काठमाडौं- महोत्तरीको पिपरा गाउँपालिका-५, सहोडवाका एक दम्पती बेपत्ता भएको दुई साता बितिसक्दा समेत उनीहरूको अवस्थाबारे प्रहरीले कुनै जानकारी पाउन सकेको छैन। घरमै सुतिरहेको अवस्थामा वेपत्ता भएका उनीहरूको खोजी भएको दुई साता बित्यो, तर उपलब्धि भने शून्य छ।
फागुन १० गते ६५ वर्षीय मोसाफिर झा र उनकी ६० वर्षीया पत्नी गीतादेवी झा सहोडवास्थित आफ्नै घरमा सुतेका थिए। बेग्लाबेग्लै कोठामा सुतेका झा दम्पती भोलिपल्ट अबेरसम्म पनि उठेनन्। त्यसपछि उनीहरूको कोठामा बुहारी जाँदा दुवै जना कोठामा थिएनन्। कोठामा रगतका टाटा देखिएका थिए, तर विस्तरा भने थिएन।
मान्छे बेपत्ता हुनु र रगतका टाटासमेत देखिएपछि स्थानीयले प्रहरीलाई खबर गरेका थिए। प्रहरी टोली घटनास्थल पुग्दा रगतका टाटा थिए भने उनीहरूको विस्तरा थिएन। रगतका टाटा भेटिनु, विस्तरा हराउनुले घटना रहस्यमय भएको भन्दै प्रहरीले अनुसन्धानलाई तीव्रता दिएको थियो। तर, घटनाको दुई साता लाग्दा बित्दासमेत प्रहरीले कुनै उपलब्धि हासिल गर्न सकेको छैन।
घटना भएको दिन झा दम्पतीको घरमा उनीहरूसँगै बुहारी र नाति थिए। उनीहरूले समेत घटनाका बारेमा कुनै जानकारी नपाएको प्रहरीलाई बताएका छन्। घरका दुई जना सदस्य बेपत्ता हुँदा परिवारका सदस्यलाई समेत कुनै जानकारी नहुनुले घटना झनै रहस्यमय भएको विश्लेषण प्रहरीको छ।
सर्च अपरेसन ः दम्पतीले प्रयोग गर्ने झुल पोखरीमा भेटियो
झा दम्पती बेपत्ता भएपछि उनको खोजीका लागि प्रदेश २ प्रदेश प्रहरी कार्यालय र जिल्ला प्रहरी कार्यालय महोत्तरीको गरी ५० भन्दा बढी प्रहरी परिचालन गरेको प्रदेश २ का डिआइजी धीरजप्रताप सिंह बताउँछन्। 'घटना शंकास्पद देखिएपछि खोजीका लागि ५० भन्दा बढी प्रहरी परिचालन गरिएको छ। तर, अहिलेसम्म अवस्था भने केही जानकारी हुन सकेको छैन,’ डिआइजी सिंहले नेपाल लाइभसँग भने।
प्रहरीले सर्च अपरेसन चलाएपछि फागुन १४ गते उनीहरूले प्रयोग गर्ने २ वटा झुल भने पोखरीमा फेला पारेको छ। झा दम्पतीको घरभन्दा करिब ८ सय मिटर टाढाको एक पोखरीमा उनीहरूले प्रयोग गर्ने दुई वटा झुल भेटिएको डिआइजी सिंहले बताए।
पोखरीमा झुल भेटिएपछि दम्पतीको हत्या गरेर फालिएको हुनसक्ने भन्दै प्रहरीले महोत्तरी र धनुषाका ५० वटा पोखरीमा समेत जाल हानेर खोजी गरेकाे महोत्तरीका एसपी टीकाबहादुर केसी बताउँछन्। झाडी, खोला, पोखरीमा समेत उनको खोजी तीव्र पारिए पनि दम्पतीको अवस्था पत्ता लाग्न सकेको छैन।
झा दम्पतीसँगै उनीहरूले प्रयोग गर्ने झुल, तकिया बिस्तरा समेत हराएको थियो। उनीहरूले प्रयोग गर्ने बिस्तरा समेत हराएपछि झनै शंका गर्ने ठाउँ देखिएको डिआइजी सिंह बताउँछन्। ‘अपहरण नै भएको वा अरु कुनै घटना भएको हो भने किन विस्तरा समेत लैजानु पर्यो र?’ डिआइजी सिंहले शंका गर्ने ठाउँ रहेको तर्फ इकिंत गरे।
तीन कोणबाट अनुसन्धान
घटना भएको जानकारी पाउनासाथ तालिम प्राप्त कुकुरसमेत परिचालन गरेर प्रहरीले घटनाको अनुसन्धान गरेको थियो। कुकुरबाट समेत कुनै संकेत मिल्न सकेको थिएन। त्यसबेला रगतका टाटा देखिए पनि कुकुरले कुनै संकेत गर्न सकेको थिएन।
