काठमाडौं– नेकपाका पुष्पकमल दाहाल ‘प्रचण्ड’ र माधवकुमार नेपाल पक्षले प्रधानमन्त्री केपी शर्मा ओलीविरुद्धको अविश्वास प्रस्ताव अघि बढाउने तयारी गरेका छन्। ओलीले आइतबारको प्रतिनिधि सभा बैठकबाट राजीनामा नदिए कांग्रेससँग समझदारी गरेर अविश्वास प्रस्ताव अघि बढाउने तयारी गरिएको हो।
अविश्वास प्रस्तावका लागि प्रचण्ड-माधव पक्षले अग्रसरता लिएको भए पनि प्रधानमन्त्रीमा भने कांग्रेस सभापति सभापति शेरबहादुर देउवालाई प्रस्ताव गरिने नेताहरुको भनाइ छ। यसअघि प्रतिनिधि सभा विघटन गरिएकै दिन अर्थात् पुस ५ गते प्रचण्ड-माधव पक्षले संसद् सचिवालयमा प्रधानमन्त्री ओलीविरुद्ध अविश्वास प्रस्ताव दर्ता गराएका थिए। तर अविश्वास प्रस्ताव दर्ता गर्दाको समयका कारण त्यो प्रस्ताव विवादित भएको थियो।
प्रतिनिधि सभा पुनःस्थापित भएपछिको नयाँ परिस्थितिमा भने प्रचण्ड-माधव पक्षले देउवालाई प्रधानमन्त्रीका लागि प्रस्ताव गर्दै आएका छन्।
सर्वोच्च अदालतले प्रतिनिधि सभा पुनःस्थापित गरिदिएपछि ओलीले राजीनामा दिने अपेक्षा गरिएको थियो। तर उनले राजीनामा नदिने बरु हटाएर देखाउन चुनौती दिने गरेका छन्। त्यसैले अविश्वासको प्रस्ताव पारित गरेर उनलाई थप नैतिक संकट सिर्जना गर्ने प्रयासमा नेकपाको एक पक्ष र कांग्रेसबीच छलफल अघि बढेको हो।
ओलीविरुद्ध अविश्वास प्रस्ताव अघि बढाउन प्रचण्ड–माधव पक्ष र कांग्रेस सभापति देउवा निकट नेताहरु सक्रिय भएका छन्। शनिबार दुवै पक्षका नेताहरुले भेटघाट गरेर प्रारम्भिक सहमति समेत गरेको बताइएको छ। तर औपचारिक सहमति भने नभएको माधव नेपाल निकट एक प्रभावशाली नेताले बताए। उनका अनुसार, शनिबार राति र आइतबार प्रतिनिधि सभा बैठकअघिसम्म दुवै पक्षबीच मौखिक वा लिखित रुपमै थप सहमति भई अविश्वास प्रस्ताव अघि बढ्न सक्छ।
देउवालाई भावी प्रधानमन्त्रीको रुपमा प्रस्तावित गरेर अघि बढ्न दुवै पक्ष सहमत भइसकेका छन्। शनिबारको छलफलमा भावी सरकारको मन्त्रालय भागबण्डाको विषयमा समेत छलफल भएको ती नेताले दाबी गरे।
देउवा निकट एक नेताले छलफल अघि बढेको भए पनि आइतबारको प्रतिनिधि सभा बैठकअघि अविश्वास प्रस्ताव अघि बढ्ने सम्भावना कम रहेको बताए। आइतबारको प्रतिनिधि सभाको बैठकपछि देखिने परिस्थितिलाई आकलन गरेर बाँकी विषयले मूर्तता पाउने उनको भनाइ छ।
प्रचण्ड–माधव पक्षका वरिष्ठ नेता झलनाथ खनालले सरकारको नेतृत्व गर्ने गरी कांग्रेसले सहमति जनाए अविश्वास प्रस्ताव अघि बढ्न समस्या नहुने बताए। आफूहरुसँग १११ सांसद भएकाले कांग्रेसले सहमति जनाए लगत्तै अविश्वास प्रस्ताव अघि बढ्ने र पारित हुने उनको भनाइ छ। ‘काग्रेस एउटा अविश्वसनीय शक्ति हो। काम गरेपछि मात्रै विश्वास गर्न सकिन्छ’, खनालले भने।
आफूहरुले कांग्रेसलाई नेतृत्व दिने विषय खुला रुपमै भनिसकेको खनालले बताए। शनिबार राति वा आइतबार दिउँसोसम्म राजनीतिक घटनाक्रममा केही नयाँपन आइसक्ने उनले बताए।
