गुणस्तरीय सेवा दिने उद्देश्यले नर्भिकले विस्तार गर्‍यो ओपिडी सेवा

कर्पोरेट

नेपाल लाइभ आइतबार, फागुन ९, २०७७ १८:४८

काठमाडौं- थापाथलीस्थित नर्भिक इन्टरनेसनल अस्पतालले बहिरंग सेवा (ओपिडी) विस्तार गर्दै बिरामीमैत्री बनाएको छ। उपचारका लागि अस्पताल आउने बिरामीले सहज रुपमा गुणस्तरीय सेवा लिन सकून् भन्ने उद्देश्यसहित अस्पतालले सेवा विस्तार गरेको जानकारी दिएको छ।

अत्याधुनिक उपकरण र प्रविधिबाट ओपिडी सेवाको पुनर्संरचना गरिएको प्रबन्ध निर्देशक मेघा चौधरीले बताइन्। अस्पतालले ओपिडीमा आउने बिरामीले लामो लाइन र भीडभाडमा बस्नु नपरोस् भन्दै ओपिडीलाई अत्याधुनिक र सुविधासम्पन्न बनाएको चौधरीको भनाइ छ।

उनका अनुसार अस्पतालले करिब २५ करोड लगानीमा ओपिडीसहित अस्पतालका सेवा सुधार र विस्तारको काम अगाडि बढाएको हो।

‘हाम्रो पहिलो प्राथमिकता भनेको नै बिरामी र उनका आफन्तको सन्तुष्टि हो,’ उनले भनिन्, ‘त्यसकारण बिरामी र बिरामीका आफन्तले अस्पतालमा लामो लाइन बस्न नपर्ने गरी र चिकित्सककहाँ सेवा लिन जाँदा कुनै पनि द्विविधा नहुने गरी आधुनिक प्रविधिसहित सेवालाई पुनर्संरचना गर्दै गइरहेका छौं।’

उनका अनुसार प्रविधिको प्रयोग गर्दै बिरामीले अस्पतालमा प्रवेश गरेपछि सहज रुपमा सेवा लिन सक्नेगरी अस्पतालका कोठा तथा वार्डहरुको व्यवस्थापन गर्ने काम भइरहेको छ।

‘अस्पताल भनेपछि मानिसहरुले स्पिरिट गन्हाउने, भीडभाड हुने, रगत देखिने भन्ने सोच्ने गर्छन्,’ उनले भनिन्, ‘तर हाम्रो अस्पतालमा त्यस्तो हुँदैन। यहाँ बिरामीले अस्पतालको गन्ध नआउने र घरकै जस्तो वातावरणमा सेवा लिन सक्ने व्यवस्था गरिएको छ।’

बिरामीको सन्तुष्टिलाई पहिलो प्राथमिकता दिँदै अस्पतालले कोभिड संक्रमणपछि बिरामीहरुले फराकिलो स्थानमा भीडभाड नहुने गरी सहज रुपमा सेवा लिन सक्ने व्यवस्था गरिएको उनले बताइन्।

‘ओपिडीका कोठाहरु फराकिलो बनाउनुका साथै कोठाभन्दा बाहिरको क्षेत्रमा भीड नहोस् भनेर टोकन प्रणालीदेखि अनलाइन बुकिङ र समयको व्यवस्थापनमा जोड दिइएको छ,’ उनले भनिन्, ‘कोरोनाले पनि हामीलाई धेरै कुरा सिकाएको छ। त्यसकारण हामीले बिरामीहरुका बीच भौतिक दूरी बढी हुनेगरी ओपिडी र अन्य वार्डहरुको व्यवस्थापनमा जोड दिएका हौँ।’

उपचारका क्षेत्रमा कर्पोरेट कल्चर भित्र्याउने पहिलो अस्पताल भएकाले पनि अस्पतालले बिरामीले तिरेको पैसाका आधारमा सन्तुष्ट हुनेगरी सेवा–सुविधा दिएको उनी बताउँछिन्।

‘पैसा तिर्न तयार भएर पनि नेपालमा राम्रो हस्पिट्यालिटी भएको अस्पतालको अभाव छ। हामीले त्यो अभावलाई पुरेर बिरामीलाई राम्रो सेवा–सुविधा सहितको गुणस्तरीय उपचार सेवा दिइरहेका छौं,’ उनले भनिन्, ‘उपचारका लागि विदेश जान नपरोस् भन्ने हिसाबले अस्पतालमा सेवा र सुविधालाई आधुनिक बनाउँदै लगिएको हो।’

