काठमाडौं- नेकपा अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओली एकपछि अर्को गर्दै हरेक मोर्चामा हार्नु बाहेक विकल्प नभएको बताएका छन्। एकीकृत अखिल नेपाल शिक्षक संगठनको प्रथम परिषद् बैठकलाई राजधानीमा सम्बोधन गर्दै प्रचण्डले प्रतिगमन विरुद्धको लडाईंमा ओलीले बाजी हारेको टिप्पणी गरे।
‘पार्टीभित्रको गलत प्रवृत्ति एक्सपोज हुनु थियो, भयो। केपी ओलीले जसरी प्रतिगमन गर्ने, संविधानलाई कुल्चिने काम गर्नुभयो। प्रतिक्रान्तिको वकालत गर्न थाल्नुभयो। उहाँले बाजी हार्नुभयो भन्न थालेको छु। उहाँ इतिहासमा कलंकित हुनुभयो’, उत्साहित हुँदै प्रचण्ले भने, ‘उहाँ (केपी ओली)ले बाजी जित्ने कुनै सम्भावना छैन। हामी जहाँ उभियौं त्यहाँ जित्छौं। किन पनि जित्छौं भने हामी संविधान, लोकतान्त्रिक गणतन्त्र, संघीयता र समावेशी समानुपातिकको पक्षमा शान्ति र समृद्धिको पक्षमा उभियौं। त्यसकारण हामीले लडाईं जित्याैं।’
अब केपी ओलीले एकपछि अर्को गर्दै लडाईं हार्नु बाकेक विकल्प नभएको उनले बताए। ‘हामीले दरोसँग उभिँदा कसैले रोक्न सक्दैन। हामी विजयी हुन्छौं। यही आजको सच्चाई हो’ प्रचण्डले भने।
गिरिराजमणि पोखरेल शिक्षा मन्त्री हुँदा निक्कै सकारात्मक काम भएपनि ओलीले रोकेको प्रचण्डले बताए। ‘शिक्षा मन्त्रालयबाट राम्रा काम गर्ने प्रयास नभएको होइन, प्रधानमन्त्री केपी ओलीले रोक्ने काम गरे। निवर्तनमा शिक्षा मन्त्री गिरिराजमणि पोखरेललाई सुझाव दिएको हो’ प्रचण्डले भने,‘हामीले मेहनत गरेका ती सबै सेवा, सुविधा र हक अधिकारसँग सम्बन्धित कुराहरु हुन्।’
तर, ती सबै प्रतिवेदनहरु प्रधानमन्त्रीले कार्यन्वयन नगरेर थन्काउने काम गरेको प्रचण्डको भनाइ छ। केपी ओली शिक्षक र बाैद्धिक समुदायदेखि डराउने गरेको प्रचण्डले अरोप लगाए। ती समुदायले बुझेर विश्लेषण गर्ने भएकाले ओली डराउने गरेको उनको तर्क छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
