारेमा पार्टीभित्र छलफल नभए पनि आफूहरुले दुई हात उठाएर समर्थन गरेको खनालले बताए। तर, एकीकरणपछि पनि ओलीको दक्षिणपन्थी सोच जारी रहेको उनले बताए।
खनालले ओलीकै कारण पार्टी विवादग्रस्त भएको र विग्रह बढेको आरोप लगाए। पार्टीलाई एकीकृत बनाएर लैजाने चुनौती सिर्जना भएकै बेला ओलीले पार्टीमा एमाले र माओवादी भनेर छुट्याउन थालेको बताए। 'उहाँले आफ्नो गुटलाई एमाले बनाउन थाल्नुभयो,' उनले भने।
'केपी ओली विचारशून्य छन्, जित्न सजिलो छ'
एमाले नेतृ अष्टलक्ष्मी शाक्यले प्रधानमन्त्री तथा एमाले अध्यक्ष केपी ओली विचारशून्य भएको बताएकी छिन्। उनले संगठन बनाएर अघि बढ्न कार्यकर्तालाई आग्रह गरिन्।
'केपी ओली कहिले पनि विचारको छलफल नगर्ने नेतृत्व हो। जसले पार्टीलाई धुजाधुजा बनाए। छिन्नभिन्न बनाए। आसेपासे राखेर पार्टीलाई विचारशून्य बनाए। त्यसैले विचार नभइकन, वैचारिक र सांगठनिक रुपमा स्पष्ट नभइकन, पार्टीको कार्यदिशा स्पष्ट नपारीकन हामीले लड्न सक्दैनौं। जित्न सक्दैनौं,' उनले भनिन्, 'त्यसैले केपी ओलीसँग जित्न सजिलो छ। जब हामी वैचारिक युद्ध गर्छौं। विधिसम्मत हुन्छौं। र, सबै ढंगले हामीले आफूलाई सक्षम बनाउँछौं। तब हामी जित्न सक्छौं, जित्छौं। केपी ओली विचारशून्य मान्छे हो।'
ओलीले कहिल्यै पनि वैचारिक कुरा गर्न नसकेको शाक्यले बताइन्। 'कहिले पनि विचारको प्रस्तुति गर्न सक्नुभएन। उहाँले 'एस् म्यान'हरु राखेर पार्टीलाई कमजोर बनाउनुभयो। अन्योल गर्ने काम गरे। दिशा भ्रष्ट गर्ने काम गरे। उद्देश्यलाई अलमल्याउने काम गरे,' उनले भनिन्।
केपी ओलीले उचाइमा पुगिसकेको कम्युनिस्ट आन्दोलनको झन्डालाई तल झार्ने काम गरेको भन्दै शाक्यले आफूहरुले झार्न नदिने बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
