फाइल तस्बिर
काठमाडौं- प्रधानमन्त्री केपी शर्मा ओलीले समय-समयमा नेपाली सेनालाई अनावश्यक ढंगले विवादमा तान्ने गरिएको बताएका छन्। संकीर्ण स्वार्थका लागि सेनालाई विवादमा तान्ने गरिएको उनको भनाइ छ।
बुधबार सिंहदरबारमा आयोजित राष्ट्रिय सुरक्षा परिषद् सचिवालयको वार्षिकोत्सव कार्यक्रममा सम्बोधन गर्दै प्रधानमन्त्री ओलीले सेनालाई विवादमा तान्न भएका प्रयासप्रति सजग रहन आग्रह गरेका हुन्। कानुन उल्लंघन भए सम्बन्धित निकायले हेर्ने भएकाले वादप्रतिवादमा नउत्रने संस्थालाई वादविवादमा तान्ने खालमा काम गर्नु उचित नहुने तर्क प्रधानमन्त्री ओलीको छ।
'आफ्ना संकीर्ण स्वार्थका लागि नेपाली सेनालाई अनावश्यक ढंगले विवादमा तान्न खोज्ने, अपमान वा 'प्रोभोक' गर्न खोज्नेलगायत विभिन्न खालमा प्रवृत्ति देखिन्छन् र नेपाली सेनालाई घिसारेर विवादमा ल्याउन खोज्ने। नेपाली सेनाका सदासयतापूर्ण र राम्रा क्रियाकलापमा पनि जस नदिने, श्रेय नदिने बरु कसरी त्यसको आलोचना गर्न सकिन्छ, विरोध कसरी गर्न सकिन्छ भनेर ठाउँ खोज्ने र अनुत्तरदायी ढंगले हिलो छ्याप्ने खालका कुराहरू उचाल्ने। त्यस्तो कुराहरू गर्न हुँदैन,' कार्यक्रममा सम्बोधन गर्दै प्रधानमन्त्री ओलीले भने, 'नेपाली जनताको चेतनालाई समय समयमा अलमल्याउन खोज्ने, भ्रममा हाल्न खोज्ने प्रयास पनि हुने गरेका छन्। हामी त्यस्ता प्रयासहरूसँग सर्तक हुनुपर्छ।'
सुरक्षा परिषद्को संवैधानिक कानुनी र व्यवहारिक रूपमा सही प्रयोग भइरहेको दाबी गरे। विशेषगरी प्रतिरक्षा र राष्ट्रिय सुरक्षाको मामिलामा नेपाली सेनाको परिचालन एवं प्रयोग सही ढंगले गर्ने सवालमा परिषद्ले महत्वपूर्ण भूमिका निर्वाह गरिरहेको उनले उल्लेख गरे।
'सुरक्षा परिषद्को संवैधानिक कानुनी र व्यवहारिक रूपमा सही प्रयोग भएको छ। यसले आफूलाई नीति निर्माणको तहमा र कार्यक्षेत्रमा खासगरी प्रतिरक्षा र राष्ट्रिय सुरक्षाको मामिलामा नेपाली सेना र सेनाको परिचालन एवं प्रयोग कसरी उपयुक्त ढंगले हुन सक्छ भन्ने नीतिहरू र अभ्यासका अनुभवहरूले हामीलाई परिमार्जित स्थितिमा पुर्याएको छ,' वार्षिकोत्सव कार्यक्रममा ओलीले थपे, 'हामी अहिले अन्यौलको स्थितिमा होइन, बहुतै स्पष्टताको स्थितिमा छौँ। विगतको अनुभवहरूलाई लिएर हामी अझ स्पष्टताका साथ अगाडि बढ्न जरुरी छ।'
तुलनात्मक रुपमा विश्वमा शान्तिको स्थिति भएपनि ठूलो सानो सबै राष्ट्रले अनुचित ढंगले प्रभाव विस्तारको मुद्दालाई अघि सारेको भन्दै उनले आफ्नो राष्ट्रिय हितको रक्षा गरिरहँदा अरुको राष्ट्रिय हितको कहीँ कतै उल्लंघन हुन्छ कि भन्ने कुरामा सबैले ध्यान दिनुपर्ने उल्लेख गरे।
'प्रतिरक्षा र सुरक्षाको विषय र सैन्य परिचालन सम्बन्धी प्रश्नहरूलाई मूलतः राष्ट्रहरूले दुई हिसाबले सोचेको पाइन्छ। प्रभाव विस्तार र सम्प्रभुताको रक्षा। हामी प्रभाव विस्तारको पक्षमा होइन हामी न्योचित सम्प्रभुताको रक्षा र शान्ति सुरक्षाको पक्षमा छौँ। ठूलो होस् वा सानो सबैले आफ्नो अनुचित ढंगले प्रभाव विस्तारमा होइन, न्यायोचित हकको रक्षामा सैन्य शक्तिको प्रयोग गर्नुपर्दछ भन्ने हामी ठान्दछौँ। कहीँ पनि अन्यथा ढंगले प्रयोग गरिनु उचित हुँदै होइन। कुनै पनि राष्ट्रले आफ्नो न्यायोचित हितको रक्षा र संवर्द्धनमा केन्द्रित गर्नुपर्छ। आफ्नो राष्ट्रिय हितको रक्षा गरिरहँदा अरुको राष्ट्रिय हितको कहीँ कतै उल्लंघन हुन्छ कि भन्ने कुरामा हरेक राष्ट्र सजग सचेत हुनुपर्छ। यसअर्थमा हामी ग्लोबली र सर्वकालिक ढंगले सही सिद्धान्त, नीति र व्यवहारमा छौँ।'
नेपाल सरकार सधै शक्तिको आडमा नभई सत्यको आडमा न्यायका कुरा स्थापित गर्न चाहने भएकाले सोही अनुसार प्रतिरक्षा र सुरक्षालगायत नीति तय गरिएको उनको भनाइ छ। राष्ट्रिय र प्राकृतिक विपतको समयमा नेपाली सेनाले नै अग्र भागमा बसेर काम गर्ने गरेको उल्लेख गर्दै उनले सुरक्षा, सेवा र निर्माण सम्बन्धी कामलाई समुचित र व्यवस्थित ढंगले अघि लैजाने कुराको व्यवस्थापन सुरक्षा परिषद्ले गर्ने बताए।
नेपाली सेनाको राष्ट्र निर्माण, सुरक्षा र प्रतिरक्षामा महत्वपूर्ण योगदान र गौरवपूर्ण इतिहास रहेको तथा अन्तर्राष्ट्रिय क्षेत्रमा पनि ख्याति कमाएको भन्दै उनले नेपाली सेनाको प्रशंशा गरे।
प्रधानमन्त्री ओलीले हिंसाको बाटोमा लागेकालाई शान्तिपूर्ण राजनीतिको मुलधारमा फर्काएकाले आन्तरिक हिंसा टुंगिएको र विखण्डनवादको पनि अन्त्य भएकाले नेपाल राष्ट्रिय एकताको शान्तिपुर्ण र नयाँ युगको उचाइमा प्रवेश गरेको बताए। समृद्ध नेपाल, सुखी नेपालीको राष्ट्रिय उद्देश्य र गन्तव्य प्राप्त गर्न सबै व्यवधानहरू हटेकाले अब नेपाल सजिलै समृद्धिको बाटोमा अघि बढ्ने विश्वास व्यक्त गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
