काठमाडाैं- जनता समाजवादी पार्टी (जसपा) का शीर्ष नेताहरू प्रधानमन्त्री केपी शर्मा ओलीलाई भेट्न बालुवाटार पुगेका छन्। उनीहरूबीच बालुवाटारमा छलफल चलिरहेको छ।
जसपाका पदाधिकारीहरुको बिहीबारको बैठकले सत्ता सहकार्यका लागि तीनवटै पार्टी, नेकपा एमाले, नेपाली कांग्रेस र नेकपा माओवादी केन्द्रसँग छुट्टाछुट्टै वार्ता गर्ने निर्णय गरेको थियो। साेही अनुसार प्रधानमन्त्री ओलीसँगको भेटवार्ता तय भएको हो।
जसपा नेता केशव झाका अनुसार शीर्ष पाँच नेता, अध्यक्ष महन्थ ठाकुर, उपेन्द्र यादव, संघीय परिषद् अध्यक्ष डा बाबुराम भट्टराई, वरिष्ठ नेता राजेन्द्र महतो र अशोक राई बालुवाटर पुगेका छन्।
आजको पदाधिकारी बैठकले वर्तमान राजनीतिक संकटको अग्रगामी निकास र आफ्नो पार्टीका आधारभूत मान्यताबारे सबै राजनीतिक दलहरूसँग उच्चतहमा संवाद गर्ने निर्णय गरेको थियो।
जसपाले ओली सरकारलाई समर्थन गर्ने वा नगर्ने विषयमा अनिर्णित हुँदा वर्तमान राजनीतिक गतिरोध अन्त्य भएको छैन। नेकपा एमाले र नेपाली कांग्रेस तथा नेकपा माओवादी केन्द्र दुवै गठबन्धनको सरकार बनाउन पनि जसपा अत्यावश्यक भएकाले वर्तमान संकटको निकास खोज्न जसपा निर्णायक बनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
