काठमाडौं– प्रधानमन्त्री केपी शर्मा ओलीले संसदसँग बदला लिइरहेको आरोप नेपाली कांग्रेस नेता गगन थापाले लगाएका छन्।
उनी रहेसम्म संसद बन्दी बनिरहने र यसको अपमान बढिरहने पनि उनको भनाइ छ। उनले भने, ‘जति दिन यो सरकार रहन्छ, संसद्को तिरस्कार, अपमान र उपेक्षा गर्ने काम बढ्दै जान्छ । किनकि, प्रधामनामन्त्रीलाई यो संसदसँग बदला लिनु छ।’
आफूले गरेको प्रतिनिधि सभा विघटन ठीक रहेको स्थापित गर्न उनले अनेक प्रपञ्च गरिरहेको आरोप प्रनिनिधि सभा बैठकमा बोल्दै थापाले लगाए। उनले भने, ‘अहिले प्रतिनिधी सभा भंग गर्ने सनक सही थियो भन्ने स्थापित गर्न संसदलाई कामविहीन बनाउने प्रपञ्च उहाँले गर्नुभएको छ।’
आफू संसद्मा काम गर्न तयार रहेको तर सरकारले काम नदिएको तथ्य उनले उजागर गरे। उनको प्रश्न छ, ‘एसिड आक्रमण गर्नेलाई सजाय दिन कानुन बनाउन दिइएन भनेर हल्ला गर्ने तर संसदलाई एउटा पनि विधेयक नदिने? कानुन बनाउनका लागि चाहिने राष्ट्रिय सभाको बैठक पनि नबोलाउने?’
उनले कहिले प्रश्न छल्न हठात् बैठक स्थगित गर्ने गरेको र कहिले पार्टीभित्रको विरोधी तह लगाउन प्रतिनिधि सभा विघटन गरेका उदाहरण पनि प्रस्तुत गरे। सांसदहरु संसद्को गरिमा कायम राख्न डट्नुपर्ने उनको भनाइ छ। त्यसपछिको जिम्मा जनतामा छाड्नुपर्ने उनले बताए।
‘जनताले यसको हिसाबकिताब गर्नेछन्,’ उनले भने, ‘ यो संसद् र सांसदको अपमान यो लोगो लगाउने केहीको अपमान तिरस्कमार र उपेक्षा होइन। यो ती जनताको अपमान हो जसले संसद बनाए, जसले सांसद बनाएको छ हामीलाई। यसको बदला जनताले लिनेछन्।’
के भने गगन थापाले?
कहिले प्रश्न छल्न हठात् बैठक स्थगित, कहिले पार्टी भित्रको बिरोधी तह लगाउन संसद भंग। अनि, अहिले प्रतिनिधि सभा भंग गर्ने सनक सही थियो भन्ने स्थपित गर्नका लागि संसदलाई कामविहीन बनाउने प्रपञ्च। यो विधेयक अधिवेशन हो। हामी काम गर्न तयार छौँ। एसिड आक्रमणकारीलाई नियन्त्रण गर्ने कानुन बनाउन दिएन भनेर हल्ला गर्ने तर, संसदलाई एउटा विधेयक पनि नदिने।
अनि, विधेयकलाई कानुन बनाउनका लागि चाहिने राष्ट्रिय सभाको बैठक पनि नबोलाउने। हामी स्पष्ट छौँ, जति दिन यो सरकार रहन्छ संसदको तिरस्कार र अपमान उपेक्षा गर्ने काम अक्षै बढ्दै जान्छ। किनकि प्रधानमन्त्रीलाई यो संसदसँग बदला लिनु छ। हामी हाम्रो ठाउँबाट डटेर संसदको गरिमा कायम राख्नका निम्ति लड्ने छौँ। बाँकी जिम्मा जनताको हो।
यथोचित समयमा जनताले यसको हिसाबकिताब गर्नेछ। किनकि यो संसद र सांसदको अपमान, यो लोगो लगाउने केही थान सांसदको अपमान, तिरस्कार र उपेक्षा हैन। यो ती जनताको अपमान हो, जसले यो संसद बनाएको छ। जसले हामीलाई सांसद बनाएको छ। आफ्नो अपमानको बदला जनताले यथोचित समयमा लिनेछन्। यो संसदभित्र बसेर यसको गरिमा जोगाउन हामी आफ्नो ठाउँबाट डटेर लड्नेछौँ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773902187.png)
-1764146706.png)
-1773837959.png)
