काठमाडाैं- प्रतिनिधि सभा विघटनअघिका ३२ वटा विधेयक अब प्रक्रियामा लगिने भएको छ। पुन:स्थापनापछि २३ गते बस्ने बैठकमा ३२ वटा विधेयक पेश गर्ने तयारी गरिएको छ।
नेपालको संविधान जारी भएपश्चात् २०७४ को आमनिर्वाचनपछि २०७४ फागुन २१ गतेदेखि संघीय संसद्को पहिलो अधिवेशन शुरुआत भएको थियो। सो समयदेखि हालसम्म विधेयक शाखा (प्रतिनिधि सभा) मा दर्ता भएका विधेयक ८७ रहेका छन्। तीमध्ये प्रमाणीकरण भएका विधेयक जम्मा ५३ रहेका छन् भने दर्ता भएपश्चात् तीन विधेयक सरकारले फिर्ता लिएको थियो।
हाल प्रतिनिधि सभामा प्रक्रियामा ३२ विधेयक रहेका छन्। तीमध्ये दर्ता भएर वितरण गरिएका आठ, समितिमा विचाराधीन १०, सभामा विचाराधीन १२ र राष्ट्रिय सभाबाट प्राप्त सन्देश पेश हुन बाँकी दुई विधेयक रहेको सचिवालयका सूचना अधिकारी दशरथ धमलाले बताए।
संघीय संसद्को पहिलो अधिवेशन २०७४ फागुन २१ गतेदेखि चैत २० गतेसम्म भएको थियो। संसद्को दोस्रो अधिवेशन २०७५ वैशाख २३ गतेदेखि असोज ११ गतेसम्म, तेस्रो अधिवेशन २०७५ पुस ११ गतेदेखि चैत १० गतेसम्म, चौथो अधिवेशन २०७६ वैशाख १६ गतेदेखि असोज २ गतेसम्म भएको थियो।
त्यस्तै, संसद्को पाँचाैं अधिवेशन २०७६ पुस ४ गतेदेखि चैत २४ गतेसम्म र छैटौँ अधिवेशन २०७७ वैशाख २६ गतेदेखि असार १८ गतेसम्म चलेको थियो। संघीय संसद्मा दुवै सभातर्फ दर्ता भएका सन्धी/सम्झौताको सङ्ख्या १४ छ। उक्त ६ सन्धी/सम्झौता दुवै सभाबाट अनुमोदन भएका छन् भने आठ सन्धी/सम्झौता सदस्यलाई वितरण मात्र भएका छन्।
प्रधानमन्त्री केपी शर्मा ओलीको सिफारिसमा गत पुस ५ गते राष्ट्रपति विद्यादेवी भण्डारीले प्रतिनिधि सभा विघटन गरेकी थिइन्। राष्ट्रपतिले वर्तमान प्रतिनिधि सभा विघटन गरी आउँदो वैशाख १७ र २७ गते गरी दुई चरणमा प्रतिनिधि सभाको निर्वाचन सम्पन्न गर्ने गरी मिति तोकेकी थिइन्। तर, सर्वाेच्च अदालतले यही फागुन ११ गते प्रतिनिधि सभा विघटनविरुद्धको मुद्दामा सुनुवाइपछि पुनःस्थापना गर्ने फैसला गरेको थियो।
फैसला सुनाउँदै अदालतले १३ दिनभित्र संसद् अधिवेशन बोलाउन परमादेशसमेत जारी गरेको थियो। अदालतको फैसलापछि सरकारले यही फागुन २३ गते प्रतिनिधि सभाको बैठक बोलाउन राष्ट्रपतिसमक्ष सिफारिस गर्ने निर्णय गरिसकेको छ। - भीष्मराज ओझा/रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
