काठमाडौं- प्रतिनिधि सभा विघटनपछि नेपाल कम्युनिष्ट पार्टी (नेकपा) राजनीतिक रुपमा विभाजित भएको छ। केन्द्र र ६ वटा प्रदेशमा समेत सरकारको नेतृत्व गरिरहेको नेकपा तल्लो तहसम्मै विभाजित छ। र, यसको असर प्रदेश सरकारमा समेत देखिन थालेको छ।
केन्द्रमा नेकपाको एउटा पक्षको नेतृत्व प्रधानमन्त्री केपी शर्मा ओली गरिरहेका छन् भने अर्को पक्षको नेतृत्व पुष्पकमल दाहाल ‘प्रचण्ड’ र माधवकुमार नेपालले गरिरहेका छन्।
बागमती प्रदेशमा ओली पक्षीय मुख्यमन्त्री डोरमणि पौडेलविरुद्ध प्रचण्ड–माधव पक्षले अविश्वास प्रस्ताव दर्ता गरिसकेको छ। तर, यो प्रस्तावमा छलफल हुन पाएको छैन।
माघ १९ गते बोलाइएको बैठक विशेष कारण भन्दै स्थगित गरिएको थियो। बैठक आगामी फागुन २ गते दिउँसो २ बजेका लागि आह्वान गरिएको छ। माघ ९ गते बसेको प्रदेश सभाको बैठकमा मुख्यमन्त्री डोरमणि पौडेलविरुद्ध दर्ता भएको अविश्वास प्रस्तावमाथि सामान्य छलफल भई स्थगित भएको थियो।
उता, प्रदेश १ मा पनि मुख्यमन्त्री शेरधन राईविरुद्ध अविश्वास प्रस्ताव दर्ता भइसकेको छ। ओली पक्षीय मुख्यन्त्री राईविरुद्ध प्रचण्ड–माधव पक्षले दर्ता गराएको अविश्वास प्रस्ताव टेबुल हुन भने पाएको छैन। आइतबार ओली पक्षकै सांसदको अवरोधका कारण प्रदेश सभा बैठक स्थगित भएको थियो। बैठक आगामी फागुन ९ गतेका लागि तय गरिएको छ।
यसैबीच, सुदूरपश्चिम प्रदेश सभाको हिउँदे अधिवेशन आजदेखि सुरु हुँदैछ। जहाँ प्रचण्ड–माधव पक्षका त्रिलोचन भट्ट मुख्यमन्त्री छन्। आफू पक्षीय मुख्यमन्त्री भएको प्रदेशमा प्रचण्ड–माधव पक्षले अविश्वासको प्रस्ताव दर्ता गराउँदा सुदूरपश्चिममा ओली पक्षको तयारी के छ ? मुख्यमन्त्रीविरुद्ध अविश्वास प्रस्तावको तयारी गरिएको हो ?
ओली पक्षीय सांसद झपटबहादुर बोहरा भन्छन्- ‘अहिले कुनै तयारी छैन।’ उनले आज दिउँसो १ बजे बस्ने प्रदेश सभा बैठक नियमित प्रक्रियाअनुसार चल्ने बताए।
मुख्यमन्त्रीविरुद्ध अविश्वास प्रस्तावको तयारीबारे सोधिएको प्रश्नमा सांसद बोहराले भने, ‘यस्तो हल्ला कसले चलायो थाहा छैन। तर, हाम्रो कुनै तयारी छैन। अहिले नै जिस्काइहाल्नुपर्ने अवस्था छैन।’
प्रचण्ड–माधव पक्षका सांसद खगराज भट्ट अविश्वास प्रस्ताव दर्ता गरिएपनि सरकार संकटमा नपर्ने बताउँछन्। उनले आफूहरूको पक्षका बहुमत यथावत रहेको दाबी गरे।
उनका अनुसार प्रदेश सभामा रहेका नेकपाका ३९ सांसदमध्ये ओली पक्षका ७ जना मात्रै लागेका छन्। सरकार जोगाउन २७ मत भए पुग्ने उल्लेख गर्दै भट्टले आफूहरूसँग ३२ मत रहेको दाबी गरे।
५३ सदस्यीय प्रदेश सभामा नेपाली कांग्रेसका १२ र जनता समाजवादीका २ जना सांसद रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
