काठमाडौं- नेकपा एमालेका वरिष्ठ नेता झलनाथ खनालले संसद्ले मुलुकलाई निष्कर्षतिर लैजानुपर्ने बताएका छन्। बुधबार प्रतिनिधि सभा बैठकमा सहभागी भएपछि पत्रकारहरूलाई प्रतिक्रिया दिँदै उनले संसद् राजनीतिक मञ्च भएको बताए।
'संसद्को पुनःस्थापना आफैंमा एउटा ऐतिहासिक घटना हो। पुनःस्थापना भएको छ। हामी विधिमा फर्किएका छौं। संविधानको मर्म र भावना अनुरुप अब अगाडि बढ्नुको कुनै विकल्प छैन,' खनालले भने, 'संसद् भनेको सबैभन्दा माथिको सर्वोच्च राजनीतिक मञ्च हो। देशका सम्पूर्ण राजनीतिक पार्टीहरूले, राजनीतिज्ञहरूले खेल खेल्ने ठाउँ यहीँ हो। अब नयाँ खेलको सुरुवात हुन्छ। नयाँ खेल कसरी हुन्छ भन्ने कुराको परिदृश्य तपाईंहरूले विस्तारै-विस्तारै देख्नुहुनेछ। तर मलाई लाग्छ संसद्ले एउटा राम्रो निष्कर्षतर्फ मुलुकलाई लैजानुपर्छ।'
उनले आफूले नेकपा एमालेको वरिष्ठ नेताको हैसियतले यो सरकार दुई वर्ष जानुपर्छ भन्ने ठानेको बताए। 'तर, अब संसद्को कुरा हो यो', उनले भने।
खनालले अहिलेको सरकारले अब आउने दुई वर्षको कार्यकाल राम्रो ढंगले पूरा गर्नुपर्ने भन्दै शुभकामना व्यक्त गरे। उनले सरकार जोगाउने दायित्व नेकपा एमालेको भएको बताए तर कुनै व्यक्तिले जोगाएर भने नजोगिने स्पष्ट पारे। 'कुनै व्यक्तिले जोगाएर जोगिँदैन। पार्टीले जोगाउन थालेपछि जोगिन्छ। व्यक्तिले जोगाएर केही पनि हुँदैन', उनको भनाइ थियो।
उनले तीन वर्षपछि एमालेको हैसियतमा संसद्मा छिर्दा रमाइलो लागेको बताए। 'नेकपा एमाले सधैंभरि वामपन्थी एकताको पक्षमा छ। वामपन्थीहरूलाई एकतावद्ध गर्नुपर्छ भन्ने पक्षमा छ। मुलुकको अग्रगति र प्रगतिको पक्षमा छ। हामी ती मुद्दाहरूलाई कहिले पनि छोड्दैनौं', उनले भने।
उनले एकीकृत भइसकेको पार्टीलाई फेरि विभाजित गरिनु दुर्भाग्यको कुरा भएको बताए। 'जे जे खेलबाट यो विभाजित भएको भए पनि वा हाम्रो गल्तीले विभाजित भएको भए पनि यो ठाउँमा आइपुगेका छौं', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772886919.png)
-1764146706.png)
-1772777462.png)
