काठमाडाैं- प्रचण्ड-माधव पक्षका स्थायी कमिटी सदस्यहरुले सर्वोच्च अदालतले आइतबार गरेको फैसला राजनीतिक भएको टिप्पणी गरेका छन्। पेरिसडाँडामा जारी बैठकमा बोल्ने अधिकांश स्थायी कमिटी सदस्यले फैसलाप्रति असहमति जनाएकाे नेता रघुजी पन्तले बताए।
‘बैठकमा सर्वोच्चको फैसला सम्बन्धमा छलफल भयो। फैसला सम्मान गर्नुपर्छ तर अलि राजनीतिक भएको टिप्पणी भयाे। व्यक्तिगत रुपमा भन्दा यसमा सबैको असहमति भयो,’ पन्तले भने।
एकता प्रक्रिया जसरी सुरु भयो त्यो आफैंमा राम्रो भएको र यो नेपालको संविधानको रक्षा, लोकतन्त्रको सृदृढीकरण र नेपालको सार्वभौमिकताको रक्षाका लागि भएको तर्क राखेको उनले बताए।
‘त्यो एकतालाई जोगाएर जान सकिन्छ भने जानुपर्ने भनाइहरु आएका छन्,’ पन्तले भने, ‘फैसलापछि नयाँ परिपेक्ष आएको छ। यो एकता जोगाउन सकिन्छ भने अध्यक्षद्वय पुष्पकमल दाहाल 'प्रचण्ड' र केपी शर्मा ओलीले मिलेर एकताका लागि पुन: पहल गर्नुपर्ने कुरा आएको छ।’
बैठक चलिरहेको र स्थायी कमिटी सदस्यहरुले आफ्नो कुरा राखिरहेको उनले बताए। सर्वोच्चले नेकपा ऋषिराम कट्टेलको भएकाले यो नाम बदर गर्दै नेकपा एमाले र माओवादी केन्द्रको रुपमा ब्युँताउने फैसला सुनाएको थियो।
सर्वोच्चले एकता गर्न चाहेमा राजनीतिक दल सम्बन्धी ऐन अनुसार अघि बढ्न सक्ने र नचाहेमा अलग हुनसक्ने फैसलामा भनेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।