काठमाडौं–‘नेपाल राष्ट्र बैंक पुनर्कर्जा कार्यविधि २०७७’ संशोधन भएको छ। राष्ट्र बैंकले कार्यविधि संशोधन गर्दै १० मेगावाट उत्पादन क्षमताभन्दा साना जलविद्युत आयोजनालाई पनि विशेष पुनर्कर्जा सुविधा उपलब्ध गराउने व्यवस्था कार्यान्वयनमा ल्याएको छ।
निश्चित क्षेत्र तोकेर उपलब्ध गराइँदै आएको विशेष पुनर्कर्जा सुविधा अब साना जलविद्युत् आयोजनाले पनि पाउनेछन्। नेपाल राष्ट्र बैंकले कुनै क्षेत्र विशेषलाई विशेष प्राथमिकता दिने कर्जालाई पुनर्कर्जा मानिएको छ। यसअन्तर्गत यसअघि निर्यात, महिला उद्यमी, फरक ढंगले सक्षम व्यक्तिले संचालन गरेका उद्यम व्यवसाय, प्राकृतिक प्रकोपबाट प्रभावित क्षेत्र रहेका थिए। तर राष्ट्र बैंकले कार्यविधिको पहिलो संसोधनबाट १० मेगावाट भन्दा साना जलविद्युत आयोजनाहरुलाई पनि विशेष पुनरकर्जा सुविधा उपलब्ध गराउने भएको हो।
त्यस्तै राष्ट्र बैंकले कार्यविधिको संशोधन गर्दै पुनर्कर्जा सुविधाको सीमामा पहि हेरफेर गर्न सकिने व्यवस्था गरेको छ। यसअघि इजाजतप्राप्त संस्थालाई एकमुष्ट प्रदान हुने प्रतिग्राहक पुनर्कर्जाको अधिकतम सीमा ५ करोड थियो भने यसरी एकमुष्ट प्रदान गरिने पुनर्कर्जा रकम कुल पुनर्कर्जा प्रदान गर्न सकिने रकमको ७० प्रतिशतभन्दा बढी हुन नसक्ने व्यवस्था थियो।
त्यस्तै बैंकले ग्राहक अनुसार मूल्यांकन गरी उपलब्ध गराउने पुनर्कर्जा प्रतिग्राहक अधिकतम २० करोड रुपैयाँसम्म हुनसक्ने व्यवस्था थियो भने यसरी प्रदान गरिने पुनर्कर्जाको सीमा २० प्रतिशत बराबर मात्रै थियो। बाँकी १० प्रतिशत पुनर्कर्जा लघुवित्त वित्तीय संस्थाहरुले पाउँदै आएका थिए। यो सबै सीमालाई गभर्नरले पुनर्कर्जाको माग, आवश्यकता र औचित्यका आधारमा हेरफेर गर्न सकिने व्यवस्था अहिले राखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
