काठमाडौं- नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओलीले प्रतिक्रियावादी वर्गको प्रतिनिधिका रुपमा राजनीतिक परिवर्तनलाई उल्ट्याउने कसरत गरेको आरोप लगाएका छन्।
मंगलबार २०औं जेलब्रेक दिवसको अवसरमा आयोजित अन्तरक्रियामा प्रचण्डले देशको संविधानमाथि प्रतिक्रियावादीहरूले प्रहार गरेको र त्यसको प्रतिनिधिको रुपमा प्रधानमन्त्री ओली रहेको आरोप लगाए।
देशको राजनीतिक उपलब्धीलाई उल्ट्याउने षड्यन्त्र र कसरत भइराखेको पनि अध्यक्ष प्रचण्डले टिप्पणी गरे। संसद् विघटनको घटना सामान्य घटना मात्रै नभइ ‘जनयुद्ध’ र जनआन्दोलनको बलमा आएका परिवर्तनलाई उल्ट्याउने षडयन्त्रको हिस्सा भएको प्रचण्डको टिप्पणी छ।
‘अहिले हामीले दश वर्षको ‘जनयुद्ध’मा कायम गरेका कीर्तिमानहरू र त्यसले ल्याएका निकै ठूलो युगान्तकारी परिवर्तनहरू जसको संकेन्द्रीत अभिव्यक्ति चाहिँ संघीय लोकतान्त्रिक गणतन्त्रको रुपमा एउटा समावेशी लोकतन्त्रको रुपमा संविधानमा लिपीबद्ध गरिएको छ’, उनले भने, ‘त्यो संविधानमाथि फेरि एकचोटी बडो निर्मम ढंगले प्रहार गर्ने कसरत प्रतिक्रियावादी वर्गले, प्रतिक्रियावादी वर्गका प्रतिनिधिहरुले गरे।’
प्रचण्डले सर्वोच्च अदालतले फागुत २३ गते नेपाल कम्युनिष्ट पार्टी (नेकपा) खारेज गर्ने फैसलाको विरुद्धमा पुनरावलोकनमा गएको भन्दै सर्वोच्चले आफ्नो फैसलालाई पुनरावलोकन गर्ने विश्वास व्यक्त गरे।
‘आजै मैले पार्टी अध्यक्षको हैसियतले अस्ति २३ गते फागुनमा अदालतले गरेको निर्णय पार्टीलाई दुईटा बनाइदिने अलि अप्राकृतिक र अस्वभाविक निर्णयका विरुद्ध पुनरावलोकन भनेर सर्वोच्च अदालतमा दर्ता गरेर आएका छौँ’, उनले भने, ‘यो एउटा लडाइँ हो। यो एउटा वैधानिक खालको कानुनी किसिमको लडाइँ हो। त्यसकारण सर्वोच्चले पक्कै पनि यसलाई रिभ्यु गर्नेछ। पहिलापनि रिभ्यु गरेका उदाहरणहरु छन्।’
प्रचण्डले एमालेका नेताहरु झलनाथ खनाल र माधवकुमार नेपाल लगायतका नेताहरू पनि पुनरावलोकनको पक्षमा रहेको भन्दै पुनरावलोकनको पक्षमा रहेको बहुमतलाई सर्वोच्चले ध्यान दिनुपर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