उनका अनुसार अस्पतालले विभिन्न चरणमा आफ्ना सेवालाई विस्तार गर्दै लगिरहेको छ। अस्पतालले सेवा विस्तारकै क्रममा केही महिनापछि निःसन्तान उपचार केन्द्र पनि सञ्चालनमा ल्याउन लागेको छ।

अस्पतालको विस्तारित ओपिडीको आइतबार औपचारिक रुपमा उद्घाटन गरिएको छ। आहाना चौधरीले विस्तारित ओपिडीको औपचारिक उद्घाटन गरेकी हुन्।

नर्भिक एउटा अस्पताल मात्र नभएर नेपालमा आधुनिक रुपमा अस्पताल व्यवस्थापन गर्ने र नयाँ प्रविधि भित्र्याउँदै बिरामीलाई गुणस्तरीय सेवा दिने संस्था हो भन्छन् अस्पतालका अध्यक्ष बसन्त चौधरी।

अस्पतालले दिइरहेको सुविधाका कारण उपचारका लागि विदेश जाने धेरैलाई नेपालमा रोक्न सकिएको उनको भनाई छ।

अस्पतालले थापाथली परिसरमा नै नयाँ भवन बनाउँदै अस्पतालको सेवा थप विस्तार गर्न लागिरहेको चौधरीले जानकारी दिए।

बिरामीको सहजताका लागि अस्पतालको सेवालाई विस्तार गरिएको बताउँछन्, अस्पतालका हेड अफ द अपरेशन कपिल गौतम।

अस्पतालले उपत्यकाबाहिर पनि सेवा विस्तार गर्ने लक्ष्य लिएको छ। सुनसरीको दुहवी, कास्कीको पोखरा, सुर्खेत र बुटवल–भैरहवा क्षेत्रमा पनि अस्पतालको सेवा विस्तारको लक्ष्य रहेको चौधरीले बताए।

सन् १९९३ मा नर्भिक हेल्थ केयर एन्ड रिसर्च सेन्टर प्रालीका नाममा दर्ता भएको अस्पतालले सुरुमा नयाँ बानेश्वरमा सानो अस्पतालको रुपमा सेवा दिएको थियो। तर त्यहाँबाट ६ महिनामा नै अस्पताललाई भवन खाली गर्न बाध्य पारिएको थियो। त्यसपछि पुतलीसडकबाट सेवा दिन थालेको थियो। तर त्यहाँ पनि समस्या आएपछि थापाथलीमा रहेको जेसिस भवनबाट नर्भिकले सेवा दिन सुरु गरेको थियो।

जेसिस भवनमा अस्पताल सञ्चालन गरिरहँदा नर्भिक अस्पतालबाट पोलिक्लिनिकमा झर्न बाध्य भएइको थियो। त्यसपछि बसन्त चौधरीले सन् १९९७ मा जोखिम मोलेर लगानी थप गर्दै थापाथलीमा नै जग्गा किनेर अस्पतालको सेवा सुरु गरेका हुन्। आफ्नै जग्गामा भवन बनाएर सेवा सुरु गरेपछि नर्भिकले बिरामीको सन्तुष्टिलाई नै पहिलो प्राथमिकता दिँदै सेवा अगाडि बढाएको चौधरी बताउँछन्।

‘हामीले सधैं बिरामीलाई नै केन्द्रमा राखेर सेवा दिइरहेका छौं,’ उनले भने, ‘बिरामीको विश्वास र भरोसाकै कारण नर्भिक आज यो स्थानमा आइपुगेको हो।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

राष्ट्रिय स्वार्थ र आर्थिक कूटनीतिलाई उच्च प्राथमिकतामा राख्न मिसन प्रमुखहरूलाई परराष्ट्रमन्त्रीको निर्देशन

पाकिस्तानमा सैन्य कारबाहीमा २२ आतङ्ककारी मारिए

भाषा, थर र जातजाति छुट्याउन उच्च्चस्तरीय आयोग गठन गर्न संसदीय समितिलाई सुझाव