काठमाडौं- आफू पक्षको राष्ट्रिय कार्यकर्ता भेलामा अवधारणा पत्र पेश गर्दै माधवकुमार नेपालले प्रधानमन्त्री तथा एमाले अध्यक्ष केपी शर्मा ओलीको आलोचना गरेका छन्। अवधारणा पत्रमा नवौं महाधिवेशनयता ओलीका व्यवहारको चित्रण गरिएको छ।
'नेकपा (एमाले)को नवौँ महाधिवेशनमा केपी ओलीको पक्षमा नरहेकाहरुलाई काम नदिने, एक्ल्याउने र अपमानित गर्ने काम हुँदै गए। उहाँका क्रियाकलाप आफू नै सरकार र आफू नै पार्टी हो भन्ने स्थापित गर्न केन्द्रित रहे', अवधारणा पत्रमा उल्लेख छ।
ओली नेतृत्वको अघिल्लो सरकार वस्तुतः वामपन्थी चरित्रको भएको र कुशलतापूर्वक चलाउन सकेको भए वामपन्थी नेतृत्वकै सरकारले स्थानीय, प्रतिनिधि सभा र प्रदेश सभाका निर्वाचन गराउँदै अगाडि बढ्ने सम्भावना भएको उल्लेख छ। 'तर, केपी ओलीले सहमतिको पालना र नेतृत्व गर्न नसक्दा, आफ्नै नेतृत्वमा बाहेक अरुले नेतृत्व गरेको सरकारमा नेकपा (एमाले)लाई जान नदिने अडान लिनु भएपछि नेकपा (एमाले) सरकारबाट बाहिरिनु पर्यो', अवधारणा पत्रमा उल्लेख छ।
नाकाबन्दीको सामना गरेको मुलुकको प्रधानमन्त्रीका रुपमा केपी ओलीको लोकप्रियता बढेपछि उनमा व्यक्तिवादी, स्वच्छन्दतावादी प्रवृत्ति चुलिँदै गएको बताइएको छ।
ओलीले आफू प्रधानमन्त्री बन्नका लागि वामपन्थीहरुबीच सहकार्यको प्रस्ताव ल्याएको अवधारणा पत्रमा उल्लेख छ। 'तापनि कम्युनिस्टहरुबीच सहकार्यको प्रस्ताव आफैंमा उचित भएको हुँदा स्थायी कमिटीले त्यस प्रस्तावलाई पारित गर्यो', अवधारणा पत्रमा भनिएको छ।
त्यतिबेला वामपन्थी सहकार्यको पक्षमा आएको जनमतको आडमा पार्टीभित्र ओलीले मनमौजी जारी राखेको आरोप लगाइएको छ।
निर्वाचन परिणाम वाम गठबन्धनको पक्षमा आएपछि ओलीले आफ्नो निजी सामर्थ्यमा बृद्धि भएको ठान्न थालेको र एक्लै निर्णय गर्ने उनको कार्यशैली अझ बढेको भनिएको छ। त्यस्तै, ओलीले नेकपा (माओवादी केन्द्र) सँग पार्टीको सिद्धान्त, नाम, सङ्गठनात्मक व्यवस्थालगायत कैयन् विषयमा एकलौटी सम्झौता गरेको र अचानक पार्टी एकताको प्रस्ताव ल्याएको भनिएको छ।
'पार्टीको कार्यकारी अध्यक्ष र प्रधानमन्त्रीसमेत नेकपाका दुईजना अध्यक्ष कमरेड ओली र पुष्पकमल दाहाल 'प्रचण्ड'ले आलोपालो गर्ने ‘गोप्य’ सम्झौतासमेत गर्नुभयो', उनले भने, 'यसरी एकातिर कम्युनिष्ट आन्दोलनले ऐतिहासिक उपलब्धिहरु प्राप्त गर्ने सम्भावनाका ढोकाहरु खुल्दै गएका थिए भने त्यसको नेताका रुपमा कमरेड ओलीको व्यक्तिकेन्द्रित चरम गुटबन्दीपूर्ण कार्यशैलीले पार्टीलाई क्रमशः समस्याग्रस्त बनाउँदै गयो।'