यस्तै, प्रचण्ड–माधव पक्षका प्रमुख सचेतक देव गुरुङले प्रधानमन्त्रीले राजीनामा दिने हल्ला चलाएकाले अविश्वास प्रस्ताव ल्याउनु नपर्ने हुने सक्ने बताए। ‘प्रधानमन्त्रीको अविश्वास प्रस्तावभन्दा अघि नै राजीनामा आउँछ भन्ने हल्ला चलाएका छन्। यदि प्रधानमन्त्रीको राजीनामा आए किन अविश्वास प्रस्ताव अघि बढाउनु पर्यो र?’, नेपाल लाइभसँग कुरा गर्दै गुरुङले भने, ‘भोलि नै अविश्वास प्रस्ताव अघि बढ्ने-नबढ्ने नेताहरुको कुरा हो। प्रधानमन्त्रीले राजीनामा दिएनन् भने अबको बाटो अविश्वास प्रस्ताव नै हो।’
अविश्वास प्रस्ताव जस्ता विषय राजनीतिक समझदारीमा चल्ने विषय भएकाले सोही अनुसार अघि बढिने उनले बताए। प्रधानमन्त्रीमा थोरै मात्रै नैतिकता भए राजीनामा दिएर पद छोड्दा राम्रो हुने उनको भनाइ छ।
नेकपा अध्यक्ष पुष्पकमल दाहाल ‘प्रचण्ड’ र माधवकुमार नेपाल प्रतिनिधि सभा पुनःस्थापनाको पक्षमा लागेका शक्तिहरु एक ठाउँमा उभिनुपर्ने पक्षमा छन्। ओली पक्ष प्रतिनिधि सभा विघटनको पक्षमा भएकाले विघटनको विपक्षमा सडक संघर्षमा भएका शक्तिहरु एक ठाउँमा उभिएर सरकारमा सहभागी हुनुपर्ने उनीहरुको भनाइ छ।
सरकारमा जाने वा नजाने भन्ने विषयमा जनता समाजवादी पार्टीमा दुई खेममा विभाजित भएकाले एक मत हुने सम्भावना कम देखिएको छ। जसपाभित्रको तत्कालीन राष्ट्रिय जनता पार्टी पक्ष यसअघि आफूहरुले उठाएको संविधान संशोधनको मुद्दा सम्बोधन भए मात्रै सरकारमा सहभागी हुने बताउँदै आएको छ। संविधान लेख्ने वेलादेखि नै आफूहरुले उठाएका आफ्ना माग पुरा गर्नेगरी सम्झौता भए मात्रै सरकारमा सहभागी हुने बताएको छ।
तर, जसपाभित्रको तत्कालीन समाजवादी पार्टी ओलीविरुद्धको मोर्चाबन्दीमा सहभागी हुनुपर्ने अडानमा छ। ओली सरकारमा हुँदा आफूहरुले हैरानी खेपेकाले त्यसलाई साटो फेर्न पनि सरकारमा जाने मुडमा देखिएको छ। पार्टीभित्र दुई पक्ष भएकाले अविश्वासको प्रस्तावमाथि यो पक्षको संलग्नता कस्तो रहन्छ, त्यो अहिल्यै आकलन गर्न कठिन छ।
ओलीले बालुवाटारमा बोलाएको आफू पक्षको दलको बैठकमा आफूसँग नेकपाका बहुमत सांसद रहेको दाबी गर्दै संसदमा अविश्वास प्रस्ताव दर्ता गरिए त्यसलाई फेस गर्ने बताइसकेका छन्। संसदीय दलको बैठकमा दलका नेता समेत रहेका ओलीले आफूले प्रधानमन्त्रीबाट राजीनामा दिनेबारे शब्द समेत उच्चारण नगरेको सांसद कृष्ण राईले बताए।
‘हामीसँग बहुमत सांसद हुनुहुन्छ। संसदमा म अविश्वासको प्रस्ताव फेस गर्छु, तपाईंहरू ढुक्क हुनुस्, जित हाम्रै हुनेछ’, ओलीलाई उद्धृत गर्दै सांसद राईले भने, ‘प्रचण्ड–माधव पक्षहरु किस्तीमा प्रधानमन्त्री पद राखेर कांग्रेसलाई लिइदिनुपर्यो भनेर बिन्ती चढाइरहनुभएको छ। कानुनी रुपमा एउटै रहेको पार्टीका साथीहरूले के भनिरहनु भएको हो, मैले बुझेको छैन।’
प्रतिनिधि सभामा नेकपाका १७४ सांसदमध्ये १७२ जना मतदान गर्न पाउँछन्। यसमध्ये प्रचण्ड–माधव पक्षले प्रतिनिधि सभाका ८७ ओली पक्षले ९१ दाबी गरेको छ। काग्रेससँग प्रतिनिधि सभामा कुल ६३ जना मध्ये २ जना निलम्बनमा भएकाले ६१ जनाले मात्रै मतदान गर्न पाउँछन्। सरकार बन्न १ सय ३८ जना सांसद चाहिन्छ। प्रचण्ड-माधव पक्ष र कांग्रेस एक ठाउँमा उभिए प्रधानमन्त्रीविरुद्धको अविश्वास प्रस्ताव पास हुनसक्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
