काठमाडाैं–नेकपा (एमाले) का उपाध्यक्ष एवम् पार्टी एकता राष्ट्रिय अभियानका संयोजक वामदेव गौतमले आफूले अध्यक्ष तथा प्रधानमन्त्री केपी शर्मा ओलीको अगाडि आत्मसमर्पण नगरेको बताएका छन्।
आफ्ना सचिवालय सदस्यमार्फत शनिबार साँझ आफ्ना धारणा सार्वजनिक गर्दै गौतमले आफूलाई अझै पनि एकताकै पक्षमा रहेको चर्चा गरेका छन्।
‘केपी ओली एमाले अध्यक्ष हुनुहुन्छ, त्यसलाई समूह भन्न मिल्दैन। तर उहाँको कार्यशैली गलत छ,’ गौतमले भनेका छन्, ’उहाँका अगाडि मैले आत्मसमर्पण गरेको छैन र गर्ने पनि छैन।’
शुक्रबार माधव नेपाल पक्षको अखिल नेपाल किसान महासंघको कार्यक्रममा पनि उपस्थित भएका गौतम शनिबार सम्पन्न एमाले संसदीय दलको बैठकमा पनि सहभागी भएका थिए। संसदीय दलको बैठकमा सहभागी भएका गौतम केन्द्रीय कमिटीको बैठकमा बसेनन्।
गौतमले फागुन २८ गते बालुवाटारमा सम्पन्न भएको एमाले केन्द्रीय कमिटीको बैठकलाई मान्यता दिन नहुनृ पनि बताएका छन्। सो दिन भएका सबै निर्णय फिर्ता लिनुपर्ने अडानसमेत उनको छ।
उनले बैठकमै उपस्थति नभएका नेतालाई गरिएको भनिएको कारवाहीप्रति पनि आपत्ति जनाएका छन्। उपस्थित नै नभएका नेतामाथि स्पष्टीकरण या कारवाही दुवै गर्न नमिल्ने उनको भनाइ छ।
गौतमको धारणा :
१) फागुन २८ को बैठक केन्द्रीय कमिटीको थिएन। त्यसले गरेका निर्णय फिर्ता लिनै पर्छ।
२) पार्टी भित्र रहेका कमरेडहरुलाई उहाँहरुको अनुपस्थितिमा कुनै कारवाही गर्न मिल्दैन ।
३) केपी ओली एमाले अध्यक्ष हुनुहुन्छ। त्यसलाई समूह भन्न मिल्दैन। तर उहाँको कार्यशैली गलत छ। उहाँका अगाडि मैले आत्मसमर्पण गरेको छैन। गर्ने पनि छैन।
४) म पार्टी एकता राष्ट्रिय अभियानमा छु। उद्देश्य पूरा नहुँदासम्म अभियान जारी रहने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
