काठमाडौं- नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आफूले पहिचान र अधिकारको मुद्दा नछोडेको दाबी गरेका छन्।
आइतबार माओवादीको केन्द्रीय कार्यालय पेरिसडाँडामा दलित मुक्ति मोर्चाद्वारा आयोजित ५६औं अन्तर्राष्ट्रिय जातिभेद उन्मुलन दिवस (२१ मार्च) र नेपाली दलित आन्दोलनको कार्यदिशा विषयक अन्तरक्रिया कार्यक्रममा बोल्दै प्रचण्डले अधिकार र पहिचानको मुद्दा नछोडेको दाबी गरेका हुन्।
दलित र महिलालाई विशेषाधिकार दिनका निम्ति आफूले पहल गरेको पनि उनको भनाइ छ। विशेषाधिकारबिना महिला र दलितहरू वास्तविक अर्थमा अधिकारसम्पन्न हुने अभियानमा प्रतिस्पर्धा गर्न सक्दैनन् भनेर संविधान सभाको ‘माइन्युट’मा नै ‘नोट अफ डिसेन्ट’ राखि भविष्यमा यसको निम्ति आन्दोलन गर्ने बाटो खुला राखेको उनले बताए।
‘तपाईंहरूलाई लाग्दो हो, प्रचण्डले हाम्रा मुद्दा छोडेको हो कि! त्यो चाहिँ साँचो होइन। मैले आन्दोलनको बलबाट र आजको राजनीतिक परिस्थितिमा प्राप्त हुनसक्ने जति अधिकार चाहिँ लिने र बाँकी अधिकारको निम्ति आन्दोलन जारी राख्ने नीति लिएको हो’, उनले भने, ‘एउटा गतिशील र परिवर्तनशील दस्तावेजको रुपमा संविधान संशोधनको माध्यमबाट परिमार्जन गर्दै लैजाने र उत्पीडितहरूको अधिकार र पहिचानलाई स्थापित गर्दै लैजाने बाटो अपनाएको मात्रै हो। तपाईंहरूले गहिरो गरी विचार गर्नुभयो भने यो कुरा बेठिक भनेर बहस गर्ने ठाउँ हुन्छ भन्ने मलाई लागेको छैन।’
प्रचण्डले संविधानमा दलित, महिला, मधेशी, आदिवासी, जनजातिलाई अधिकार दिएको कतिपयलाई मन नपरेका कारण संविधान च्यात्न लागेको बताए। नेपालको संविधान स्वीकार गर्न नसक्ने देशी/विदेशीहरूले प्रधानमन्त्री केपी शर्मा ओलीलाई प्रयोग गरेर संविधान र गणतन्त्र सिध्याउन खोजिएको उनको आरोप छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
