काठमाडौं- नेपाल कम्युनिस्ट पार्टी (नेकपा)को प्रचण्ड–माधव पक्षका दुई अध्यक्षले जनता समाजवादी पार्टी, नेपालका नेताहरूसँग सत्ता सहकार्यबारे छलफल गरेका छन्।
बिहीबार बिहान नेकपाको केन्द्रीय कार्यालय पेरिसडाँडामा अध्यक्षद्वय पुष्पकमल दाहाल ‘प्रचण्ड’ र माधवकुमार नेपालले जसपाका उपलब्ध शीर्ष नेताहरूसँग छलफल गरेका हुन्।
छलफलमा जसपाका अध्यक्ष महन्थ ठाकुर, वरिष्ठ नेता राजेन्द्र महतो र नेता राजेन्द्र श्रेष्ठसँग सहभागी थिए। प्रतिनिधि सभा विघटन गर्ने प्रधानमन्त्री केपी शर्मा ओलीको निर्णयलाई सर्वोच्च अदालतले बदर गरिदिएपछि विकसित राजनीतिक घटनाक्रमबारे छलफल भएको जसपा नेता राजेन्द्र श्रेष्ठले बताए। प्रतिनिधि सभा पुनःस्थापना पछि अब नयाँ ढंगले कसरी अगाडि बढ्ने भन्ने विषयमा छलफल भएको उनले बताए।
छलफलमा प्रचण्ड–माधवले संघीय लोकतान्त्रिक गणतन्त्र पक्षरधर शक्ति मिलेर अगाडि बढ्नुपर्ने प्रस्ताव गरेका थिए। उनीहरूले सत्ता सहकार्यका विषयमा समेत छलफल गरेका थिए। प्रचण्ड–माधवको प्रस्तावमा सकारात्मक रहेका जसपा नेताहरूले पार्टीभित्र छलफल गरेर निर्णय गर्ने जवाफ दिएका छन्।
‘उहाँहरूले संघीयता र लोकतान्त्रिक गणतन्त्र पक्षधर शक्ति मिलेर अगाडि बढ्नुपर्छ। सहकार्य गरेर अघि बढौं भन्ने प्रस्ताव गर्नुभयो’, श्रेष्ठले भने, ‘हामीले पार्टीभित्र छलफल गरेर जवाफ दिन्छौं भनेका छौं। बाबुराम जी पनि उपचारका लागि बाहिर हुनुहुन्छ। अकोश जी र उपेन्द्र जी पनि बाहिर हुनुहुन्छ, उहाँहरू आएपछि छलफल गर्छौं।’
सपा संसदको तेस्रो ठूलो दल हो। प्रतिनिधि सभामा जसपाका ३२ जना सांसद छन्। उसका ३४ सांसदमध्ये हरिनारायण रौनियार र रेशम चौधरी निलम्बनमा छन्।
प्रचण्ड र नेपालले बुधबार बुधबार नेपाली कांग्रेसका सभापति शेरबहादुर देउवासँग पनि छलफल गरेका थिए। प्रतिनिधि सभा विघटन गर्ने प्रधानमन्त्रीको निर्णयपछि नेकपा दुई समूहमा विभाजित छ। तर, औपचारिक रूपमा फुटिसकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770205330.png)
-1764146706.png)