त्यसपछि भने दम्पती बेपत्ताबारे मुख्य गरी तीनवटा पाटोलाई केन्द्रमा राखेर अनुसन्धान भइरहेको डिआइजी सिंह बताउँछन्। सिंहका अनुसार पारिवारिक, व्यक्तिगत रिसिइबी र आर्थिक गरी तीन कोणबाट अनुसन्धान भइरहेको छ।
तीनै पाटाबारे विभिन्न टेक्निकल एनालाइसिस, म्यानुअल अनुसन्धान, सोधपुछ भइरहेको प्रहरीले जनाएको छ। झा दम्पती बेपत्ता हुनु वा पारिनुमा कुनै पारिवारिक कारण छ/छैन, उनीहरूको रिसिइबी कोही कसैसँग छ/छैन, वा कुनै आर्थिक कारण पो उनीहरूलाई बेपत्ता पारिएको हुनसक्छ भन्नेबारे समेत सुक्ष्म अनुसन्धान भइरहेको डिआइजी सिंह बताउँछन्।
चार जना पक्राउ, दर्जनौंसँग सोधपुछ
वृद्ध झा दम्पती वेपत्ता भएसँगै खोजी सुरु गरेको प्रहरीले दुई दर्जन व्यक्तिसँग सोधपुछ गरिसकेको छ। उनीहरूका आफन्त, स्थानीयसम्म सोधपुछ गरिएको छ। सो क्रममा शंकास्पद देखिएका चार जनालाई पक्राउ गरिएको डिआइजी सिंहले बताए।
सिंहका अनुसार रामबाबु यादव, उनका दुई छोरा र भारतीय नागरिक हरेन्द्र ठाकुरलाई पक्राउ गरेर अनुसन्धान सुरु गरिएको छ। उनीहरूका भनाइ एक आपसमा बाझिएको र शंका गर्ने ठाउँ देखिएकाले पक्राउ गरेर अनुसन्धान सुरु गरिएको सिंहले बताए।
यद्यपि, झा दम्पती बेपत्ता घटनामा उनीहरू संलग्न छन् वा छैनन् भन्नेबारे पुष्टि भने भइनसकेको प्रहरीले जनाएको छ। ‘अहिले अनुसन्धानका क्रममा शंकास्पद देखिएपछि पक्राउ गरेर अनुसन्धान गरिएको हो। झा दम्पती बेपत्तामा अहिले नै उनीहरू संलग्न छन्/ छैनन् भन्न सक्ने अवस्था छैन,’ डिआइजी सिंहले भने।
पक्राउ परेकाहरूको पोलिग्राफ समेत परीक्षण गरिएको र पोलिग्राफमा झुट बोलेको पाइएको प्रहरी स्रोतले जनाएको छ।
जग्गा विवादका साक्षी थिए झा, पेशीको अघिल्लो दिनबाटै वेपत्ता
बेपत्ता झा साक्षी बसेको एउटा जग्गाको विवाद भएको अनुसन्धानबाट खुलेको छ। झाको छिमेकीसमेत रहेका जग्गा व्यवसायी रामबाबु यादवसँग विवाद भएको थियो। झा जग्गाको साक्षी बसेका थिए। फागुन ११ गते जग्गा विवाद मुद्दाको पेशी थियो तर, झा दम्पती भने अघिल्लो रातिबाटै बेपत्ता भएका हुन्। सोही रिसिइबी साँध्न उनलाई बेपत्ता पारिएको हुनसक्ने भन्दै रामबाबु यादवसहितका मान्छेलाई प्रहरीले पक्राउ गरेर अनुसन्धान गरेको हो।
मालपोतको कर्मचारी समेत रहेका मोसाफिर झा मोहियानी जग्गा विवाद मुद्दाको साक्षी बसेका थिए। फागुन १० गते दुई व्यक्ति झाको घर आएर भोलि साक्षी बस्न जानुपर्ने भनेर बताएकोसम्म प्रहरी अनुसन्धानबाट खुलेको छ। ‘दिउँसो दुई मान्छेले भेटर साक्षी बस्न भोलि अदालत जानुपर्छ भन्ने बताए तर सोही राति उनीहरू बेपत्ता भएको देखिन्छ’, डिआइजी सिंह भन्छन्। झा दम्पती बेपत्तामा यो पाटोबाट अनुसन्धान आवश्यक देखिएपछि रामबाबुसहितका व्यक्तिलाई पक्राउ गरेर अनुसन्धान गरिएको प्रहरीले जनाएको छ।
बेपत्ता हुनु अघिल्लो दिनमात्रै झा दम्पतीले जग्गा बेचेको र सो वापत रकम समेत बुझेकाले उनीहरू वेपत्ता हुनुको पछाडि आर्थिक कारण पनि जोडिएको हुनसक्ने प्रहरी विश्लेषण छ। झा दम्पतीले १० धुर जग्गा साढे ७ लाखमा बेचेको पाइएको छ। त्यसबेला उनीहरूले ५ लाख रुपैयाँ भने बुझिसकेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769064009.png)
-1764146706.png)
