काठमाडौं- नेपाल लाइफ इन्स्योरेन्स कम्पनी लिमिटेडले शेयरधनीहरुलाई चुक्ता पूँजीको ३१ प्रतिशत बोनस शेयर तथा प्रतिशेयर रु.२० (कर सहित) नगद लाभांश वितरणको प्रस्ताव पारित गरेको छ।
साना लगानीकर्ताहरुको समेत कम्पनीको शेयरमा सहज पहुँचका लागि कम्पनीले विद्यमान प्रतिशेयर अंकित मूल्य रु. १०० को व्यवस्थालाई परिवर्तन गरि प्रति शेयर अंकित मूल्य रु. ५० कायम गर्ने प्रस्ताव पनि पारित गरेको छ।
बुधबार वीरगञ्जमा सम्पन्न बिसौं वार्षिक साधारण सभाले बोनस, लाभांश वितरण र प्रति शेयर अंकित मूल्यको प्रस्ताव पारित गरेको हो। बोनस शेयर वितरणपश्चात कम्पनीको चुक्ता पूँजी जीवन बीमा क्षेत्रकै सर्वाधिक रु. ७ अर्ब १९ करोड ९९ लाख ७० हजार ६६१ रूपैयाँ हुनेछ।
अध्यक्ष गोविन्दलाल संघईले वार्षिक प्रतिवेदन प्रस्तुत गर्दै कम्पनीले कुल बीमाशुल्क आम्दानीमा सर्वाधिक करिब ३०.०९ प्रतिशत बजारहिस्सा हासिल गर्न सफल भएको बताए।
उनले दुई दशकमा जीवन बीमा क्षेत्रमा कम्पनीको व्यावसायिक हिस्सा र गरिमालाई तमाम चुनौतिहरुबीच अझै नयाँ उचाइमा अगाडि बढाउनका लागि संरचनात्मक सुधार, संस्थागत सुशासनको पूर्ण पालना, सुदृढ आन्तरिक नियन्त्रण प्रणाली, सेवा प्रणालीमा नविन प्रविधिको प्रयोग, सम्पत्ति र दायित्व बीचको सन्तुलन, ग्राहक केन्द्रित योजना, विकेन्द्रिकरण, तालिम एवं अनुसन्धान तथा नयाँ बजारीकरण रणनीति अवलम्बन गरि आगामी दशकको अर्को सुनौलो यात्रा तर्फ अगाडि बढ्ने प्रतिवद्धता जनाए।
कम्पनीले बीमा समितिबाट जारी लगानी निर्देशिकाको परिधिभित्र रही दीगो एवं भरपर्दो लगानीका क्षेत्रहरुमा लगानी विस्तार तथा विविधीकरण गर्दै जाने नीति लिएको छ। सम्पत्ति र दायित्वबीच सन्तुलन कायम गर्न पूँजीगत लगानी वृद्धि गर्न आवश्यक भएकोले मुलुकका विभिन्न शहरहरुमा दीर्घकालिन पूँजीगत लगानी गर्नेतर्फ ठोस कार्य गर्ने लक्ष्यका साथ कम्पनी अगाडि बढेको अध्यक्ष संघईले बताए।
सभाबाट सर्वसाधारण शेयरधनीको तर्फबाट संचालक समितिमा प्रतिनिधित्व गर्ने संचालक निर्वाचनबाट विमल प्रसाद ढकाल र कृष्णराज लामिछाने निर्विरोध निर्वाचित भएका छन्।
साथै, संचालक समितिको माघ २७ गते मंगलबार बसेको ३१५औं बैठकबाट कम्पनीका कार्यबहाक प्रमुख कार्यकारी अधिकृत सन्तोष प्रसाईंलाई प्रमुख कार्यकारी अधिकृत पदमा नियुक्त गरि त्यसको स्विकृतिका लागि बीमा समितिमा पठाउने निर्णय गरेको छ।
हाल कम्पनीको लगानी रु १०५.५७ अर्ब रुपैयाँ रहेको छ भने जीवन बीमा कोष १०१ अर्ब ७८ करोड रुपैयाँ र शेयरधनी कोष ८ अर्ब ८५ करोडभन्दा बढी रहेको छ। कम्पनीमा एक लाख ६९ हजार ४८७ भन्दाबढी प्रशिक्षित अभिकर्ता रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
