काठमाडौं- भारत सरकारले अप्रिल १ पछि बन्ने सबै कारमा अगाडि अनिवार्य एयरब्याग राख्नु पर्ने व्यवस्था गरेको छ। अगाडिका दुवै प्यासेन्जरलाई समेट्ने गरि एयरब्याग राख्नुपर्ने छ।
भारत सरकारले मार्च ५ मा कारको अगाडि चालक र प्यासेन्जर दुवैतर्फ एयरब्याग अनिवार्य राख्नुपर्ने निर्णय गरेको द इकोनोमिक टाइम्सले लेखेको छ। सवारी उत्पादकहरुले आगामी अप्रिल १, २०२१ देखि लागू हुनेगरि नयाँ कारमा चालक तथा प्यासेन्जरको सिटमा एयरब्याग राख्नुपर्ने छ।
त्यस्तैगरी, हाल उत्पादन भएका कारको हकमा भने २०२१ को अगस्ट ३१ सम्म बिक्री गर्न पाइने निर्याय भारत सरकारले गरेको छ। प्यासेन्जर कारको अगाडिका दुवै सिटमा एयरब्याग अनिवार्य गर्ने विषयमा भारतको सर्वोच्च अदालतले समेत राय दिएको थियो। सडक सुरक्षा अन्तर्गत यात्रुको सुरक्षाका लागि अपनाउनु पर्ने न्यूनतम उपाय अपनाउन अदालतले भनेको थियो।
तर, सवारी उत्पादकहरुले भने कारको फ्रन्टमा डुवल एयरब्याग राख्दा कारको लागत बढ्ने बताउँदै आएका छन्। भारतीय सवारी बिक्रेताहरुको संस्था फाडाले कोरोनाका कारण थलिएको कार बजार नयाँ निर्णयले थप प्रभावित हुने बताएको छ।
सुरक्षाका हिसाबले कारमा एयरब्याग हुनु राम्रो हो। कार दुर्घटनामा परिहाल्यो भने कारमा भएको एयरब्यागले यात्रुलाई बचाउन मद्दत गर्छ। भारतमा उत्पादित कारमा एयरब्याग अनिवार्य भएपछि नेपालमा आउने कार समेत सुरक्षित हुनेछ।
हाल नेपाली बजारमा उपलब्ध महंगा कारमा ५/७ वटासम्म एयरब्याग भएपनि इन्ट्रिलेवलका कारमा चालक साइडमा एयरब्याग भएपनि प्यासेन्जरको साइडमा थिएन। उत्पादन लागत बढी हुने भएकाले कार उत्पादकहरुले इन्ट्रिलेवलका कारमा एयरब्याग राख्ने गरेका थिएनन्।
नेपालमा सवारी सुरक्षा सम्बन्धी आफ्नै मापदण्ड छैन। भारत सरकारले निर्धारण गरेका सुरक्षा विशेषतालाई नै नेपाल सरकारले मान्यता दिएको छ। त्यसैले सुरक्षित सवारी प्रयोगका लागि भारतले गर्ने सुरक्षा मापदण्ड परिमार्जनकै लागि पर्खनुपर्ने अवस्था छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770979298.jpg)
-1764146706.png)
-1770562345.jpg)
