फाइल तस्बिर
काठमाडौं- नेकपा (एमाले) दुई पक्षमा विभक्त छ। समानान्तर गतिविधि भइरहेका छन्। प्रधानमन्त्री केपी शर्मा ओली र वरिष्ठ नेताद्वय झलनाथ खनाल र माधवकुमार नेपाल पक्ष एकअर्कासँग अलग्गिदै गइरहेको देखिन्छ। तत्कालीन नेकपा विभाजन हुँदा नै एकता अभियान भनेर छुट्टै बसिरहेका एमाले उपाध्यक्ष वामदेव गौतम शुक्रबार खनाल-नेपाल पक्षीय अखिल नेपाल किसान महासंघको कार्यक्रममा सम्बोधन गर्न पुगे। त्यहाँ पुगेर उनले पार्टीभित्रै रहेर ओलीविरुद्ध संघर्ष गर्नुपर्ने धारणा राखेका छन्। एमाले उपाध्यक्ष गौतमसँग नेपाल लाइभकर्मी वीरेन्द्र ओलीले गरेको संक्षिप्त संवाद:
तपाईंको एकता अब अभियान कुन रुपमा अघि बढ्छ?
अभियानलाई व्यापक बनाएर लैजाने निर्णय गरेका छौं। त्यसका लागि सबैभन्दा पहिले वाम सरकारका लागि पहल गर्छौं। वाम सरकार भनेको एमाले र माओवादी केन्द्र नै हुन्। यी दुवै मिले भने वाम सरकार बन्यो। हाम्रो अभियान त्यत्तिमा सीमित छैन। नेपालमा जति कम्युनिस्ट छन्, ती सबैको मोर्चा बनाउने विषय पनि छ। त्यसकै ‘ब्याकिङ’मा वाम सरकार अघि बढ्नेछ।
अदालतको निर्णयबाट नेकपा दल बन्यो। अब एमाले फुटेर तीन दल हुन लागे जस्तो देखिन्छ। तपाईंले भनेजस्तो कसरी सम्भव होला र?
तीन/चार भए पनि सरकार बनाउँदा मिल्ने भनेरै त वाम सरकार भनेको हो। जतिसुकै कम्युनिस्ट हुन्, वाम सरकार बनाउन सकिन्छ त! नेकपा विभाजित भएर अहिले दुई पार्टी भएको छ। दुई दल बनिसकेपछि केपी ओलीको अदूरदृष्टि निर्णय भए। त्यसैकारण माधव-झलनाथ एउटा र केपीको अर्को समूह देखिएको छ। म दुवै पक्षलाई मिलाउने पक्षमा छु। हाम्रो एकता अभियानले मिलाउने कार्यलाई प्राथमिकता दिएको छ।प्रधानमन्त्री ओली त मिलाउनेभन्दा पनि फुटाउने दिशामा लाग्नुभएको भनिन्छ। संसद पुन:स्थापनापछि राजीनामा नदिएपछि आलोचना पनि भएको छ।
पार्टी मिलाउने दिशामा उहाँ नभएकैले निकास नपाएको हो?
त्यही त उहाँले त्यस्तो नगरेको भए एकताको आवश्यकता पर्ने नै थिएन नि! केपी पक्षमा रहेका अधिकांश कार्यकर्ता एकताको पक्षमा छन्। त्यसकारण एकताको अभियान सफल हुन्छ।
पार्टीभित्रको विवाद अन्त्यका लागि प्रधानमन्त्रीले के-के गर्नुपर्छ?
सबैसँग वार्ता गर्नुपर्छ। फागुन २८ मा आफ्नो पक्षका केन्द्रीय सदस्य मात्रै बोलाएर निर्णय गर्नुभएको छ। फर्मान जारी गरी निर्णय गर्नुभयो। ती निर्णय फिर्ता लिनुपर्छ।
प्रतिनिधि सभा पुन:स्थापनापछि प्रधानमन्त्रीले राजीनामा दिनुपर्थ्यो भन्ने मत पनि आइरहेको छ। यसमा तपईंको धारणा के हो?
नैतिकता त मान्नेहरुको लागि हुने रहेछ। त्यो नैतिकता मान्दिनँ भने पनि उहाँलाई फरक नपर्ने रहेछ।
तपाईंमाथि आरोप पनि छ, ओलीविरुद्धको गठबन्धनमा अन्तिमसम्म रहनुभयो। पार्टी फुटाउन तपाईंको पनि भूमिका रह्यो भन्छन् नि?
त्यस्तो कुरा जसले देखेकाे छैनन्, सुनेका छैनन् उनीहरूले भन्ने हो। म त एकताको पक्षमा छु। मैले फुटाएर फुटेको भन्छन् भने तीभन्दा नादान कोही छैनन्। म त सधैँभरि फुट हुनहुन्न भन्ने हुँ नि। हामीले गरेको संघर्ष केपी ओलीलाई सच्याउनका लागि हो।
अविश्वासको प्रस्तावको दुईवटा तयारीलाई मैले असफल बनाएँ। तेस्रोपटक ल्याइएको अविश्वास दर्ता पनि भयो। त्यो मलाई थाहा दिइएन। त्यसलाई मैले रोक्न सकिनँ। मेरो बोली सुन्न र हेर्न नचाहनेले पार्टी फुटाएको मलाई भन्छन्। फुटे फुट्छ भन्ने अनि, मैले फुटाएको भन्न नसक्ने, यिनै नादानहरु हुन्। असक्षम नेताहरु हुन्।
अदालतको आदेशपछि नेकपा दुई टुक्रा भयो, हेर्दा हेर्दै अब तीन टुक्रा हुनेभयो है?
अहिले त नेकपा माओवादी केन्द्र र एमाले भएका छन्। तर, एमालेभित्र विभाजनको खतरा छ।
एमाले जोगाउन के गर्ने?
संवाद गर्ने, सरसल्लाह गर्ने र एकअर्काको उत्पात विरोध नगर्ने।
अब देशले निकास कसरी पाउँछ?
वाम सरकार निर्माण गर्नुपर्छ। ओलीकै नेतृत्वमा हुन्न भने माओवादी केन्द्रले समर्थन फिर्ता लिएर भए पनि अर्को सरकार बनाउनुपर्छ।
केपी ओलीले त राजीनामा दिन्नँ भनिहरनुभएको छ?
उहाँलाई त आफू नमर्दासम्म प्रधानमन्त्री भइरहन्छु भन्ने लाग्छ। त्यो सम्भव होला कि नहोला! उहाँले विश्वासको मत लिन्छु भन्नुभएको छ। त्यो लिने प्रयास गर्नुहोला। पाउनुभएन भने एक महिनामा राजीनामा गर्नैपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
