फाइल तस्बिर
काठमाडाैं- प्रधानमन्त्री केपी शर्मा ओलीले गुणस्तरीय शिक्षाका लागि शिक्षकको गुणस्तरलाई माथि उकास्नुपर्ने बताएका छन्। बिहीबार प्रधानमन्त्री निवास बालुवाटारमा राष्ट्रपति शैक्षिक सुधार कार्यक्रम अन्तर्गत छनोटमा परेका विद्यालयहरुको विवरण प्रस्तुत गर्ने कार्यक्रममा बोल्दै प्रधानमन्त्री ओलीले गुणस्तरीय शिक्षाका लागि शिक्षकहरुको गुणस्तरमा ध्यान पुर्याउनुपर्ने बताएका हुन्।
विद्यार्थीको ध्यानाकर्षण हुने, विद्यार्थीले बुझ्ने खालको शिक्षण विधि र शिक्षकको सम्प्रेषण कला हुनुपर्ने उनले बताए। भौतिक संरचनाको विकासले मात्रै शैक्षिक गुणस्तर कायम नहुने भन्दै प्रधानमन्त्री ओलीले शिक्षकको गुणस्तर र शिक्षण विधिमा ध्यान दिनुपर्नेमा जोड दिए।
‘राम्रो शिक्षा शिक्षकले प्रदान गर्न सकिरहेको छ कि छैन। शिक्षण विधिमा, सम्प्रेषण कला कस्तो छ शिक्षकमा? विद्यार्थीको ध्यानाकर्षण गर्ने खालको, विद्यार्थीले बुझ्ने खालको, विद्यार्थी आकर्षित हुने खालको, विद्यार्थीको रुचि जाग्ने खालको सम्प्रेषण कला, शिक्षण विधि, शिक्षणपद्धति त्यसमा ध्यान दिइरहेका छौं,' उनले भने, 'मलाई लाग्छ अझ धेरै ध्यान दिनु आवश्यक छ।'
उनले शिक्षकको गुणस्तर माथि नउठाएसम्म विद्यार्थीको गुणस्तरमा सुधार ल्याउन नसकिने बताए। 'शिक्षककै गुणस्तर माथि उठाउनुपर्छ। मुख्य कुरा शैक्षिक वातावरण विद्यालयहरुमा अनिवार्य रुपमा उपयुक्त खालको शैक्षिक वातावरण हुनुपर्दछ। उपयुक्त खालको शिक्षक क्वालिटी हुनुपर्दछ। शिक्षकको क्वालिटी समय-समयमा टेस्ट गरिनुपर्छ। शिक्षक आफ्नो विद्यार्थीको लागि उत्तरदायी हुनुपर्छ,’ प्रधानमन्त्री ओलीले भने।
राष्ट्रपति शैक्षिक सुधार कार्यक्रम अन्तर्गत देशभरका चार हजार २५० वटा विद्यालयलाई कक्षा कोठा, शौचालय, शैक्षिक सामग्री, सूचना प्रविधि, ल्याब तथा पुस्तकालय, नवीन प्रविधि, विशेष विद्यालय र भौतिक पूर्वाधार तथा शैक्षिक विकास शिर्षकमा बजेट विनियोजन गरिएको पनि उनले बताए। विद्यालयको छनोट प्रक्रिया उपयुक्त विधिका साथ भएको र आगामी वर्षहरुमा पनि विद्यालयहरुमा यस प्रकारका कार्यक्रमहरु नीति, कार्यक्रम र बजेटमार्फत पार्दै जाने प्रधानमन्त्री ओलीले बताए।
'चार हजार २५० विद्यालयहरुमा थप सुधार र स्तरोन्नतिका लागि कार्यक्रम सञ्चालन गर्दैछौँ। पाँच अर्ब छ करोड छुट्याएका छौँ। त्यसको छनोट प्रक्रिया उपयुक्त विधिका साथ गर्ने प्रयास भएको छ,' उनले भने, 'विलकुल नयाँ अभ्यास हामीले सुरु गरेका छौँ र यसरी एकैचोटी यति धेरै विद्यालयहरुमा पहिले कहिल्यै पनि यस प्रकारको अभ्यास गरिएको थिएन। यो नयाँ अभ्यास गरिएको छ। यस अभ्यासलाई हामी जारी राख्छौँ। यो हाम्रो नियमित वार्षिक नीति, कार्यक्रम र बजेटभित्रको कुरा हो र यसलाई यसै ढङ्गले कार्यान्वयन गर्दै लगिनेछ।’
प्रधानमन्त्री ओलीले सरकारले विद्यालय सञ्चालनका लागि आवश्यक भौतिक पूर्वाधारलगायतका शैक्षिक सामग्री र उपकरणहरु विद्यालयहरुमा पुर्याउन लागेको बताए। स्वास्थ्यसम्बन्धी प्रबन्धसहितको विद्यालय हुनुपर्नेमा पनि प्रधानमन्त्री ओलीले जोड दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