पार्टी एकताद्वारा संसदमा झण्डै दुइतिहाई बहुमत भएपछि ओलीको व्यवहार अझै बढी एकाङ्गी बन्दै गएको अवधारणा पत्रमा उल्लेख छ। 'पार्टी एकताको घोषणा गर्न डाकिएको बैठक जसरी हतार–हतार सञ्चालन गरियो र कहिल्यै छलफल नभएका अजेण्डा जसरी घुसाइयो, त्यहीँदेखि एकीकृत पार्टी जीवन समस्याग्रत हुँदै जाने अनुमान गर्न सकिन्थ्यो', भनिएको छ, '३ महिनाभित्र एकीकरणका सबै काम सम्पन्न गर्ने भनेर घोषणा गरिए पनि एकीकरण प्रक्रियालाई सुनियोजित रुपले ढिला गरियो, जिल्लासम्मको नेतृत्व मनमौजी तोक्ने जुन प्रयास र कामहरु भए त्यसले पार्टी बनाउने होइन बरु भएकै पार्टी विघटन गर्ने उद्देश्य देखिँदै गयो। स्थायी कमिटीका हरेकजसो बैठकमा ती विषयमा छलफलको माग गरियो तर छलफल नै हुन दिइएन।'
कोभिड-१९ को संक्रमणबाट आक्रान्त जनतालाई राहत दिन पार्टीले अभियान चलाउनु पर्छ भन्ने प्रस्तावलाई समेत निन्दा गरिएको आरोप लगाइएको छ। 'प्रधानमन्त्रीले आफूलाई ‘जनताले चुनेको प्रधानमन्त्री’ भएको हुँदा पार्टीप्रति कुनै जवाफदेही नभएको भाषण गर्न थाल्नु भयो। भ्रष्टाचारमा मुछिएका व्यक्तिहरुलाई उहाँले गर्नु भएको संरक्षणले ‘भ्रष्टाचारप्रति शून्य सहनशीलता’ जस्ता नारालाई हास्यास्पद बनाइदियो। सुशासनको पक्षमा उठेका आवाजलाई उहाँले आफूलाई असफल पार्न गरिएको षडयन्त्र देख्नुभयो', अवधारणा पत्रमा उल्लेख छ।
ओली पार्टी कमिटीमा र संसदीय दलमा अल्पमतमा पर्दै गएपछि र सबैतिर असफल हुँदै गएपछि आफ्ना असफलता ढाक्न संविधान विपरीत प्रतिनिधि सभा भंग गर्ने निर्णयमा पुगेको अवधारणा पत्रमा उल्लेख छ। 'वस्तुतः त्यो कदम ठूलो मूल्यमा बनेको र रक्षा गरिएको संविधानको विरुद्ध, हाम्रो लोकतान्त्रिक स्थिरताको विरुद्ध र कम्युनिस्ट पार्टी र आन्दोलनकै विरुद्धको आक्रमण थियो', अवधारणा पत्रमा भनिएको छ।
अदालतको फैसलापछि नवौँ महाधिवेशनले गरेका निर्णयका वरिपरि रहेर एकताभन्दा अगाडिको विन्दुबाट पार्टी जीवनलाई सुरु गर्नुपर्ने र त्यसका लागि ओलीका विभाजनकारी तथा फुटपरस्त चिन्तन, शैली र व्यवहारलाई परास्त गर्नुपर्ने आवश्यकता बोध गरिएको छ।
'अध्यक्ष केपी ओलीका निजी महत्वाकांक्षाका कारणले हाम्रा उपलब्धिहरु गएका केही महिनामा एकपछि अर्को गरी गुम्दै गएका छन्। पार्टी एकता असफल भएको छ, गठबन्धनको सम्भावनासमेत कमजोर हुँदै गएको छ, संसदमा एउटा कम्युनिष्ट पार्टीको बहुमत गुमेको छ र संविधानलाई ठूलो चोट लागेको छ। र, बाँकी बचेको नेकपा (एमाले)को एकतामाथि समेत खतरा आइपरेको छ। यसरी पार्टीमाथि आइपरेको यो चुनौती अर्को हिसाबले मुलुकको लोकतान्त्रिक स्थिरतामाथि आइपरेको चुनौती बनेको छ', अवधारणा पत्रमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1780051139.JPG)
-1764146706.png)
